Za Israel kah waa Sinai
1-2 Za Israel urra gin Refidim. Ne patǝ sai fĩi fahfal za Israel mo pǝ̃ǝra gin sǝr Egiɓ, ge daira kǝsyicok Sinai. Ɗǝrra gŋ kah waare. 3 Mosus yee ge tǝ waa wo Masǝŋ, so Dǝɓlii ɗii ko pǝzyil ah faa: Mo faa nyi yaŋ Yakuɓ, za Israel sye: 4 We kwo fan mai me joŋ wo Egiɓien ne mai me woo we na matǝr moo woo wee ah tǝ yee ah ge wo ɓe ne ɓe. 5 Daga zǝzǝ̃ǝko wee ga laa zah ɓe so wee ga gbǝ ɓǝ faa ɓe ɓe, awe ye ga yea za ɓe kǝsyil za sǝr daŋ. Sǝr daŋ ma ɓe yo, amma we ga yea kǝsyil za sǝr tǝgbana za mai me syen we ɓo. 6 Awe ga yea za joŋzahsyiŋ maluu ne za matǝdaŋdaŋ wo ɓe. Ɓǝ mai moo ga faa nyi za Israel ako ye nyẽeko.
7 Mosus ge ɗii zaluu Israel, so rǝk ɓǝ makẽne Dǝɓlii mo ree nyi ko daŋ pel ɓǝǝra. 8 Pãa za daŋ zyiira zahki faara: Ru ga joŋ ɓǝ mai Dǝɓlii mo faa daŋ. Mosus so jin ge kee ɓǝ zyii za Israel mo zyiira nyi Dǝɓlii. 9 Dǝɓlii faa nyi Mosus: Mo laa ɓe, me ga ge wo ɓo pǝzyil cokfuu swãh bamme, me ga faa ɓǝ ne mo ka za mo laara kyaŋ ɓe ka mo nyiŋra mo cẽecẽe. So Mosus faa ɓǝ za Israel daŋ nyi Dǝɓlii.
10 Dǝɓlii faa nyi Mosus: Mo ge wo zana, mo zyeɓra suu ɓǝǝ tǝ'nah ne tǝ'nanne, mo vãhra fan wo suu ɓǝǝra, 11 mo zyeɓra suu ɓǝǝ tǝgǝǝ zah'nan sai. Mor ne zah'nan sai ah me ga ɗǝr gin tǝ waa Sinai ne nahnǝn za daŋ. 12 Mo ɗee zahsyee cok nyi za kiŋ waare, mo faa: We joŋ yella ne suu ɓiiri, we yee ge tǝ waa ka, koo we juu ɓal ah ka ta. Koo zune mo kal juu waa ah ɓe, a ga ira ko pǝ wulli. 13 Dǝɓ ka juu jol ga wol ah ya. Dǝɓ mo juu ɓe, mo ɓaara dǝɓ ah ne tǝsalle, wala dǝ dǝɓ ah ne guu. Koo mo faɓal o, mo dǝfuu yo, ka yeako wo sǝr yao. Ne cok kokõorĩi mo ul ɓe, za daŋ mo gera wo waare. 14 Mosus ɗǝr tǝ waa ge wo zana, ge faa nyi ra ka mo zyeɓra suu. So vãhra fan wo suu ɓǝǝra. 15 Mosus so faa nyi zana: We zyeɓ suu ɓiiri, ka zah'nan sai ah mo ge dai ba, we juu ŋwǝǝ ka.
16 Ne zah'nan sai ah mo ceeni, bam haŋ so sãhni, swãh mafuu ah zoo tǝ waa sǝŋ, so kokõorĩi cii ne swah pǝlli. Za ma zahjul daŋ suu coora coo. 17 Mosus pǝ̃ǝ gin zahjul ne za ka zyaŋ tǝ Masǝŋ, ge uura tǝ sǝr sǝŋ ɓal waare. 18 Waa Sinai daŋ suŋwii gbǝ kpǝ̃rãa, mor Dǝɓlii ɗǝr ge ɓo tǝl ah pǝzyil wii. Suŋwii ah zoo ge sǝŋ na suŋwii cok fãa malii mo tǝ syen wii, waa daŋ laŋ ne swahe. 19 Cii kokõorĩi cii ga sǝŋ ne swahe, Mosus a faa ɓǝ, Dǝɓlii zyii zah ah ne kyaŋ lii . 20 Dǝɓlii ɗǝr ge tǝlǝǝ waa Sinai. So ɗii Mosus ka mo yeeko ge tǝlǝǝ waare. Mosus yee ge gŋ. 21 Dǝɓlii faa nyi Mosus: Mo ɗǝr ge sǝŋ, mo lai zana ka mo zǝǝra zahsyee cok ah ka gin wo ɓe ka ẽe me, ka za ki mo leara ge sǝŋ ne wul ka. 22 Za joŋzahsyiŋ mai moo ginra gwari ne me mo zyeɓra suu ɓǝǝ ka mo yeara daŋdaŋ, ka me ik ra ka. 23 Mosus faa nyi Dǝɓlii: Dǝfuu ka ne fahlii ka yee waa Sinai ya, mor mo lai ru kǝpel ɓe, mo faa: Mo ɗee zahsyee cok kiŋ waa Sinai, me nǝǝ ɓo, ma ɓe yo. 24 Dǝɓlii faa nyi ko: Mo gyo, mo ɗǝr ge sǝŋ ka mo so yee ge, mo ge ne Aron ta, amma za joŋzahsyiŋ ne za ki mo zǝǝra ge fah kǝ wo ɓe ka, mor ka me ik ra ka. 25 So Mosus ɗǝr ge wo zana, faa ɓǝ ah nyi ra.
© Bible Moundang © Alliance Biblique du Tchad, 1996.
