1 So Yuseɓ lee ge tǝ pah ah yeyee tǝl ah ne zwǝ ko ne zahe. 2 So faa nyi za syiŋ mai moo joŋra yeɓ wol ah ka mo rwahra syiŋ wo pamme, za syiŋ so rwahra syiŋ wol ahe. 3 Soɓra ko baa zah'nan jemma nai, mor zah'nan rwah syiŋ wo wul a joŋ naiko. Egiɓien yeera wul ah zah'nan jemma rǝŋ.
4 Ne cok zah'nan yee wul ah mo vǝr o, Yuseɓ faa nyi za yaŋ Farao: Oseni we laa pǝ'nyah ne me ɓe, we kee ɓǝ mai me tǝ faa nyi we nyi Farao. 5 Ne cok pa ɓe mo tǝ yah wunni, joŋ me haa zah nyi ko, faa: Zye wǝ ɓe, ka mo ge cii wul 'min pǝ pal mai zye cii ɓo mor 'min pǝ sǝr Kanaan. Mor ahe, oseni mo soɓko me ge cii ko gŋ, me pii soo ge ba. 6 Farao zyii faa: Mo gyo, mo ge cii pa ɓo tǝgbana mo haa zah ɓo nyi ko.
7 Yuseɓ so kal ka cii pah ahe. Za yeɓ Farao ne zaluu yaŋ ah tǝkine zaluu sǝr Egiɓ daŋ gera ne ki ta. 8 Za yaŋ Yuseɓ ne wee pam tǝkine za yaŋ pam daŋ kalra ge ne ki, sai soɓra wee ɓǝǝ ne ŋgaɓ pǝsǝ̃ǝ tǝkine ŋgaɓ dǝǝ ɓǝǝ sǝr Gosen to. 9 Muŋta sal tǝkine za pǝr daŋ gera ne ki, za mai mo gera ne ki ara pǝpãa no cam. 10 Ge daira pǝ cok ɗuu sor ma ɗii ne Atad, a nǝn zakǝ Yordan. Yuseɓ yeyee wul pah ah gŋ zah'nan rǝŋ, yera yee ah pǝlli. 11 Kanaanien mai mo kaara ɓo sǝr ah kwora yee ɓǝǝ pǝ cok ɗuu sor Atad faara: Yee wul Egiɓien pǝgaɓɓe. Mor ah ɗiira cok ah ne Yee Wul Egiɓien. A nǝn zakǝ Yordan. 12 Wee Israel joŋra wo pa ɓǝǝ tǝgbana mo faako nyi ra. 13 Wee ah gera sǝr Kanaan ne ki, ciira ko pǝ yii pǝ 'wah Makpela, yii mai Abraham mo lee tǝkine 'wah ah daŋ jol Efron Hetiyo mor cii wulli. A nǝfah kǝmorcomzah'nan Mamre. 14 Ne cok Yuseɓ mo cii wul pah ah vǝrri, pii soo ge sǝr Egiɓ ne wee pam tǝkine za ma gara ne ki ka cii wul pam daŋ.
Yuseɓ wuu zahzyil nyi wee pamme
15 Ne cok wee pah Yuseɓ mo kwora pa ɓǝǝ mo wǝ naiko, faara: Ɗah maki Yuseɓ ga syiŋ na ka faŋ val ɓǝɓe' mai na joŋ wol ah daŋ tǝ man ne? 16 Peera pee wo Yuseɓ faara: Ka pa ɓo ɓah wun a ba, faa nyi ru: 17 Ka we faa nyi Yuseɓ naiko: Oseni, mo yaŋ ɓǝɓe' wee pa ɓo ne yeɓ ɓe' ɓǝǝra. Mor joŋra mo pǝɓe'. Amma oseni mo yaŋ faɓe' za yeɓ Masǝŋ pa ɓo. Mo faara nyi naiko, Yuseɓ so yeyee. 18 Wee pah ah laŋ so gera wol ahe, keara sǝŋ pel ah faara: Aru byak ɓo, ru ge ɓii no. 19 Yuseɓ faa nyi ra: We ɗuu gal ka, ame Masǝŋ ne? 20 Ɓǝɓe' mai we foo ɓo ka joŋ wo ɓe, Masǝŋ so fer ɓǝ ah ciŋ ɓǝ sãhe, mor ka ɓǝ ah mo ge joŋko na ma tǝ'nahko, ka ǝ̃ǝ za pǝlli. 21 Zǝzǝ̃ǝko we ɗuu gal kao, me ga nyi farel nyi we ne wee ɓii daŋ. Yuseɓ wuu zahzyil nyi ra, faa ɓǝ 'nyah nyi ra.
Ɓǝ wul Yuseɓ
22 Yuseɓ kaa sǝr Egiɓ ne za yaŋ pah ah daŋ. Kyaŋ syii temere ne jemma vaŋno. 23 Yuseɓ kwo wee Efraim ŋhaa dai zahŋhǝǝtǝ̃ǝ patǝ sai ahe. We Makir we Manasse laŋ Yuseɓ kwo ra ne nahnǝn ahe. 24 Yuseɓ faa nyi wee pamme: Me tǝ yah wunni, amma 'manna Masǝŋ ga syee ne we, a ga zol gin sǝr mai ne we ka ga pǝ sǝr mai mo haako zah nyi Abraham ne Isak tǝkine Yakuɓ ne ko. 25 So Yuseɓ fii ra ka mo haara zah nyi ko faa: Ne cok Masǝŋ mo ga syee ne we ga sǝr ah ɓe, we woo woiŋ ɓe gin nyee kal ge gŋ ne ko. 26 Yuseɓ wuu, syii ah a temere ne jemma vaŋno. Rwahra syiŋ wo wul ahe, kanra ko ge pǝ sunduku pǝ cok kan wul sǝr Egiɓ.
© Bible Moundang © Alliance Biblique du Tchad, 1996.
