Sal ma ruu ne sǝr Edom
1 Fahfal ah comki, za sǝr Moab, ne Ammon, ne Munien mai mo gbǝra zah ɓo ne ra gera ka ruu sal ne sǝr Yuda. 2 Ge faara nyi goŋ Yusafat: Za sal sǝr Edom gera ɓo zah mabii Wul pǝpãare, a ga ruura sal ne mo. Rera laŋ Hasason-Tamar ɓe, tǝgba faa: En-Gedi. 3 Gal re Yusafat pǝlli, so juupel wo Dǝɓlii ka mo gbahko jol ahe. So lai ɓǝ syẽe fan pǝ sǝr ah daŋ. 4 Za yaŋ maluu camcam pǝ sǝr Yuda hǝǝra kal ge yaŋ Jerusalem, mor ka fii Dǝɓlii ka mo gbahko jol ɓǝǝra. 5 Ara ne za yaŋ Jerusalem daŋ taira ge pǝ cok mafuu ah mai mo zah yaŋ Masǝŋ. 6 Goŋ Yusafat ur uu pel ɓǝǝ juupel ne kyaŋ lii faa: Dǝɓlii Masǝŋ pa ɓuu lii ra, mo kaa goŋ ɓo coksǝŋ tǝtǝl za sǝr daŋ. Amo pǝswahe, mo pǝyǝkki, dǝɓ ma gak kyeɓ ɓǝ ne mo kǝka. 7 Amo ye Masǝŋ ɓuuru. Ne cok za ɓo Israel mo gera pǝ sǝr maiko, amo nĩi za mai mo yea kaara ɓo gŋ ge lalle, mo nyi sǝr ah nyi morsǝ̃ǝ palyaŋ ɓo Abraham, ka mo ciŋ ma ɓǝǝ ga lii ga lii. 8 Kaara ɓo nyeeko, so vuura yaŋ ɓo mor ka yii tǝɗii ɓo faara, 9 koo ɓeɓ ye mo ge lwaa ra, wala mo sal o, koo syem maɓe' yo, wala mo koŋ yo, so a gin uura zah yaŋ ɓo mai moo juura pel wo ɓo gŋ, a ga juura pel wo ɓo, pǝzyil gaɓ mo lwaa ra ɓo, so mo ga laa juupel ɓǝǝ mo wǝǝ ra gŋ.
10 Zǝzǝ̃ǝko, za Ammon, ne Moab tǝkine Edom ge tǝ ruura sal ne ru. Ne cok pa ɓuu lii ra mo pǝ̃ǝra gin sǝr Egiɓ, mo soɓ ra dan ge pǝ sǝr marai ya, pa ɓuu lii ra syeera kah ɓǝǝra, amma muŋra ra ya. 11 So zǝzǝ̃ǝ tǝ gaɓra ru o! Gera ɓo ka nĩi ru pǝ sǝr mai mo nyi ɓo nyi ru ga lalle. 12 Amo ye Masǝŋ ɓuuru, mo ŋgoŋ kiita tǝ ɓǝǝra, mor aru pǝtǝtǝ̃ǝre, ru ka gak uu pel za mapãa mai mo ge ɓo tǝ ruu sal ne ru ya. Ru tǝ joŋ ah laŋ ru joŋ ɗǝne ya, amma ru woo nahnǝn rǝk ɓo nyi mo, mo gbah jol ɓuu sa!
13 Za sǝr Yuda ne ŋwǝǝ ɓǝǝ ne wee ɓǝǝ daŋ uura ɓo zah yaŋ Masǝŋ. 14 So Tǝ'yak Dǝɓlii ge tǝ Lewitiyo maki ah mai mo uu ɓo gŋ kǝsyil zana, a ɗii dǝɓ ah ne Jahaziel, we Zakarias we Benaja we Jiel we Mattania ma morsǝ̃ǝ Asaf yo. 15 Jahaziel faa: Goŋe, ne we za sǝr Yuda, ne za yaŋ Jerusalem daŋ, Dǝɓlii faa: Zahzyil mo nǝǝ we, wala we ɗuu gal pel za sal mapãa mai ka. Awe ye ka tǝ ga ruu sal ah ya, azye ye tǝ ga ruu. 16 Tǝ'nan we ge ruu sal ne ra, a ga yeera pǝ cok yee bii Sis, we ga lwaa ra pǝ cok in zah cok ma tǝforoŋ ka ga nǝfah kǝsyicok gwari ne Jeruel. 17 Awe ye ka tǝ ga ruu sal ah ya, we ge uu ɓii gŋ uu byak to. We ga kwo Dǝɓlii moo ga soɓ we kaa kacella. Za sǝr Yuda ne za yaŋ Jerusalem, zahzyil mo nǝǝ we wala gal mo re we ka. We pǝ̃ǝ ge sal o! Dǝɓlii ga yea ne we gŋ.
18 So goŋ Yusafat ɗǝŋ ge sǝŋ ŋhaa zahpel ah ge juu sǝrri, za pãa daŋ ɗǝmra ge sǝŋ ne ki juura pel wo Dǝɓlii. 19 Lewitien ma morsǝ̃ǝ Kehat ne Kora urra uu sǝŋ ɗǝǝra lǝŋ ne kyaŋ pǝ'man yii Dǝɓlii Masǝŋ Israel ne ko.
20 Tǝ'nan ah ne zah'nan za pǝ̃ǝra ka ga kǝsyicok mai mo gwari ne yaŋ ma ɗii ne Tekoa. Ne cok mo tǝ gara, Yusafat lai ɓǝ nyi ra faa: Awe za sǝr Yuda ne za yaŋ Jerusalem, we soɓ suu ɓii wo Dǝɓlii Masǝŋ ɓiiri, we uu pǝ cok ul ɓii mbaŋ. We gbǝ ɓǝ mai profetoen ah mo faara nyi we, we ga lwaa jam. 21 Fahfal goŋ mo faa ɓǝ nyi za vǝrri, so faa nyi za ma ɗǝǝ lǝŋ mo ɓaara mbǝro mai moo ɓaara ne cok ɗǝǝ lǝŋni, ka mo ɗǝǝra lǝŋ syee pel za sal ne faa: Osoko Dǝɓlii, mor 'yah ah ga lii ga lii.
22 Ne cok mo tǝŋra ɗǝǝ lǝŋni, Dǝɓlii so joŋ tǝtǝl byǝŋ Ammonien ne Moabien tǝkine Edomien. 23 Ammonien ne Moabien so ruura sal ne Edomien, ikra ra belbelle, fahfal ah so jinra ruu sal kǝsyil ki soo sǝŋ. 24 Ne cok za sal za sǝr Yuda mo ge daira pǝ cok ma tǝgee sǝŋ ah mai mo kǝsyicokki, ẽera za syiŋ ɓǝǝ ge, kwora wul ɓǝǝ myah ɓo tǝ sǝr na zãare, dǝɓ ma ɗuu ǝ̃ǝ kǝka vaŋno ya.
25 Yusafat ne za sal ah kalra ge gŋ, ka woo fan ma lwaa zah salle. Ge lwaara dǝǝ, farelle, mbǝro, tǝkine fan masãh ah camcam gŋ. Joŋra zah'nan sai cok woo ahe, mor fan ah a pǝlli, kal tǝ mai ka mo gak woora daŋ ɓe. 26 Ne zah'nan patǝ nai ah taira ge pǝ cok tǝforoŋ Beraka ka joŋ osoko nyi Masǝŋ gŋ, mor fan mai daŋ mo joŋko ɓo. (Mor ah ɗiira cok tǝforoŋ ah ne Beraka, tǝgba faa: Osoko.) 27 Yusafat ne sooje ah piira soo ge yaŋ Jerusalem ne laa pǝ'nyahre, mor Dǝɓlii ik za syiŋ ɓǝǝ ɓe. 28 Ne cok mo ge daira yaŋ Jerusalem, so kalra ge ɓǝr yaŋ Masǝŋ ne ɗǝǝ lǝŋni, tǝnjuŋni tǝkine kokõorĩi. 29 Za sǝr camcam mo laara Dǝɓlii ik za syiŋ Israel pel ɓǝǝra, gal re ra pǝlli. 30 Yusafat kaa goŋ ah bai ɓǝ ki, Masǝŋ nyi jam nyi ko cok daŋ.
In zah kaa goŋ Yusafat
(1 ZaG 22:41-50)31 Ne cok Yusafat mo kaa goŋ sǝr Yuda, ka joŋ syii ɓo jemma sai tǝtǝl dappe, kaa goŋ yaŋ Jerusalem syii jemma gwa tǝtǝl dappe. A ɗii mah ah ne Azuba, mǝlaŋ dǝɓ ma ɗii ne Silki yo. 32 Yusafat ɓaŋ tǝɓal pah ah Asa ryakryakke, coŋ ge lal biŋ laŋ ya, joŋ fan ma 'nyah suu Dǝɓlii. 33 Amma sai fan vaŋno to, ɓeɓ cok juupel za gwǝǝr a. Za zyii ferra zahzyil ɓǝǝ ka juupel wo Masǝŋ pa ɓǝǝ lii ra ya 'wa.
34 Fan mai daŋ Yusafat mo joŋ daga tǝtǝŋ kaa goŋ ah ŋhaa in zah ahe, ɓǝ ah ŋwǝǝ ɓo pǝ ɗerewol Jehu we Hanani mai ɓǝ ah mo no pǝ ɗerewol Ɓǝ Za Goŋ Israel.
35 Com maki ah Yusafat goŋ sǝr Yuda gbǝ zah ne Akazia goŋ Israel mai moo 'yah joŋ faɓe' pǝlli. 36 Gbǝra zah zyeɓra dah rǝk pǝ cok zyii dah ma ɗii ne Esion-Geber mor ka ǝǝ ga Tarsis ne ko. 37 Amma Eliezar we Dodava ma yaŋ Maresa lai Yusafat faa: Mor amo gbǝ zah ne Akazia, Dǝɓlii ga ɓeɓ dah mai we zyeɓ ra ɓo. So dah ah ra ɓeɓ ɓe, gak ka ǝǝ ya.
© Bible Moundang © Alliance Biblique du Tchad, 1996.
