Ira Haman pǝ wulli
1 So goŋ ne Haman kalra ka ga ren fan wo Estar patǝ gwa ahe. 2 Ne cok mo kaara ɓo tǝ zwah fanne, goŋ fii Estar faa: Magoŋ Estar, mo 'yah fẽene? Mo cuu nyi me, mo ga lwaa fan ahe, koo raita goŋ ɓe laŋ, mo ga lwaa. 3 Magoŋ Estar zyii faa: Goŋ moo joŋ gboŋgboŋ wo ɓe, moo zyii fii ɓe no ɓe, goŋ mo soɓ tǝtǝl ɓe ne za ɓe daŋ yea sǝŋ ne cee. 4 Mor ame ne za ɓe daŋ, leera ru ɓo ka ik ga lal pǝ wul ka vǝr ru tǝɗe'. Kǝnah mo leera ru ɓo ka ciŋ byak ne ɓe, me ka faa ɓǝ ki ya, kǝnah gaɓ ah ka yea nǝn mai ka me ge gaɓ goŋ ne ɓǝ ah ya.
5 So goŋ Ahasverus fii magoŋ Estar faa: Azu ye foo ɓǝ mai ɓo ka joŋ sye ne? Dǝɓ ah kẽne? 6 Estar zyii faa: Pa syiŋ ɓuu mai mo tǝ foo mor ɓuu dǝɓ maɓe' ma ɗii ne Haman ko yo.
Zahzyil nǝǝ Haman, gal re ko pǝlli. 7 Goŋ ɓaŋ kpãhe, ur pǝ̃ǝ gin ɓǝr yaŋ ne kal ge pǝ 'wah mai mo zahpiicel goŋe, amma Haman mo kwo, goŋ tǝ ga joŋ ɓǝ ne zye tǝ ɓǝ ahe, so kaa fahfal ah a pǝǝ magoŋ Estar mor cee suu ahe. 8 Ne cok goŋ mo pii soo gin pǝ 'wah goŋ zahpiicel ge ɓǝr yaŋ, ge lwaa Haman lee ge ɓo tǝ ɗee mai Estar mo kaa ɓo gŋ, tǝ fii ka mo kwora syak tǝl ahe. Goŋ ɓyaŋ ɓǝ faa: Dǝɓ mai a kyeɓ ka gban magoŋ ne swah pel ɓe ɓǝr yaŋ goŋ nyee ne?
Ne cok goŋ mo faa ɓǝ mai naiko, ne pel nai sǝ, syẽe yaŋ goŋ koora tǝtǝl nyi Haman . 9 Dǝɓ vaŋno kǝsyil ɓǝǝ a ɗii ne Harbona, faa nyi goŋe: Haman pee kpuu mai wah ah mo i jol ɓo jemma dappe yaŋ ahe, mor ka rao Mordekai mai mo joŋ ɓǝ sãh wo goŋ mo ǝ̃ǝ ko ga tǝl ahe. Goŋ faa: We ge rao Haman ge tǝ kpuu ahe! 10 So ge raora Haman ge tǝ kpuu mai mo peeko ɓo ka rao Mordekai tǝl ahe. Kpãh goŋ so wuu o.
© Bible Moundang © Alliance Biblique du Tchad, 1996.
