Me joŋ osoko wo Masǝŋ mor njaŋ ahe
1 Lǝŋ David.
2 Dǝɓlii, me ga joŋ osoko nyi mo ne zahzyil ɓe daŋ.
Me ga cuu yeɓ ɓo masãh mai mo joŋ ɓo daŋ gin lalle.
3 Me ga ɗǝǝ lǝŋ wo ɓo ne laa pǝ'nyahre.
Dǝɓlii mayǝkki, me ga ɗǝǝ lǝŋ yii tǝɗii ɓo ne ko.
4 Ne cok mo cuu swah ɓo ge lal ɓe,
Za syiŋ ɓe a leara ga sǝŋ a wukra.
5 Pa kiita matǝ njaŋ, amo kaa tǝ fakal ɓo,
Amo ŋgoŋ kiita zyii ɓǝ ge mor ɓe.
6 Amo ŋgoŋ kiita tǝ za sǝrri,
Amo muŋ ra,
Dǝɓ ka fǝ̃ǝ foo ɓǝ ɓǝǝ faɗa yao.
7 Za syiŋ ɓuu vǝr tǝɗe' ɓe,
Mo ɓeɓ yaŋ ɓǝǝ vǝr tǝɗe' ɓe,
Dǝɓ ka fǝ̃ǝ foo ɓǝ ah yao.
8 Amma Dǝɓlii ako ye goŋ ga lii ga lii,
Ɓyak fakal ah ɓo ka ŋgoŋ kiita.
9 Kaa goŋ ɓo tǝ sǝr ne njaŋ ahe,
A ŋgoŋ kiita tǝ za sǝr ne fahlii ahe.
10 Dǝɓlii ye pa byak za matǝ jokri,
Ako tǝgbana cok rǝk fan sal za mai mo tǝ cuura syak nyi ra.
11 Dǝɓlii, za mai mo tǝra mo ɓe, a ga soɓra suu ɓǝǝ wo ɓo,
Mo ka soɓ dǝɓ mai mo ge wo ɓo ɓoo ya.
12 We ɗǝǝ lǝŋ yii Dǝɓlii mai mo kaa ɓo Sion ne ko.
We faa ɓǝ yeɓ mai mo joŋko daŋ nyi za sǝrri.
13 Masǝŋ a foo ɓǝ za mai mo pǝ bone,
A laa yee ɓǝǝra,
A ŋgoŋ kiita tǝ za mai mo cuura bone nyi ra.
14 Dǝɓlii, mo kwo syak tǝ ɓe,
Mo ẽe bone ɓe mai me tǝ laa jol za syiŋ ɓe.
Dǝɓlii, mo ǝ̃ǝ me gin zah wulli,
15 Mor ka me gak uu pel za yaŋ Jerusalem,
Ka me faa ɓǝ fan mai mo joŋ ɓo me tǝ yii mo tǝ ɓǝ ah daŋ nyi ra.
Ame ga laa pǝ'nyah mor mo ǝ̃ǝ me ɓe.
16 Za sǝr leara ge pǝ lak mai mo ciira ɓo,
Mǝmmǝǝ mai mo saara ɓo ne suu ɓǝǝra, so jin gbah ɓal nyi ra.
17 Dǝɓlii cuu suu ah nyi za ne kiita tǝ njaŋ ahe,
Za faɓe' yeɓ ɓǝǝ so jin gbah ra.
18 Masǝŋ a rǝk za faɓe' mai mo zyii 'yahra ɓǝ ah ya daŋ ga pǝ cok mai za wul mo gŋ.
19 Mor Dǝɓlii ka yaŋ ɓǝ pa syak ga lii ya,
Pa syak ga lwaa fan mai mo tǝ byakko.
20 Dǝɓlii, mo ur uu,
Ka dǝfuu mo kaara swah ka,
Mo tai za sǝr ge pel ɓo ka mo ŋgoŋ kiita tǝ ɓǝǝra.
21 Dǝɓlii, mo re gal nyi ra,
Ka mo tǝra, ara ye dǝfuu.
© Bible Moundang © Alliance Biblique du Tchad, 1996.
