Ɓǝ fan mai mo ga joŋ wo Ammon
1 Dǝɓlii faa nyi me: 2 We dǝfuu, mo faa ɓǝ fan mai moo ga joŋ wo sǝr Ammon, 3 mo faa nyi ra, mo syiira sok laa ɓǝ mai ame Dǝɓlii Masǝŋ me tǝ faa nyi ra: Ne cok we kwo yaŋ ɓe mo ɓeɓ ɓo, so we kwo sǝr Israel ɓeɓ ɓe, we so kwo za Yuda mo kalra ge pǝ byak zah sǝr zana, we so faa yawah tǝ ɓǝ ahe. 4 Mor we 'nyah suu ɓo tǝ ɓǝ ahe, me ga soɓ zahban maki ah daga kǝsyicok nǝfah kǝmorcomzah'nan gin rera sǝr ɓiiri, a ga gbahra jul ɓǝǝ pǝ sǝr ɓiiri, a kaara gŋ. A ga rera lee syẽm kpuu 'wah ɓiiri, a ga zwahra won mai mo mor zwan ɓii ta. 5 Me ga joŋ yaŋ Rabba ciŋ cok pii njoŋnjoŋ, sǝr Ammon ne lii ah daŋ a ga ciŋ cok pii gwii. So we ga tǝ, ame ye Dǝɓlii.
6 Ame Dǝɓlii Masǝŋ me faa: Awe kǝ̃ǝ jol ge wo ki, we zwǝǝ ge sǝŋ ne ko ne laa pǝ'nyahre, awe syẽa sǝr Israel. 7 Awe joŋ fan naiko, mor ah me ga soɓ we ga mor jol za ki, a ga woora fan ɓiiri, me ga myah we ga kǝsyil za ki, me ga vǝr we tǝɗe', we ka ga yea na za wala ka yea ne sǝr ma syak ɓii kpik yao. So we ga tǝ, ame ye Dǝɓlii.
Ɓǝ fan mai mo ga joŋ wo Moab
8 Ame Dǝɓlii Masǝŋ me faa: Mor za Moab faara, za Yuda ara tǝgbana za ki daŋ, 9 mor ah me ga gbǝr zahsyee sǝr Moab, ka za syiŋ ɓǝǝ mo ge ruura sal ne yaŋ ɓǝǝ maluu ah ra, wala ne yaŋ ɓǝǝ maluu masãh lii ah ra - Bet-Jesimot, Ba'al-Meon, ne Kirjataim. 10 Me ga soɓ zahban maki ah daga kǝsyicok nǝfah kǝmorcomzah'nan gin rera sǝr Moab ne sǝr Ammon, za Moab ka ga yeara kpik na za faɗa yao. 11 Me ga ŋgoŋ kiita tǝ za Moab, so a ga tǝra, ame ye Dǝɓlii.
Ɓǝ fan mai mo ga joŋ wo Edom
12 Ame Dǝɓlii Masǝŋ me faa: Za Edom ruura sal ne za Yuda ne tǝ'yak faŋ valle, ne joŋ ah nai joŋra ɓǝɓe' malii ah ɓo. 1:11-12; Ob 1-14; Mal 1:2-5 13 Ame Dǝɓlii Masǝŋ me faa: Me ga cuu swah ɓe tǝtǝl Edom, me ga vǝr dǝfuu ne faɓal mo pǝ sǝr ah daŋ, me ga joŋ yaŋ Teman na cok kolle, ŋhaa ga dai yaŋ Dedan, a ga ikra za yaŋ ah daŋ pǝ wul zah salle. 14 Za ɓe Israel ga faŋra val tǝ za Edom zahwaa ɓe. A ga joŋra sǝr Edom laara yǝk kpãh ɓe me ɓaŋ ɓo. So za sǝr Edom ga tǝra, ame ye faŋ val ɓo tǝ ɓǝǝra. Ame Dǝɓlii Masǝŋ me faa naiko.
Ɓǝ fan mai mo ga joŋ wo Filistien
15 Ame Dǝɓlii Masǝŋ me faa: Filistien ruura sal ne za syiŋ ɓǝǝ za Yuda daga ɓaaɓe, ne tǝ'yak faŋ valle, ne syiŋ pǝ zahzyilli, vǝrra ra. 2:4-7; Zak 9:5-7 16 Mor ah ame Dǝɓlii Masǝŋ me faa: Me ga ruu sal ne Filistien me ga ɓeɓ ra, me ga vǝr za mai daŋ mo coŋra ɓo ne cee pǝ sǝr Filistien. 17 Me ga ŋgoŋ kiita tǝ ɓǝǝ pǝgaɓɓe, me ga faŋ val tǝ ɓǝǝra, a ga laara yǝk kpãh ɓe me ɓaŋ ɓo, so a ga tǝra, ame ye Dǝɓlii.
© Bible Moundang © Alliance Biblique du Tchad, 1996.
