Yefta ne za Efraim
1 Za Efraim taira, so yeera el Yordan ka ga nǝfah kǝ Zafon. Faara nyi Yefta: Mor fẽe mo yee ka ga ruu sal ne Ammonien mo so ɗii ru ka ru ge ne mo ya ne? Ru ga ɓoo wii nyi yaŋ ɓo tǝtǝl ɓo.
2 Yefta zyii faa nyi ra: Ame ne za ɓe ru ruu sal magaɓ ah ne Ammonien. Me ɗii we ge ka we ge gbah jol ɓe, amma we zyii ka gin ǝ̃ǝ me jol ɓǝǝr a. 3 Ne cok me kwo we ka tǝ yah gin gbah jol ɓe ya, me soɓ suu ɓe nyi wulli, me ge ka ruu sal ne Ammonien. Dǝɓlii laŋ so soɓ ra ge mor jol ɓe. Mor fẽe we so ge ɓii ɓo ka ruu sal ne me tǝ'nah ne? 4 Yefta tai za Giliat daŋ, so ruu sal ne za Efraim. Za Giliat ikra za Efraim, mor za Efraim a faara, awe za Giliat we ɗuu ɓo gin kǝsyil ɓuuru, awe ye ka za Efraim ya, we ye ka za Manasse ya ta. 5 Za Giliat nyiŋra cok yee bii Yordan ma ga Efraim. Dǝɓ mo ɗuu gin kǝsyil za Efraim mo ge faa: We soɓ me yee bii sa ɓe, za Giliat a fiira ko: Amo ye dǝɓ Efraim ne? Dǝɓ ah mo zyii: A'a ɓe, 6 a faara nyi ko: Mo faa Cibbolet. So dǝɓ ah mo faa Sibbolet, mor ka gak ɗii pǝsãh ya ɓe, a gbanra ko a ŋgoŋra dǝɓ ah ga lal pǝ cok yee bii Yordan. Ne cok ah za Efraim wukra 42.000.
7 Yefta kaa ne yeɓ dǝɓlii za Israel syii yea. Fahfal ah Yefta dǝɓ Giliat wuu. Ciira ko pǝ yaŋ malii ah vaŋno kǝsyil yaŋ maluu mo Giliat.
Ibsan, Elon ne Abdon kaara ne yeɓ zaluu za Israel
8 Fahfal Yefta, Ibsan ma Betlehem kaa dǝɓlii za Israel. 9 A ne wee wǝǝ jemma sai, wee maŋwǝǝ jemma sai ta, nyi wee ah maŋwǝǝ jemma sai nyi za ma lal kanra, so woo wee za ma lal maŋwǝǝ ah jemma sai nyi wee ah mawǝǝ kanra ta. Ibsan kaa ne yeɓ dǝɓlii za Israel syii rǝŋ, 10 so wuu, ciira ko yaŋ Betlehem.
11 Fahfal ah Elon dǝɓ Zebulon kaa dǝɓlii za Israel syii jemma, 12 so wuu, ciira ko Ajalon pǝ sǝr Zebulon.
13 Fahfal ah Abdon we Hillel dǝɓ Piraton kaa dǝɓlii za Israel. 14 A ne wee wǝǝ jemma nai, wee ɓǝr wee ah mawǝǝ jemma sai, a yeera ma tǝ korro jemma rǝŋ. Dǝɓ ah kaa dǝɓlii za Israel syii nama, 15 so wuu, ciira ko Piraton pǝ sǝr Efraim tǝ waa Amalekien.
© Bible Moundang © Alliance Biblique du Tchad, 1996.
