Masǝŋ lii Abraham
1 Fahfal ɓǝ mai mo joŋ, Masǝŋ ge lii Abraham, ɗii ko faa: Abraham. Abraham zyii: Awai. 2 Masǝŋ so faa nyi ko: Mo ɓaŋ we ɓo matǝ vaŋno Isak mai mo 'yah ko pǝlli, mo ge sǝr Moria, mo ge joŋ syiŋ suŋwii ne ki tǝ waa mai mee ga cuu nyi mo.
3 Abraham ur ne zah'nan pim, ɓal zahwii joŋ syiŋrĩ, baŋ tǝgaŋ nyi korro ahe, woo za yeɓ ah gwa, ɓaŋ wel ah Isak ta. So ur kal ge pǝ cok mai Masǝŋ mo cuu nyi ko. 4 Tǝgǝǝ zah'nan sai ah Abraham ɓaŋ nahnǝn ah kwo cok ah ge pǝɗǝkki. 5 Abraham faa nyi za yeɓ ahe: We kaa ɓii nyee ne korro, ame ne tǝbanna mai ru ga ŋhaa ka juupel ɗao, ru pii soo ge wo ɓii ba.
6 Abraham so ɓaŋ zahwii joŋ syiŋ ah kan tǝ wel ah Isak, mǝ ah ɓaŋ wii ne nyah mor jolle, kalra syel mor ki gwa daŋ. 7 Isak fii pah ah Abraham faa: Daddǝ. Zyii faa: Awai, na ɓe, mo 'yah fẽene? So Isak faa: Wii ne zahwii daŋ a no, amma we pǝsãhm joŋ syiŋ ah sye kẽne? 8 Abraham zyii faa: Na ɓe, Masǝŋ ye ga nyi we pǝsãhm joŋ syiŋ suŋwii ne suu ah ba. So syeera mor ki gwa daŋ, kalra.
9 Ge daira pǝ cok mai Masǝŋ mo cuu nyi ko, Abraham vuu cok joŋ syiŋ gŋ, lǝǝ zahwii ge tǝl ahe. So baŋ wel ah Isak, ɓaŋ sor ge tǝ zahwii sǝŋ pǝ cok joŋ syiŋrĩ. 10 Abraham so nyen jol ɓaŋ nyah ka ŋgoŋ wel ahe. 11 Amma Angelos Dǝblii ɗii ko daga coksǝŋ faa: Abraham, Abraham. Abraham zyii: Awai. 12 Pa pee ma coksǝŋ faa: Mo nyen jol ge wo we ɓo ka, mo joŋ fan ki wol ah ka ta. Zǝzǝ̃ǝko me tǝ ɓe, mo ɗuu Masǝŋ, mor mo jiŋ we ɓo matǝ vaŋno nyi me ya. 13 Abraham pak nahnǝn kwo waa gbǝ ciŋ kǝbǝr uu ɓo nǝfahfal ahe. Abraham so kal ge wǝǝ kǝbǝr ah joŋ syiŋ suŋwii ne pǝ cok wel ahe. 14 Abraham ɗii cok ah ne Dǝɓlii-Jire, tǝgba faa: Dǝɓlii ye pa nyi fanne. Mor ah a ɗiira cok ah nai ŋhaa tǝ'nahko.
15 Angelos Dǝblii ɗii Abraham ɓal gwa ah daga coksǝŋ, 16 faa: Me haa zah ne suu ɓe. Mor mo joŋ fan maino, mo jiŋ we ɓo matǝ vaŋno nyi me ya, 17 me ga ẽe mo, me ga ɓoo morsǝ̃ǝ ɓo pǝpãa na ŋwǝǝmǝŋgai, tǝgbana tǝkuuri, morsǝ̃ǝ ɓo ga rera sǝr za syiŋ ɓǝǝra. 18 Za sǝr daŋ ga lwaara ẽe gin morsǝ̃ǝ ɓo, mor mo laa zah ɓe. 19 Abraham pii soo ge wo za yeɓ ahe, so ɓaŋra fahlii kal ge yaŋ Beerseba, ge kaa gŋ.
Wee Nakor
20 Fahfal ɓǝ mai ge faara nyi Abraham: Milka bem wee wǝǝ ɓo nyi naa ma ɓo Nakor, tǝɗii ɓǝǝ a naiko: 21 a ɗii malii ne Us, naa mah ah a ɗii ne Bus, maki ah ɗii ne Kemuel, pah Aram yo, 22 tǝkine Kesed ne Hazo, Pildas, Jidlaɓ ne Betuel. 23 Betuel byaŋ Rebeka. Wee matǝ nama mai daŋ Milka bem ne Nakor naa mah Abraham. 24 Mabyak ah no a ɗii ne Ruma, bem wee ta, tǝɗii ɓǝǝ sye: Teba, Gaham, Tahas, ne Maaka.
© Bible Moundang © Alliance Biblique du Tchad, 1996.
