Dǝɓlii ga ǝ̃ǝ yaŋ Jerusalem
1 Ɓǝ mai Dǝɓlii mo faa ɓo tǝ za Israel o, Dǝɓlii mai mo joŋ coksǝŋ, ako ye joŋ sǝrri, so nyi cee nyi dǝfuu. Ako faa: 2 Me ga joŋ yaŋ Jerusalem tǝgbana yim wo za mai mo kaara ryaŋ ɓo, a ga zwahra, so a ga kiŋ tǝtǝl nyi ra. Ne cok mo ge ryaŋra yaŋ Jerusalem ne sal ɓe, tǝcoŋ yaŋ maluu mo pǝ sǝr Yuda daŋ a ga ryaŋ ra nai ta. 3 Ne cok zah'nan ah mo ge ɓe, me ga joŋ yaŋ Jerusalem na tǝsal mayǝk ahe, za sǝr mai mo tǝ kyeɓ ka ɓaŋ ɓe daŋ, a ga kan syim wol ahe, za sǝr daŋ a ga taira ki ka ruu sal ne ki. 4 Ne cok ah me ga joŋ pǝr sal ɓǝǝ daŋ ɗuura galle, so me ga joŋ tǝtǝl kiŋ za ma yee tǝ pǝr ah ra. Me ga byak za sǝr Yuda, amma me ga rǝ̃ǝ nahnǝn pǝr za syiŋ ɓǝǝra. 5 So morsǝ̃ǝ Yuda ga faara: Dǝɓlii Masǝŋ ma ne swah daŋ nyi swah ɓo nyi zan ah mai mo kaara ɓo yaŋ Jerusalem.
6 Ne cok ah me ga joŋ morsǝ̃ǝ Yuda tǝgbana wii mai moo syen pǝ gǝ̃ǝre wala moo syen 'wah mai sor ah mo zye ɓe. A ɗaŋra za sǝr mai mo kah ɓǝǝ daŋ. Amma za yaŋ Jerusalem ga kaara jam.
7 Ame Dǝɓlii me ga nyi swah nyi za sal sǝr Yuda kaara kacella, so yǝk mai morsǝ̃ǝ David ne za yaŋ Jerusalem moo ga lwaara, ka ga kal mǝ tǝcoŋ za Yuda manyeeki ah ra ya. 8 Ne cok ah Dǝɓlii ga byak za mai mo kaara ɓo yaŋ Jerusalem, koo dǝɓ matǝtǝ̃ǝ ah kǝsyil ɓǝǝ laŋ a ga yea pǝswah tǝgbana David. Morsǝ̃ǝ David ga kal pel ɓǝǝ tǝgbana Angelos Dǝblii, tǝgbana Masǝŋ ne suu ahe. 9 Ne cok ah me ga muŋ za sǝr mai daŋ mo kyeɓ ka ruu sal ne yaŋ Jerusalem.
10 Me ga nyi tǝ'yak ma kwan syak ne tǝ'yak juupel nyi morsǝ̃ǝ David ne za yaŋ Jerusalem. So a ga ẽera Dǝɓ mai mo cuŋra ko pǝ wulli, a ga yera yee tǝl ah tǝgbana za moo yeyee wul we mai mo jol ɓǝǝ vaŋno, a ga yera yee ne mĩi tǝgbana za mai welii ɓǝǝ mo ǝ̃ǝra wǝ ɓo. 11 Ne cok ah yee ga yee yaŋ Jerusalem pǝlli, tǝgbana mo yera yee mor Hadad-Rimmon pǝ cok tǝforoŋ Megiddo. 12 Za yaŋ camcam mo pǝ sǝr ah daŋ a ga yera yee camcam daŋ ta, za ma morsǝ̃ǝ David a ga yera yee syak ɓǝǝ cam, ŋwǝǝ ɓǝǝ laŋ a ga yera yee cam, za morsǝ̃ǝ Natan a ga yeera cam, ŋwǝǝ ɓǝǝ laŋ ga yeera cam. 13 Za ma morsǝ̃ǝ Lewi ne ŋwǝǝ ɓǝǝra, za morsǝ̃ǝ Syimai ne ŋwǝǝ ɓǝǝra, 14 tǝkine za ma morsǝ̃ǝ za camcam daŋ, a ga yera yee camcam daŋ, ŋwǝǝ ɓǝǝ laŋ ga yera yee cam ta.
© Bible Moundang © Alliance Biblique du Tchad, 1996.
