Husai lee ɓǝ faa Akitofel ge sǝŋ
1 Nǝn fahfal ah nje, so Akitofel faa nyi Absolon: Mo soɓ me syen za ujenere jemma tǝ gwa ka me foo mor David ne suŋ nyẽeko sǝ. 2 Ka me ge tǝl ah ne ko, mor a gaɓ magaɓɓe, ka yea pǝswah ya. Me ga re gal nyi ko, so za ma ne ki daŋ a ga ɗuura kalle, me ga i goŋ syak ahe. 3 Me ga tai za daŋ ge wo ɓo ne ko tǝgbana woi mo gin wo wor ahe, mor mo tǝ kyeɓ dǝɓ vaŋno ye ka in to, tǝcoŋ za daŋ kaara jam. 4 Ɓǝ ah 'nyah suu Absolon tǝkine zaluu Israel daŋ.
5 Ne cok ah Absolon so faa: Na ɗii Husai Arkiyo ka na laa ɓǝ mai ako mo ne ka faa ɗao ta. 6 Husai ge wo Absolon, so Absolon faa nyi ko: Akitofel faa ɓǝ nai sye, nai sye. Ko na ga joŋ ɓǝ mai mo faako no ne? Ɓǝ ah mo ka nai ya ɓe, ka mo faa ma ɓo ɗao ta.
7 Husai zyii zah Absolon faa: Ɓǝ mai Akitofel mo faa ɓo zǝzǝ̃ǝko ka pǝsãh ya. 8 Mo tǝ pa ɓo ne zan ah ɓe, ara pǝswahe, so ɓaŋra kpãh ɓo tǝgbana maɓol mai mo woora wee ah ɓo cokki. Pa ɓo laŋ dǝɓ tan ruu sal o, ka swǝ kǝsyil zan ah laŋ ne suŋn a. 9 Zǝzǝ̃ǝ laŋ a muŋ suu ah ma pǝ yii wala pǝ cok maki ahe. So ne tǝtǝŋ ruu sal za biŋ mo kal wuk kǝsyil za man ɓe, ɓǝ ah ga myahe, a faara, ikra za mor Absolon ɓe. 10 So koo dǝɓ mai mo dǝwor ye 'manna 'manna zahzyil ah mo tǝgbana mǝ ɓol laŋ, a ga wuu wãkkǝkǝ. Mor za Israel daŋ tǝra ɓe, pa ɓo dǝwor o, za mai mo ne ki daŋ laŋ za wǝǝ ye ra. 11 Ma ɓee, ɓǝ faa ɓe sye: Za Israel daŋ daga Dan ŋhaa Beerseba mo taira ge wo ɓo, ka mo yeara tǝgbana tǝkuu zahbii. Ka amo ne suu ɓo laŋ mo ge salle. 12 Ka na ge lwaa ko pǝ cok ah mo gŋ ka na ge tǝl ah tǝgbana mahm moo 'mǝr ga tǝ sǝrri. Ka ako tǝkine za mai mo ne ki daŋ mo coŋ dǝɓ vaŋno ka. 13 So mo ka kal ge dan yaŋ maki ah ɓe, ka za Israel daŋ mo woora sal ge yaŋ ah ne ko, ka mo kwakra yaŋ ah ge pǝ el ne ka koo tǝsal vaŋno laŋ mo coŋ gŋ ka.
14 Absolon tǝkine za Israel daŋ faara: Ɓǝ mǝ Husai Arkiyo pǝ'nyah kal mǝ Akitofel ɓe. Amma Dǝɓlii ye joŋ ɓǝ ah ɓo ka ɓeɓ ɓǝ faa Akitofel mor ka ɓǝɓe' mo ge tǝ Absolon.
Ge laira David, so ɗuu kalle
15 Husai faa nyi Sadok ne Abiatar za joŋzahsyiŋrĩ: Akitofel faa nyi Absolon ne za Israel daŋ nai sye, nai sye. Ame laŋ me faa naino naino. 16 Zǝzǝ̃ǝko we pepee ge wo David gwari we faa nyi ko mo swǝko pǝ cok ma tǝgboŋ ah ka, amma mo yee ge nǝzakǝŋhaa gwari, mor ka mo lwaara i goŋ ne za mai mo ne ki ka.
17 Yunatan we Abiatar ne Akimaas we Sadok a ga kaara En-Rogel, cẽecẽe mabyak ki no a ga faa ɓǝ nyi ra. So a ga keera ɓǝ ah nyi goŋ David, mor ka cuura suu ɓǝǝ ga tǝgǝǝ yaŋ ɗǝ ya. 18 Amma we tǝbanna ki no ge kwo ra, so ge faa ɓǝ ɓǝǝ nyi Absolon. Amma za rai gwa daŋ hǝǝra ge dai yaŋ dǝɓ Bakurim, dǝɓ ah cii lak bii ɓo zahpiicelle, so ɗǝrra ge pǝ lak ahe. 19 Mawin ɓaŋ fan coo zah lak bii coo zah lak ah ne ko, so woiŋ sor ɗuu tǝl ahe, mor ka za mo kan syee ah ka. 20 Za yeɓ Absolon danra ge wo mawin ɓǝr yaŋ fiira ko faa: Akimaas ne Yunatan kẽne? Mawin zyii zah ɓǝǝ faa: Ge pǝ̃ǝra nyee kal fah pǝ el ɓe. Kyeɓra ra, amma lwaara ra ya. So pii soora kal ge yaŋ Jerusalem.
21 Fahfal ah mo kalra o, Akimaas ne Yunatan yeera gin pǝ lak bii kalra ge faa ɓǝ ah nyi goŋ David, faara: Mo urri, mo hǝǝ yee bii gwari, mor Akitofel faa ɓǝ ɓo tǝ ɓo nai sye, nai sye. 22 David tǝkine za mai mo ne ki daŋ urra yee el Yordan. Ne cok zah'nan mo cee daŋ, coŋ dǝɓ ma bai yee el Yordan koo vaŋno ya.
23 Ne cok Akitofel mo ge kwo mo zyiira ka syeera mor ɓǝ faa ah ya, so baŋ tǝgaŋ nyi korro ah ur kal ge cok kal ah fah yaŋ ahe. Ge faa ɓǝ nyi za yaŋ ahe, fahfal ah kal ge swǝ̃ǝ suu ah wuu, ge ciira ko pǝ pal pamme.
24 David ge Makanayim. Ne cok ah Absolon yee el Yordan tǝkine za Israel mai mo ne ki daŋ. 25 (Absolon ɓaŋ Amasa kan dǝɓlii sal ne pǝ cok Joaɓ. Amma Amasa we dǝɓ ma ɗii ne Yeter, ako ye ban Ismael mai mo ɓaŋ Abigail mǝlaŋ Nahas naa mah Seruja mah Joaɓ.) 26 Za Israel ne Absolon ge ɗǝrra pǝ sǝr Giliat.
27 Ne cok David mo ge dai Makanayim, Sobi we Nahas ma Rabba yaŋ Ammonien ne Makir we Ammiel ma Lodebar tǝkine Barzilai dǝɓ Giliat ma Rogelim, 28 gera ne faswulli, tahsah, ciiri, alkamaari, zyemĩirĩ, summi, sor raani, ǝǝ, tǝkine swaa mayakke, 29 tǝnjwǝǝre, nǝmmi, ne pǝsǝ̃ǝre, tǝkine nǝm wonni. Nyira nyi David tǝkine za mai mo ne ki, mor ka mo rera. Mor faara: Za mai kǝsyicokki, ara ne koŋne, gaɓra ɓo, so koŋ bii i ra ɓo ta.
© Bible Moundang © Alliance Biblique du Tchad, 1996.
