Fakwan yaŋ Masǝŋ ma pelle
(Eze 40–48)Masǝŋ ɓaŋ Ezekiel ge yaŋ Jerusalem ne ko
1 Ne zah'nan jemma pǝzyil syii mafuu, ka syii jemma gwa tǝtǝl dappe ah ru pǝ byak zah sǝr za yo, so ka syii jemma tǝtǝl nai ah mai yaŋ Jerusalem mo lee ɓo yo. Ne zah'nan ah me laa swah jol Dǝɓlii mo ge tǝtǝl ɓe, ɓaŋ me. 2 Pǝ fakwan ah Masǝŋ ɓaŋ me kal ge pǝ sǝr Israel ne ko, ge kan me tǝtǝl waa mawah ahe, ame kwo fan ki gŋ pel ɓe, a na yaŋ malii ahe. 3 So zaŋ me tǝɓ ge kah ah gwari, me so kwo dǝɓ gŋ a sãh tǝgbana vãm syẽ. Dǝɓ ah ɓaŋ suu ne kǝndaŋ ma lii fan ɓo jolle, uu ɓo zahfah ne ko. 4 Faa nyi me: We dǝfuu, mo syii nahnǝn tǝkine sok daŋ kpẽe ka mo laa ɓǝ fan mai daŋ me tǝ ga cuu nyi mo, me ɓaŋ mo ge ɓo nyee ne mor ɓǝ ahe, ka mo so faa ɓǝ mai mo kwo ɓo daŋ nyi za Israel.
Zahfah ma morcomzah'nanne
5 Fan mai me kwo: me kwo yaŋ Masǝŋ, so korvuu ryaŋ ɓoo ɓo kǝsyilli. Dǝɓ ah ɓaŋ suu lii fan ɓo jolle, wah ah a meetǝr sai, lii korvuu ah ne ko, wah ah ma ga sǝŋ ne yǝk ah daŋ a meetǝr sai sai. 6 So syee kal ge wo zahfah ma fah kǝmorcomzah'nanne, yee tǝ cok kan ɓal ah ra, so lii zahfah ahe, ɗǝk ah ma ga sǝŋ a meetǝr sai. 7 Nǝn zahfah ah nǝkǝŋhaa ahe, fahlii no gŋ, kah fahlii ah nǝjokǝsãhe, yaŋ za ma byak cok no gŋ sai, a nǝfah jokǝlǝɓai sai ta, nyah yaŋ ah ra daŋ, a meetǝr sai sai, korvuu mai mo kǝsyil ah ra, yǝk ah a meetǝr gwa ne raita, meetǝr gwa ne raita daŋ. Nǝn yaŋ ma byak cok ah ra nǝkǝŋhaa ahe, fahlii maki ah no gŋ wah ah a meetǝr sai, fahlii ah dǝɓ syee gŋ ga ɓǝr yaŋ malii mai mo ɓyaŋ ki ɓo ne yaŋ Masǝŋ. 8-9 Dǝɓ ah so lii ɓǝr yaŋ ahe, lwaa ɗǝk ah ma ga sǝŋ a meetǝr nai. Korvuu ah ma nefah kǝlalle, yǝk ah a meetǝr vaŋno a kǝsyil zahfah ahe, cok ah mai mo kah yaŋ Masǝŋ gwari yo. 10 (Yaŋ za ma byak cok mo kah fahlii nǝkǝita nǝkǝita, a zahki gwa daŋ, korvuu mai mo kǝsyil ah ra laŋ a zahki ta.)
11 Fahfal ah dǝɓ ah so lii fahlii ahe, 'ah ah a meetǝr yea ne raita. So cok mai mo kǝsyil cok mai dǝɓ moo gbǝr zahfah gŋ, a meetǝr dappe. 12 Pel yaŋ za ma byak cok ah vaŋno vaŋno daŋ korvuu macõo ah ra no gŋ, wah ah ra a raita meetǝr raita meetǝr, yǝk ah a nai ta. (Nyah yaŋ ah ra meetǝr sai sai zahki daŋ.) 13 So dǝɓ ah lii 'ah cok ahe, tǝŋ daga fahfal yaŋ za ma byak cok maki ah vaŋno ŋhaa ge dai wo yaŋ za byak cok maki ah nǝfah kah fahlii, lwaa a meetǝr jemma tǝtǝl gwa ne raita, yaŋ ah ra jiŋ zahpel ɓo nyi ki. 14 So yaŋ malii ah no pǝ cok mai fahlii mo ge i zah ɓo gŋ ka ga zahpiicel yaŋ Masǝŋ, lii 'ah ah a meetǝr jemma. 15 Wah fahlii ma dan ga yaŋ ahe, tǝŋ daga wo zahfah ma fah kǝlal ŋhaa ka ga dai wo yaŋ malii ko, a meetǝr jemma gwa tǝtǝl dappe. 16 Wo korvuu yaŋ ah ra nǝfah kǝlal daŋ zahtǝwoo manyee ah ra gea ɓo gŋ so ne wo korvuu mai mo kǝsyil yaŋ ah ra daŋ. So wo korvuu yaŋ ah nǝfah kǝɓǝr kah zahfahe, ɗeara foto kpuu dabonooje ra ɓo gŋ.
Zahpiicelle
17 So dǝɓ ah zaŋ me ge zahpiicel yaŋ Masǝŋ ne ko, yaŋ ki ra no vuu ɓo gŋ jemma sai faɗa, ɓǝr ah camcam, yaŋ ah ra mgbãa ki ɓo ne vuu yaŋ, so vuura cok maswah ah ɓo no pel yaŋ ah ra ne tǝsalle, 18 ryaŋ zahpiicel ah daŋ ne ɓoo kǝsyilli, zahpiicel ah mo dam ɓo, yee ge sǝŋ dai ma kǝɓǝr yaŋ ya.
19 Zahfah maki ah no vuu ge ɓo sǝŋ nje, fahlii pǝ̃ǝ ɓo gŋ kal ge zahpiicel yaŋ Masǝŋ. Dǝɓ ah lii cok ma kǝsyil zahfah yaŋ matǝ gwa ko, lwaa a meetǝr jemma dappe.
Profetoen ma fahsǝŋ
20 So dǝɓ ah lii zahfah ma fahsǝŋ ma ga zahɓel yaŋ Masǝŋ. 21 Yaŋ za byak cok mai mo kah fahlii nǝkǝi sai nǝkǝi sai, so ne korvuu mai mo kǝsyil yaŋ ah ra, ne yaŋ malii ah daŋ a zahki ne ma zahfah ma morcomzah'nanne. Wah zahfah ah joŋ meetǝr jemma gwa tǝtǝl dappe, 'ah ah meetǝr jemma tǝtǝl gwa ne raita. 22 Yaŋ malii ko, ne zahtǝwoo ah ra, tǝkine kpuu dabonooje mai foto ah mo ɗea ɓo wo suu yaŋ daŋ a tǝgbana ma zahfah ma fah morcomzah'nan ta. So cok kan ɓal no camcam rǝŋ, mor ka yee ga zahfah ah ne ko, yaŋ malii ah no zahɓel pǝ cok mai fahlii mo ge i zah ɓo gŋ. 23 Ka ɓyaŋ ki ne zahfah ma fahsǝŋ jaŋjaŋ, fahlii ma ga zahpiicel yaŋ Masǝŋ no gŋ, tǝgbana mai mo gŋ ma fah morcomzah'nan ta. Dǝɓ ah lii cok ma kǝsyil zahfah yaŋ matǝ gwa ko, lwaa a meetǝr jemma dappe.
Zahfah ma fah morkǝsǝŋ
24 Fahfal ah dǝɓ ah zaŋ me kal ge laa ah ma morkǝsǝŋ ne ko, me ge kwo zahfah maki ah gŋ, so lii zahfah ahe, zahfah ah a zahki ne manyeeki ah ra kŋ ta. 25 Zahtǝwoo wo yaŋ ma kah zahfah ah tǝgbana manyeeki ah ra ta. Wah zahfah ah joŋ meetǝr jemma gwa tǝtǝl dappe, 'ah ah a meetǝr jemma tǝtǝl gwa ne raita. 26 So cok kan ɓal no camcam rǝŋ, mor ka yee ga zahfah ah ne ko, yaŋ malii ah no zahɓel yaŋ Masǝŋ pǝ cok mai fahlii mo ge i zah ɓo gŋ. Kpuu dabonooje mai mo ɗeara foto ah ɓo wo suu yaŋ no kah fahlii ahe. 27 Ka ɓyaŋ ki ne zahfah ah jaŋjaŋ, fahlii maki ah no ka ga fah kǝ zahpiicel yaŋ Masǝŋ. Dǝɓ ah lii cok ma kǝsyil zahfah yaŋ matǝ gwa ma fah morkǝsǝŋ ko, lwaa a meetǝr jemma dappe.
Zahfah ma ga piicel ma fah morkǝsǝŋ
28 Dǝɓ ah zaŋ me syee zahfah ma fah morkǝsǝŋ ah kal ge zahpiicel ne ko, so lii zahfah ahe, lwaa a zahki ne zahfah ma fah kǝlal ta. 29-30 Yaŋ za byak cok ah ne yaŋ malii ah tǝkine korvuu mai mo kǝsyil ah daŋ a zahki ne ma zahfah ma fah kǝlal ah ra daŋ. Zahtǝwoo wo yaŋ ah ra ne lii ah daŋ, a wo yaŋ malii kŋ ta. Wah zahfah ah joŋ meetǝr jemma gwa tǝtǝl dappe, 'ah ah a meetǝr jemma tǝtǝl gwa ne raita. 31 Yaŋ malii ah no zahɓel ah lalle, ɗeara foto kpuu dabonooje ɓo wo suu yaŋ ah ma kǝsyil kah fahlii ahe, cok kan ɓal ah ra ma yee ga wo zahfah ah ne a nama.
Zahfah ma dan ga piicel ma fah morcomzah'nanne
32 Dǝɓ ah zaŋ me syee zahfah ma fah morcomzah'nan ne kal ge zahpiicelle, so lii zahfah ahe, lwaa a zahki ne zahfah maki ah ra ta. 33 Yaŋ za byak cok ah ne yaŋ malii ah tǝkine korvuu mai mo kǝsyil ah daŋ, a zahki ne ma zahfah maki ah ra ta. Zahtǝwoo yaŋ ah ra ne lii ah daŋ, a wo yaŋ maki kŋ ta. Wah zahfah ah joŋ meetǝr jemma gwa tǝtǝl dappe, 'ah ah a meetǝr jemma tǝtǝl gwa ne raita. 34 Yaŋ malii ah no zahɓel ah lalle. Ɗeara foto kpuu dabonooje ɓo wo suu yaŋ ah ma kǝsyil kah fahlii ahe, cok kan ɓal ah ra ma yee ga wo zahfah ah ne a nama.
Zahfah ma fahsǝŋ ma dan ga piicelle
35 So dǝɓ ah zaŋ me kal ge zahfah ma fahsǝŋ ne ko, so lii zahfah ahe, lwaa a na ma kǝsyil ra kŋ ta. 36 Yaŋ za byak cok ra no gŋ, so korvuu cea tǝgǝǝ ah ɓo, yaŋ malii ah kŋ laŋ gŋ, zahtǝwoo wol ah ne lii ah daŋ. Wah ah meetǝr jemma gwa tǝtǝl dappe, 'ah ah meetǝr jemma tǝtǝl gwa ne raita. 37 Yaŋ malii a zahɓel ah lalle. Ɗeara foto kpuu dabonooje ɓo wo suu yaŋ ah ma kǝsyil kah fahlii ahe, cok kan ɓal ah ra ma yee ga wo zahfah ah ne a nama.
Yaŋ ma kah zahfah ma fahsǝŋ
38 Yaŋ maki ah no zahɓelle, yaŋ ah mgbãa ki ɓo ne zahfah ma fahsǝŋ ma ga zahpiicelle, zahfah yaŋ ah a kah zahfah yaŋ malii ko, a vãhra faɓal ma mor joŋ syiŋ suŋwii gŋ. 39 Ɓǝr yaŋ malii ko, taabǝl no gŋ nai, a ɓǝr yaŋ ah nǝkǝi gwa, a nǝkǝi laŋ gwa ta. A ŋgomra faɓal ma joŋ syiŋ suŋwii wo Masǝŋ tǝl ahe, a ŋgomra fan ma mor joŋ syiŋ ma ɓaŋ faɓe' ga lal camcam gŋ ta. 40 Kah yaŋ malii nǝfah kǝlal laŋ, taabǝl no gŋ nai ta, taabǝl gwa a kah zahfah ma fahsǝŋ nǝkǝino, maki ah ra gwa laŋ a nǝkǝki ahe. 41 Taabǝl ah ra tai daŋ a nama, a ŋgomra faɓal ma mor joŋ syiŋ tǝtǝl ahe, a nǝkǝɓǝr yaŋ nai a nǝfah kǝlal nai ta. 42 Taabǝl matǝ nai mo rǝk ɓo mor zyeɓ fan ma mor joŋ syiŋ suŋwii gŋ, zyeɓra ɓo ne tǝsalle, wah ah i jol ɓo vaŋno ne raita, giŋ ah i jol ɓo vaŋno, a rǝkra faɓal mai mo ŋgomra ɓo mor joŋ syiŋ daŋ tǝ taabǝl ah ra. 43 Zyeɓra fan ɓo tǝgbana 'ah jolle, ɓaŋra kah taabǝl ah ra ɓo ne ko, nǝǝ mai moo nyira mor joŋ syiŋ ne daŋ, a rǝkra tǝtǝl taabǝl ah ra.
44 So dǝɓ ah zaŋ me kal ge zahpiicel ne ko, yaŋ ki ra no gŋ gwa, maki ah a kah zahfah ma fahsǝŋ, jiŋ zahpel ɓoo ge ɓo fah morkǝsǝŋ, yaŋ maki ah a kah zahfah ma fah morkǝsǝŋ, jiŋ zahpel ɓoo ge ɓo fahsǝŋ. 45 Dǝɓ ah so faa nyi me, yaŋ mai mo jiŋ zahpel ɓoo ge ɓo fah morkǝsǝŋ, a mor ka za ma joŋ zahsyiŋ pǝ yaŋ Masǝŋ mo kaara gŋ. 46 Yaŋ mai mo jiŋ zahpel ɓoo ge ɓo fahsǝŋ, a mor ka za ma joŋ zahsyiŋ ma joŋ yeɓ tǝ cok joŋ syiŋ mo kaara gŋ. Kǝsyil za ma mor ban Lewi daŋ, sai za ma morsǝ̃ǝ Sadok ye ne fahlii ka dan ga pel Dǝɓlii ka joŋ yeɓ ah to.
Zahpiicel ne yaŋ Masǝŋ
47 Dǝɓ ah so lii zahpiicel ah mai mo ne nyah ah nai daŋ, lwaa a meetǝr jemma dappe, yaŋ Masǝŋ nǝfah kǝmorcomlil ahe, so cok joŋ syiŋ pel ahe. 48 So zaŋ me kal ge zahfah yaŋ Masǝŋ ne ko, lii zahfah nǝkǝita nǝkǝita, so lwaa yǝk ah mai a meetǝr gwa ne raita, mai laŋ a nai ta, 'ah ah meetǝr rǝŋ, kah zahfah ah yǝk ah mai a meetǝr vaŋno ne raita, ma kǝki ah laŋ a nai ta. 49 Cok mai dǝɓ moo syee gŋ ga zahfah yaŋ, wah a meetǝr jemma, 'ah ah meetǝr yea, wǝǝdǝǝ no kǝsyil ah gwa, a kah zahfah nǝkǝi vaŋno, nǝkǝi laŋ vaŋno ta.
© Bible Moundang © Alliance Biblique du Tchad, 1996.
