Dǝɓlii lai za sǝr goŋ Israel
1 Ɓǝ pǝgaɓ tǝ sǝr goŋ Israel! Yǝk ah tǝ vǝr tǝgbana njok ma joŋ ne fãi fan matǝ zaluu ah ma tǝǝ ne yimmi. Tahra nǝm fuŋ 'nyah ɓo wo suu, so yim ik ra, swah ɓo sǝŋ ne ko. 2 Dǝɓlii no ne dǝɓ maswah mayǝk ah ka gin ruu sal ne ra, a ga ge tǝgbana syaŋ ma gin ne zyakke, tǝgbana zyak ma ɓeɓ fanne, na bam mai moo tan pǝ'man bii ah moo nyiŋ cokki. 3 A ga dahra zaluu Israel ma zwah yim yii suu ne rai ga sǝŋ ne ɓalle. 4 Yǝk zaluu rai a ga vǝr tǝgbana lee kpuu goyaɓ mai moo hǝǝ ruŋ ma ne zah gwahl ɓaa dǝɓ mo kwo mo ɗǝǝ ge jol ɓe, moo ren ne pel sǝ.
5 Zah'nan ah no ginni, ne cok ah Dǝɓlii ma ne swah daŋ a ga yea tǝgbana njok yǝk mai moo sǝsãh wo zan ah mai mo coŋra ɓo sǝŋ no. 6 A ga cuu fahlii ŋgoŋ kiita masãh ah nyi za mai mo tǝ joŋra yeɓ lakaali, a ga nyi swah nyi za mai za syiŋ ɓǝǝ mo ge ryaŋ yaŋ ɓǝǝ ɓo ka nĩi ra ga lalle.
Esaia ne profetoen sǝr Yuda ma zwahra yimmi
7 Za sǝr Yuda a zwahra yimmi, koo profetoen ne za joŋzahsyiŋ ah laŋ a zwahra laŋ ne coŋgu coŋgu, a zwahra pǝlli ŋhaa a kal tǝtǝl ɓǝǝra. Profetoen a zwahra yim pǝlli ŋhaa ka gak tanra mor ɓǝ fakwan mai Dǝɓlii mo pee ge ɓo ya, za joŋzahsyiŋ a zwahra pǝlli ŋhaa ka gak woŋra tǝgǝǝ ɓǝ mai za mo gera ɓo wo ɓǝǝ ne ya. 8 Taabǝl mai moo kaara zah ah daŋ a zwǝǝra zah baa gŋ kǝrkǝr, cok kol ka kwan gŋ biŋ ya.
9 A mgbǝrra ɓǝ tǝ ɓe faa: Dǝɓ mai a ga cuu fan sye nyi zune? Azu ye tǝ 'yah ɓǝ faa ah sye ne? Ɓǝ ah ra a pǝsãh mor wee nyee mai mo soɓra won ɓo to! 10 A kyeɓ ka cuu ɓǝ lai nyi na, mai a naino, fahlii mai a nai sye, ɓǝ mai a nai sõo.
11 Ko we zyii ka laa ɓǝ faa ɓe ya ɓe, Masǝŋ ga pee za gwǝǝ gin cuu fan nyi we ne zah mai we tǝ taa ya. 12 Dǝɓlii nyi 'yak nyi we daŋ ka we 'yakke, amma we zyii ka laa ɓǝ faa ah ya. 13 Mor ah Dǝɓlii tǝ ga cuu fan nyi we, a faa: Ɓǝ lai mai a naino, fahlii mai a nai sye, ɓǝ mai a nai sõo. So we ɓaŋ ɓal ka syee ɓe daŋ, we ga leere. Syim ga kan wo suu ɓiiri, mǝmmǝǝ ga gbah we, we ga ciŋ daŋgai.
Tǝsal nyah yaŋ Sion
14 Awe za ma yii suu mai we kaa goŋ ɓo yaŋ Jerusalem tǝ zan ahe, we laa ɓǝ faa Dǝɓlii mo tǝ faani. 15 Awe yii suu mor we foo we gbǝ zah ɓo ne wulli, we zyeɓ ɓǝ ɓo ne cok mai za wul mo gŋ. We faa we tǝ ɓo njaŋ ne cok ɓeɓ mo ge ɓe, ka juu we ya, mor we soɓ suu ɓii uu ɓo tǝ ber ne vǝrvǝr ka mo byakra we. 16 Mor ah Dǝɓlii faa: Me kan tǝsal nyah yaŋ ɓo Sion, a pǝswahe, ka laŋ ya. Me kan tǝsal maswah ah ma'ah ɓo, mai ɓǝ mo ŋwǝǝ ɓo tǝl ah faa: Dǝɓ mo nyiŋ ko ɓe, ka ɓee tǝ ɓal a. 17 Me ga joŋ goŋga yea tǝgbana vãm mai za vuu yaŋ moo liira yaŋ ne ko, njaŋ ga yea tǝgbana suu ma lii ɓǝrak yaŋ. Amma syaŋ ga ɓeɓ cok ul ɓǝǝ matǝ berre, so bii ga ɓaŋ jam mai mo uura ɓo tǝl ah kal ne ko.
18 Gbanzah mai we gbǝ ɓo ne wulli a ga ɓeɓɓe, ɓǝ mai we zyeɓ ɓo ne cok mai za wul mo gŋ, ka ga uu ya. Ne cok ɓeɓ mo ge ɓe, ɓǝ ah ga jok we. 19 Koo ne cok fẽene daŋ gaɓ ah mo ge ɓe, a gin gaɓ we. A ga ge zah'nan Masǝŋ daŋ, com ne suŋ daŋ ka pee bai gin a. Ne cok ɓǝ mafuu ah mo pǝ̃ǝ gin wo Masǝŋ ge ɓe daŋ, gal ga re we pǝlli. 20 Ɓǝ ah a ga joŋ wo ɓii tǝgbana ɓǝ kikiŋ mai wee faani: Dǝɓ ma kyeɓ ka swan tǝ ɗee macõo ahe, ka gak syel suu gŋ ya, godel manyiŋ ah ka gak rii suu tǝ ɗee ya. 21 Dǝɓlii ga ur ruu sal tǝgbana mai mo joŋ tǝwaa Parasim ne pǝ cok tǝforoŋ ma Gibeon, mor ka joŋ fan mai moo yea gǝriŋ wo zana, mai mo foo ko ɓo ka joŋni. A ga joŋ yeɓ ah baa ga cok ahe, yeɓ ah a gǝriŋ.
22 We syak ɓǝ mai me lai we ɓo ne syak ka! We syak ɓǝ ah ɓe, a ga yea pǝgaɓ ka we ǝ̃ǝ. Mor me laa Dǝɓlii ma ne swah daŋ faa ɓǝ ɓeɓ sǝr ɓo ne lii ah daŋ.
Fatan Masǝŋ
23 We laa ɓǝ mai me tǝ faani, we syii sok mor ɓǝ mai me tǝ faa nyi we. 24 Pa pǝpǝǝ mai mo tǝ 'yah ka ruu nah fanne, a pǝpǝǝ cẽecẽe sǝ ne? A yea ma ne zyeɓ sǝr so ɗee tǝ ɗee ga pel cẽecẽe sǝ o ne? 25 Ne cok mo zyeɓ sǝr ge zahki vǝr ɓe, a ruu nah anis ne kumin gŋ. So a ruu alkamaari ne sor pǝ cok mai mo ŋgom cok ah ɓo mor ahe, a ɓoo nãa syiŋ kah 'wah ahe. 26 Tǝ fahlii ka joŋ yeɓ ah ɓe, mor Masǝŋ ye cuu yella ah ɓo nyi. 27 Ka ɓaŋ fan mayǝk ah ɗuu anis wala kumin ne ya, amma a ɗuu ne kǝndaŋ magwah ahe. 28 Ka ɗuu sor ah ka mo laŋ bilbil a, a ɓaŋ dǝǝ syee tǝtǝl ah ne kpuu mayǝkki, amma ka dah ya. 29 Fatan mai daŋ gee wo Dǝɓlii ma ne swah daŋ ge. Ɓǝ mai Masǝŋ ye mo zyeɓ daŋ, fatan ah a pǝ'manne, cẽecẽe ɓǝ ah daŋ a joŋ ga cok ahe.
© Bible Moundang © Alliance Biblique du Tchad, 1996.
