1 Amma zǝzǝ̃ǝko awe za Jerusalem, we tai sooje ɓiiri, mor za syiŋ man ge ryaŋra na ɓo, tǝ ga ira goŋ za Israel!
Masǝŋ faa ɓǝ goŋ mai moo ga gee Betlehem ge
2 Dǝɓlii faa: Amo Betlehem-Efrata amo ye yaŋ malaŋ ah kǝsyil yaŋ sǝr Yuda daŋ, amma me ga joŋ Dǝɓ ma kaa goŋ Israel pǝ̃ǝ gin wo ɓo ge, Dǝɓ mai morsǝ̃ǝ ah mo ur ɓo gin gŋ pǝtãa ge yo.
3 So Dǝɓlii ga soɓ zan ah ga jol za syiŋ ɓǝǝ ŋhaa sai ka mawin mai mo tǝ ga byaŋ wel ah lwaa byaŋ ɓe. Tǝcoŋ wee pah ah mai mo myah ɓo pǝ sǝr camcam a ga pii soora ge wo za Israel faɗa. 4 Ne cok Dǝɓ ah mo ge ɓe, a ga kaa goŋ tǝ zan ah ne swah mai mo ur gin wo Dǝɓlii ge, tǝkine yǝk Dǝɓlii Masǝŋ ah ne suu ahe. Zan ah ga kaara jam, mor za sǝr daŋ a ga tǝra ɓǝ yǝk ahe. 5 A ga joŋ jam yea wo sǝrri.
Ə̃ǝ tǝkine kiita
Ne cok Asirien moo ga gera ka ren sǝr man tǝkine ɓeɓ cok mana, na ga pee zaluu man maswah ah ka ruu sal ne ra. 6 A ga ǝ̃ǝra na gin jol Asirien, a ga rera sǝr ɓǝǝra.
7 Tǝcoŋ za Israel mai mo coŋra ɓo no, Dǝɓlii ga joŋ ɓǝ ah yea wo za sǝr tǝgbana mahm mawok mai moo nǝnni, a yea tǝgbana bii bam mai moo yea ma tǝ goo kpuu. A ga soɓra suu ɓǝǝ wo Dǝɓlii, ka soɓra wo dǝfuu yao. 8 Tǝcoŋ za Israel manyeeki ah a ga yeara kǝsyil za sǝr camcam tǝgbana ɓol moo kyeɓ nǝǝ pǝ gǝ̃ǝ ka gban renne, wala moo ga pǝ cok mai moo piira fan gŋ. Mo ge kǝsyil pǝsǝ̃ǝ mo zoo tǝ ge tǝ ɓǝǝ mo gbah ra ɓe, a pahl ra myah vaŋno vaŋno, ma ɗuu ǝ̃ǝ ka yea ya. 9 Za Israel ga nĩira za syiŋ ɓǝǝra, a ga vǝrra ra daŋ.
10 Dǝɓlii faa: Ne cok ah me ga vǝr ɓǝ pǝr ɓii ga lalle, me ga ɓeɓ muŋta sal ɓii ra ta. 11 Me ga hah yaŋ maluu pǝ sǝr ɓii ga sǝŋ, me ga dah yaŋ ɓii ma ne fan sal ah ra. 12 Me ga vǝr ɓǝ ẽe ciŋ ɓii mai wee ẽere, me ka ga soɓ ɓǝ kǝndaŋ yea kǝsyil ɓii yao. 13 Me ga vǝr masǝŋ ki ra, tǝkine cok mai we zyeɓ ɓo wee juupel gŋ. We ka ga yea ne koŋ ka juupel wo fan mai we zyeɓ ne jol ɓii yao. 14 Me ga nǝǝ kpuu mai wee kwan daŋdaŋ pǝ sǝr ɓii ga lalle, me ga ɓeɓ yaŋ ɓii maluuri. 15 Me ga ɓaŋ kpãh pǝ'man faŋ val ne tǝ za sǝr mai mo zyiira ka laa zah ɓe ya.
© Bible Moundang © Alliance Biblique du Tchad, 1996.
