JOSWA 2 - Bible Moundang (MUA)

Peera za foo sǝr ge Jeriko

1 Joswa we Nun pee za foo sǝr gwa pǝ muŋ daga Akasia ka foo sǝr Kanaan, so faa nyi ra: We foo sǝr Jeriko ne yaŋ ah daŋ. Kalra ge gŋ, ge danra yaŋ mawin tǝkoi ki no a ɗii ne Rahaɓ. Swahra gŋ. 2 Ge faara nyi goŋ Jeriko: Za ki kǝsyil za Israel gera nyee ne suŋ ko ka foo sǝrri. 3 So goŋ Jeriko pepee faa nyi Rahaɓ: Mo soɓ za mai mo ge ɗǝrra ɓo yaŋ ɓo pǝ̃ǝ ge lalle, mor gera ɓo ka foo sǝrri. 4-6 So mawin zyii faa: Goŋga yo, zan ah gera yaŋ ɓe ɓe, amma urra gin kẽne, me tǝ ya. Amma ne cok suŋ mo foo o, mo tǝ ga coora zahfah yaŋ, pǝ̃ǝra kalle, me tǝ cok mai mo kalra ga gŋ ya. We hǝǝ foo mor ɓǝǝ gwari mor we ga lwaa ra. Amma ka woo za matǝ gwa yee ge tǝ yaŋ sǝŋ ne ra ge mok ra mor fãa mai mo rǝk ɓo gŋ ɓe. 7 Za mai goŋ mo pee ra, foora mor ɓǝǝ kal ge fah kah el Yordan pǝ cok mai moo yeera bii gŋ. Za ma foo mor ɓǝǝ mo pǝ̃ǝra kal o, coora zahfah fahfal ɓǝǝra.

8 Ka za ma foora sǝr ɓah swahra sǝŋ ya ba, Rahaɓ yee ge wo ɓǝǝ tǝ yaŋ sǝŋ. 9 Faa nyi ra: Me tǝ ɓe, Dǝɓlii nyi sǝr mai nyi we ɓe. Gal ɓii re ru ɓe. Za ma haira sǝr mai daŋ tǝ coora pel ɓii coo ne galle. 10 Mor ru laa ɓǝ mai Dǝɓlii mo yak mabii Syẽ pel ɓii ne cok we pǝ̃ǝ gin sǝr Egiɓ ɓe, tǝkine ɓǝ fan mai we joŋ wo za goŋ Amorien matǝ gwa kah el Yordan nǝzakǝŋhaa ɓe, Sihon ne Og, we muŋ ra tǝɗe'. 11 Ru laa ɓǝ ahe, zahzyil nǝǝ ru, koo swah ka wo dǝɓ vaŋno nyee ka ɓaŋ tǝtǝl pel ɓii ga sǝŋ ya. Mor Dǝɓlii Masǝŋ ɓii ako ye Masǝŋ ma no sǝŋ pǝ coksǝŋ, ne Masǝŋ ma no wo sǝr tǝ sǝr sǝŋ. 12 Amma zǝzǝ̃ǝko we haa zah nyi me ne tǝɗii Dǝɓlii. Tǝgbana me joŋ gboŋgboŋ wo ɓiiri, awe laŋ we joŋ gboŋgboŋ wo za yaŋ pa ɓe nai ta. We cuu fan ma cuu 'manna 13 we ga soɓ pa ɓe ne ma ɓe tǝkine wee pa ɓe mawǝǝ ne maŋwǝǝ, tǝkine za ɓǝǝ daŋ ka mo yeara ne cee nyi me, we ǝ̃ǝ ru zah wulli. 14 So zai zyiira zah ah faa: We joo ɓǝ ɓuur a ɓe, ne cok Dǝɓlii mo nyi sǝr ah nyi ru ɓe, aru laŋ ru ga joŋ gboŋgboŋ ne ɓǝ sãh wo ɓo. Ru joŋ nai ya ɓe, ka Dǝɓlii mo ik ru pǝ wulli.

15 Rahaɓ ɗǝr ra zahtǝwoo ne salle, mor yaŋ ah vuu ɓo tǝ ɓaale sǝŋ. 16 Faa nyi ra: We ge tǝ waare, ka za ma foora mor ɓii mo lwaara we ka. We mok gŋ zah'nan sai ŋhaa mo piira soo ɗǝ, ka fahfal ah we ɓaŋ fahlii ɓii kal ba. 17 Faara nyi Rahaɓ: Ru ga gbǝ ɓǝ haazah mai mo joŋ ru haa ɓo. 18 Ne cok ru ge dai sǝr mai ɓe, ka mo saa suu syẽ zahtǝwoo mai mo ɗǝr ru gŋ. Ka mo so tai pa ɓo ne ma ɓo ne wee pa ɓo tǝkine zum ɓo daŋ ge wo ɓo ɓǝr yaŋ. 19 Koo zune mo pǝ̃ǝ zahfah yaŋ ɓo ge lal ɓe, syim ah ga tǝ suu ahe, ka ɓǝ ɓuu ka gŋ ya. Amma koo zune mo no ɓǝr yaŋ ne mo dǝɓ mo kan jol ge wol ah ɓe, syim ah ga yea tǝ ɓuuru. 20 Amma amo laŋ mo kal joo ɓǝ ɓuu ɓe, ka ru ga syel ɓǝ haazah ɓuu mo joŋ ru haa ɓo nyi mo. 21 Mawin zyii faa: Ɓǝ ah mo yea naiko. So nyi fahlii nyi ra kalle. Rahaɓ laŋ kal ge saa suu syẽ zahtǝwoo.

22 Za rai kalra ge mok tǝ waare. Za ma foo mor ɓǝǝ kyeɓra ra tǝ fahlii daŋ tǝgǝǝ zah'nan sai, amma lwaa ra ya, so piira soo ge Jeriko. 23 So za matǝ gwa kŋ ɗǝrra gin tǝ waare, ge yeera el kal ge wo Joswa we Nun, keera ɓǝ mai mo joŋ wo ɓǝǝ daŋ nyi ko. 24 Faara nyi Joswa: Dǝɓlii nyi sǝr mai daŋ nyi na ɓe, za ma kaara sǝr ah laŋ tǝ coora pel man coo ne galle.