Ɓǝ gaɓ tǝ yaŋ Jerusalem
1 Zǝzǝ̃ǝko, Dǝɓlii Masǝŋ ma ne swah daŋ a ga woo fan daŋ mai za mo gbǝ yǝk ɓǝ ah ɓo yaŋ Jerusalem tǝkine sǝr Yuda, koo mo dǝfuu yo daŋ a ga kal ne ko. A ga joŋ ka farel ne bii daŋ mo yea ka. 2 A ga woo za ɓǝǝ maswah ah ne sooje ɓǝǝ ne za lakaali, ne profetoen ɓǝǝ ne za kǝndaŋne, ne za swah yeɓ ɓǝǝ maluu, 3 ne zaluu sǝr ɓǝǝ ne sooje ma byak sǝr ɓǝǝra, ne za ma joŋ yeɓ pǝ sǝr ɓǝǝra, tǝkine za mai daŋ moo ẽera ciŋ kal ne ko. 4 Dǝɓlii ga soɓ wee manyee ah ye ga kaara swah tǝ zana. 5 Za ga gaɓra ki, wee tǝbanna ka ga keera zaluu ɓǝǝr a, za masyak ah laŋ ka ga keera za mai mo kal ra ɓo ya.
6 Zah'nan ah no ginni, ne cok ah za ki kǝsyil za ma morsǝ̃ǝ tǝ vaŋno ga nǝǝra dǝɓ ki kǝsyil ɓǝǝ a faara nyi ko: Ma ɓo mo no ne mbǝro masãhe, mo kaa goŋ ɓuu pǝ zah'nan magaɓ maiko. 7 Amma dǝɓ ah ga zyii zah ɓǝǝ faa: Ka, me ka gak gbah jol ɓii ya. So me ka ne farel tǝkine mbǝro ya, we ɓaŋ me kan goŋ ɓii ne ka!
8 'Manna, Jerusalem ɓeɓ ɓe! Yuda lee ɓe! Ɓǝ mai moo faara tǝkine fan joŋ ɓǝǝ daŋ a lahra zah Dǝɓlii ne ko. A tǝǝra Masǝŋ ne suu ah ryakryak sǝ. 9 Zahpel ɓǝǝ ga cuu ɓǝ ɓǝǝ caŋryaŋ. Faɓe' ɓǝǝ a lal taŋraŋ tǝgbana mǝ za Sodoma mo joŋra. Ɓǝ gaɓ no tǝtǝl ɓǝǝra! Ara ye 'nahm ɓǝ ah lwaa suu ɓǝǝ ɓo ne ko.
10 Za matǝ njaŋ ah a ga laara pǝ'nyahre, a ga rera reba yeɓ ɓǝǝ mai mo joŋra ɓo. 11 Amma za maɓe' ah ra no ne ɓǝ gaɓ tǝ ɓǝǝra, a ga lwaara soo tǝ yeɓ ɓǝǝ mo joŋra ɓo. 12 Za ma nyi lak nyi za ka mo so soora ne bii zahe, a cuura syak nyi za ɓe, a nyiŋra lak jol za kal tǝ mai mo nyi nyi ra kǝpelle.
Za ɓe, zaluu ɓii tǝ zyakra we, mor ah we tǝ fahlii mai ka we so ɓaŋ yao.
Dǝɓlii tǝ ŋgoŋ kiita tǝ zan ahe
13 Dǝɓlii ur ɓo ka faa ɓǝ tǝ zana, zyeɓ suu ah kaa ɓo ne ka ŋgoŋ kiita tǝ ɓǝǝra. 14 Dǝɓlii woo zaluu ne za goŋ ma pel zan ah ge pǝ kiita ne ra. So ce ra ne ɓǝ faa: Awe nyiŋ 'wah kpuu vin jol zana , yaŋ ɓii baa ɓo kǝrkǝr ne fan mai we nyiŋ jol za syakke. 15 We ka ne fahlii ka dah za ɓe ne ɓal ka cuu syak nyi za syak ya. Ame Dǝɓlii ma ne swah tǝ fan daŋ, me faa naiko.
Dǝɓlii lai ŋwǝǝ yaŋ Jerusalem
16 Dǝɓlii faa: We ẽe ŋwǝǝ yaŋ Jerusalem, a yiira suu ɗii nai ne! A gẽara zahvõo syee ne ko, a daɓra sol daɓɓe. A maara zoŋ ɓal syee ne 'nyẽa 'nyẽa. 17 Amma me ga ŋgoŋ kiita tǝ ɓǝǝra, me ga kpyãh tǝtǝl ga nyi ra lalle, me soɓ ra ɓoo ne suu kolle.
18 Zah'nan ah no ginni, ne cok ah fan mai ŋwǝǝ Jerusalem moo yiira suu ne daŋ, Dǝɓlii ga vǝr ɓǝ fan ah ra, ka yea yao. Fagai ma maa ɓal na zoŋ ne salabi, ne fan gbah rĩi, 19 tǝkine fan sokki, ne fan zahkpẽm jolle, ne godel ma jǝŋ tǝtǝlli, 20 ne salabi ma maa na njokki, gǝǝnyiŋ, ne ganda ma baŋ haŋne, 21 ne tǝgaa ma maa jolle tǝkine ma maa võo, 22 ne mbǝro ɓǝǝ ma lee gaɓɓe, ne godel ma sǝsaa, ne dah ma gban jol ne ma rǝk lakre, 23 ne fakwancee, we yerri marwãh ahe, ne salabi ma kim na zyim zahtǝtǝlli, tǝkine mbǝro masãh daŋ ka yea ya.
24 Suu ɓǝǝ ga fuŋ pǝɓeare, mor ɓǝrdi kǝkao. Ganda ka ga yea ya, a ga baŋra haŋ ne suu. A ga sõora tǝtǝl ga lalle, ka jerra rĩi yao. A ga ɓaara mbǝro dahsuu zahwaa mbǝro masãh ahe. Sãh suu ɓǝǝ kŋ ga fer ciŋ suu maɓe' ahe.
25 A ga ikra za maswah ah ma ɓǝr Jerusalem ga lal zah salle. 26 Yee ga yee yaŋ Jerusalem tǝkine dahgorre. Yaŋ Jerusalem a ga yea tǝgbana mawin mai mo kaa ɓo tǝ sǝr mo tǝ yeyee wulli.
© Bible Moundang © Alliance Biblique du Tchad, 1996.