Sǝr masãh mai mo tǝ ga rera
1 We syee mor ɓǝ lai mai daŋ me nyi ɓo nyi we tǝ'nahko, ka we yea ne cee, we ɓoo pǝpãare, ka we re sǝr mai Dǝɓlii mo faa ɓǝ ah nyi pa ɓii lii ra. 2 So we foo ɓǝ mai Dǝɓlii Masǝŋ ɓii mo syee ne we kǝsyicok syii jemma nai, pee bone camcam lii we ne ko, mor ka zye tǝ ɓǝ mai mo no pǝ zahzyil ɓiiri, ka ẽere, ɗah we ga syee mor ɓǝ lai ah ra no ne? 3 Soɓ koŋ i we, so nyi manna nyi we ka renne, farel mai awe ne pa ɓii lii ra daŋ we re taa ya yo. Joŋ nai mor ka cuu nyi we, dǝfuu ka yea ne cee mor a ren farel to ya, amma a yea ne mor ɓǝ mai daŋ Masǝŋ moo faani. 4 Pǝzyil syii matǝ jemma nai daŋ mbǝro wo suu ɓii ɓeɓ ya, ɓal ɓii ra laŋ fuu ya ta. 5 We foo, Dǝɓlii Masǝŋ ɓii lai we, ŋgoŋ kiita tǝ ɓii tǝgbana pah wee moo lai wee ahe. 6 Mor ahe, sai we joŋ tǝgbana mai Dǝɓlii mo faa ɓo nyi we, we syee tǝgbana ɓǝ lai ah mo faa ɓo, we ɗuu ko. 7 Mor Dǝɓlii Masǝŋ ɓii zaŋ we ga pǝ sǝr masãh ah mai el bii ra mo gŋ, ne biikyaŋ, ne mabii mai moo ɗuu ga pǝ cok ma tǝforoŋ ah ra ne ma tǝgee daŋ ne ko, 8 sǝr mai moo joŋ alkamaari, ne sor ne lee kpuu vin, ne lee kpuu wuu ne lee kpuu grenadin, ne nǝmmi, tǝkine tǝnjwǝǝ daŋ. 9 Koŋ ka ga i we gŋ ya, fan ki ka ga pee we gŋ ya ta. Vãm no pǝzyil tǝsal ah ra, ka we cii vãm syẽ mai mo no mor sǝr tǝ waa ah ra ta. 10 We ga lwaa farel mai we ne 'yah ah daŋ ka renne, so we ga joŋ osoko nyi Dǝɓlii Masǝŋ ɓii mor sǝr masãh mai mo nyiko ɓo nyi we.
Lai ka mo yaŋra Dǝɓlii ka
11 We joŋ yella, ka we yaŋ Dǝɓlii Masǝŋ ɓii ka, we zǝǝ tǝ ɓǝ lai ah ra mai me nyi ɓo nyi we tǝ'nah ka ta. 12 Ne cok we lwaa farel mai we ne 'yah ah daŋ ka renne, so we vuu yaŋ masãh ah ra ka kaa gŋ, 13 ne cok dǝǝ ɓii ra ne gwii ɓiiri, vãm solai ɓii ra ne vãm kaŋnyeeri, tǝkine fan ɓii manyeeki ah ra mo tǝ ga pel jol ɓii ɓe, 14 ka we yii suu ɓii ka yaŋ Dǝɓlii Masǝŋ ɓii mai mo wǝǝ we pǝ byak ɓii sǝr Egiɓ ka. 15 Ako ye zaŋ we syee kǝsyicok malii ma na fan ren galle, mai sooyii ne dǝweri daŋ mo gŋ ne ko, pǝ cok mayak mai bii mo ka gŋ ya, so soɓ bii ɓal gin wo pǝɗakka nyi we ka we zwahe. 16 Nyi manna nyi we kǝsyicok ka renne, farel mai pa ɓii lii ra mo re taa ya. Pee bone camcam tǝ ɓii mor ka lii we ne ko, ka ne in zah ah mo ẽe we mo nyi fan sãh camcam nyi we. 17 Ka we foo sõone we ciŋ za joŋ ɓo mor yella ɓii ne swah suu ɓii ka. 18 We foo, Dǝɓlii Masǝŋ ɓii ye nyi swah ah ɓo nyi we, ka we ciŋ za joŋne. Joŋ nai mor gbǝ ɓǝ gbanzah mai mo gbǝko ne pa ɓii lii ra ɓo, gbǝ ɓǝ gbanzah ah laŋ ɓo ŋhaa tǝ'nahko. 19 We yaŋ Dǝɓlii Masǝŋ ɓii wala ka soɓ ko ka ga syee mor masǝŋ ki ra ka joŋ mor ɓǝǝ ka. Me lai we ɓo tǝ'nahko, we kal joŋ nai ɓe, we ga vǝr tǝɗe'. 20 We zyii ka laa zah Dǝɓlii ya ɓe, we ga muŋ tǝgbana za mai Dǝɓlii mo tǝ ga muŋ ra pel ɓii ta.
© Bible Moundang © Alliance Biblique du Tchad, 1996.
