Masǝŋ 'yah za Israel
1 Dǝɓlii faa ɓǝ nyi me, 2 ka me ge faa ɓǝ ah nyi za mai mo no yaŋ Jerusalem daŋ, me faa: Ame foo ɓǝ goŋga mai mo yea ne ko ne laŋ ɓo, ne cok na yea pǝnyee na kan ki kǝpelle . Mo 'yah me no cam, amo syee mor ɓe kǝsyicok pǝ cok mai za mo ka pǝǝ fan gŋ ya. 3 Israel, ame Dǝɓlii me faa, ne cok ah amo ye yea ma ɓe to, amo yea tǝgbana fagwahl ɓe ma zyen kǝpelle. Za mai mo juura mo ɓe daŋ, me joŋ ra laa bone, me pee gaɓ gin tǝ ɓǝǝra.
Faɓe' pa ɓii lii ra
4 Awe morsǝ̃ǝ Yakuɓ, awe za Israel, we syii sok we laa ɓǝ faa Dǝɓlii. 5 Dǝɓlii faa: Pa ɓii lii lwaara ɓǝɓe' fẽe wo ɓe ŋhaa ka mo soɓra me ɓoo ne? A juura pel wo fan kolle, ara laŋ so ciŋra fan kol ta. 6 Ame wǝǝ ra gin pǝ sǝr Egiɓ, me zaŋ ra syee kǝsyicok ne pǝ sǝr ma ne waa tǝkine gbyaŋne, pǝ cok mayak ah ne sǝr magaɓ mai za mo ka syee gŋ ya, dǝfuu mo ka gŋ ya ta, amma ne daŋ laŋ ɓaŋra syiŋ ɓǝ ɓe ya. 7 Ame woo ra ge rǝk pǝ sǝr masãh ma joŋ fanne, ka mo laara pǝ'nyah ne joŋ fagwahl tǝkine fan sãh mai mo gŋ daŋ. Amma ne cok mo ge danra pǝ sǝr ahe, ɓeɓra sǝr ɓe ne ɓǝ ɓeare, joŋra sǝr mai me nyi nyi ra tǝgbana fan maɓe' ahe. 8 Za joŋzahsyiŋ fiira fii Dǝɓlii sye a kẽne taa ya, za ma keera mor ɓǝ lai nyi za tǝra me ya, zaluu ŋwoora kyaŋ ne me, profetoen a faara ɓǝ pǝ tǝɗii Ba'al, a juura pel wo fan kolle.
Dǝɓlii ne ɓǝ tǝ zan ahe
9 Mor maiko, ame Dǝɓlii me ga ŋgoŋ kiita tǝ za ɓe faɗa, me ga ŋgoŋ kiita tǝ wee ɓǝr wee ɓǝǝra. 10 We ge pǝ kyo Kiprus nǝfah kǝmorcomlil ahe, we so ge sǝr Kedar nǝfah morcomzah'nanne, ka we ẽe cok gŋ pǝsãhe, ɗah fan ma morãi joŋ taa ɓe ne? 11 Za mai mo kunra masǝŋ ki ɓǝǝ ɓo a no ne? Koo mo masǝŋ matǝ goŋga ah ra ye ka ko laŋ ko. Amma za ɓe ɓaŋra me Masǝŋ mai me joŋ ra pǝyǝk kun masǝŋ ki mai mo ka gak gbahra jol ɓǝǝ ya ne ko. 12 So ame Dǝɓlii me faa: Coksǝŋ mo cocoo ne galle, mo zoo gǝr, mo kaa gǝriŋ. 13 Mor za ɓe joŋra faɓe' camcam gwa: soɓra me biikyaŋ ma wuu lii ah ɓoo, so kal tǝ ciira lak bii manyeeki ah mai bii mo ka gak uu gŋ ya.
Reba fan joŋ bai goŋga za Israel
14 Israel byak ye ka, byaŋra byak ɓo ka ne ki ya. So mor fẽe za syiŋ ah a foora mor ah nai ne? 15 A ɓyaŋra ɓǝ tǝl ah ne kyaŋ pǝ'man na ɓolle, joŋra sǝr ah ciŋ cok kolle, joŋra yaŋ ah maluu na gboŋni, koo dǝɓ vaŋno ka gŋ ya. 16 Koo za yaŋ Mamfis ne Takfanes laŋ, a joŋra we na byakke. 17 Za Israel, ɓǝ mai daŋ we ye kyeɓ ge tǝ suu ɓii ne ko, mor awe soɓ me Dǝɓlii Masǝŋ ɓii mai mo zaŋ we syee ne ko ɓoo. 18 Zǝzǝ̃ǝ mai we pii soo ge sǝr Egiɓ ɓe, we ga lwaa reba fẽe gŋ ne? We 'yah ka ga zwan bii el Nil ko ne? We 'yah ka ga sǝr Asiria, we ga lwaa reba fẽe gŋ ne? We 'yah ka ga zwan bii el Efrat ko ne? 19 Ame Dǝɓlii Masǝŋ ma ne swah daŋ, me faa, faɓe' ɓii ga ŋgoŋ kiita tǝ ɓiiri, soɓ mai we soɓ me ɓoo ɓo, ɓǝ ah ga jin ŋgoŋ kiita tǝ ɓiiri. We ga tǝ, ɓǝ mai we soɓ me Dǝɓlii Masǝŋ ɓii ɓoo, we ka ɗuu me yao, a pǝgaɓɓe, a pǝɓe' no cam.
Za Israel zyiira ka syee mor Dǝɓlii ya
20 Za Israel, we ŋwookyaŋ ɓo ne me daga ɓaaɓe, we ka tǝ zyii laa zah ɓe ya, awe faa we ka joŋ byak ya. Amma awe joŋ tǝkoi pǝ cok ma tǝgee ah ra ne mor kpuu maluu ahe. 21 Ame nǝǝ we pee ɓo tǝgbana kpuu vin mai dǝɓ moo peeni, awe tǝgbana nah fan masãh ahe. Amma we ẽe ɗah we so joŋ ɓo zǝzǝ̃ǝ ɗao, awe so ciŋ kpuu vin mai mo ka lee syẽm masãh ya, we ciŋ fan dǝɓ ki ɓe. 22 Ame Dǝɓlii Masǝŋ me faa, koo we er bii ne tǝm ma nǝǝ fan lii, koo we vãh suu ɓii ne tǝm pǝlli laŋ, me tǝ kwan faɓe' ɓii kpǝ. 23 Mor fẽe we gak faa, we ɓeɓ suu ɓii ya, ru ka syee mor Ba'al a ne? We ẽe, awe joŋ faɓe' pǝ cok ma tǝforoŋ ahe. We foo ɓǝ fan mai we joŋni. Awe tǝgbana woi dǝǝ mai moo 'yah ki, a ɗuu kyãh haihai. 24 Awe na korro cok mai cok yee ki ah mo ge ɓe, dǝɓ mo ka gak cak zah ah ya. Wor ka gaɓ suu ah ne kyeɓ ah ya, mor cok yee ki ah ge ɓe, wor ka lwaa ko pǝgaɓ ya. 25 Za Israel, we byak ɓal ɓii ka we ɓea tǝ ɓal ka, we soɓ koŋ bii yak kyaŋ nyi we ka, amma awe faa: A'a, ka noo ya, aru 'yah masǝŋ za gwǝǝre, ru ga syee mor ɓǝǝra.
Israel nǝn pǝkoŋ lwaa kiita
26 Swãa ga re we tǝgbana swãa moo ren nyin ne cok mai mo gbǝra ko cok kiŋ fanne. Za Israel ne za goŋ ɓii, ne zaluu ne za joŋzahsyiŋ ne profetoen ɓii daŋ, swãa ga re we laŋ nai ta. 27 Awe za mai wee ɗii kpuu ne pa ɓiiri, wee ɗii tǝsal ne ma ɓiiri, swãa ga re we. Fan mai ga joŋ nai mor we soɓ me ɓoo ɓo, so we zyii ka pii soo gin wo ɓe ya. Amma ne cok we dan pǝ bone ɓe, awe ɗii me ka me ge ǝ̃ǝ we gŋ.
28 Masǝŋ ɓii mai we zyeɓ ra ɓo ka syee mor ɓǝǝ kŋ a kẽne? Ne cok we dan pǝ bone ɓe, mo ǝ̃ǝra we o ya ne? Moo gakra no ɓe ko. Sǝr Yuda, amo ne masǝŋ ki ra pǝpãa tǝgbana yaŋ ɓo maluu mo pǝpãa ko ta. 29 Ame Dǝɓlii me tǝ fii we, awe kyeɓ ɓǝ ne me mor fẽene? Awe daŋ we ŋwookyaŋ ɓo ne me. 30 Ame ŋgoŋ kiita tǝ ɓii me lai we, amma ɓǝ ah joŋ fan ki wo ɓii ya, we zyii ka laa lai ah ya. Awe ɓaŋ kpãh tǝgbana ɓol we ik profetoen ɓii ne pǝ wulli. 31 Awe za Israel, we syii sok pǝsãhe, we laa ɓǝ mai me tǝ faani. Ame wo ɓii tǝgbana cok makol ah wala na sǝr maɓe' ah o ne? Mor fẽe awe za ɓe, we faa we ga joŋ tǝgbana zahzyil ɓii mo 'yahe, we ka gin wo ɓe ya ne? 32 Mǝlaŋ win gak yaŋ fagai ah ra no ne? Wala woi gak yaŋ ɓǝ mbǝro ɓaŋ dǝr ah no ne? Amma za ɓe yaŋra me ɓe, zah'nan ah laŋ pãa ah ka gak kee yao. 33 Awe tǝ fahlii ka kyeɓ za mai we tǝ 'yah ɓe, so we cuu fahlii ɓe' ɓii ɓo nyi ŋwǝǝ maɓea ah ra. 34 Syim za syak ne za ma bai ɓǝɓe' mai mo ka danra yaŋ ɓii ne swah ya, a wo mbǝro ɓiiri. 35 Amma pǝzyil ɓǝ mai daŋ laŋ we so faa we ka ne ɓǝɓe' ya, Dǝɓlii ka ɓaŋ kpãh ne me yao. Amma ame Dǝɓlii me ga ŋgoŋ kiita tǝ ɓiiri, mor we faa we joŋ faɓe' ya. 36 Awe fer fahlii mai we yea tǝ syee mor ɓe ka so syee mor ɓǝ maki ah gwari nai mor fẽene? Egiɓ ga cuu swãa ɓii na Asiria mo cuu ta. 37 We ga pǝ̃ǝ gin gŋ we woo jol coo ga nahnǝn ne swãare. Mor ame Dǝɓlii me ɓoo za mai we gbǝ yǝk ɓǝ ɓǝǝ ɓo ge ɓo lalle, ka ga yeara wo ɓii ne yeɓ ya.
© Bible Moundang © Alliance Biblique du Tchad, 1996.
