Ɗii ka toobii
1 Dǝɓlii faa: Awe za Israel, we tǝ ga fer ɓǝ ɓii no ɓe, we pii soo ge wo ɓe. We myah masǝŋ ki ra mai me syiŋ ɓo ge lalle, we yea na za tǝ goŋga wo ɓe. 2 We joŋ nai, we so haa zah ne tǝɗii ɓe ɓe, ɓǝ ah ga yea wo ɓii njaŋ, ne fahlii, ne goŋga. Za sǝr daŋ laŋ a ga fiira me ka me ẽe ra, so a ga yiira me.
3 Dǝɓlii faa nyi za sǝr Yuda ne za yaŋ Jerusalem: We pǝǝ 'wah mafuu ahe, we ruu nah fan ɓii ge pǝ fãa ka. 4 Awe za sǝr Yuda ne za yaŋ Jerusalem, we syee mor ɓǝ gbanzah mai we gbǝ ɓo ne me Dǝɓlii ɓiiri, we nyi zahzyil ɓii nyi me. Mor me tǝ ga ɓaŋ kpãh pǝcwak na wii tǝ ɓǝ faɓe' mai wee joŋni. Kpãh ɓe ga sye na wii, dǝɓ ma gak rum ah ka yea ya.
Bone ga ge tǝ sǝr Yuda
5 We ul tǝsol sal pǝ sǝr ah daŋ! We dahgor pǝ'manne! We faa nyi za sǝr Yuda ne za yaŋ Jerusalem daŋ mo ɗuura gin ɓǝr ɓaale pǝ̃ǝ ge lalle. 6 We ɓaŋ tutowal ge sǝŋ ka cuu fahlii ga Sion, we ɗuu we kyeɓ cok muŋ suu ɓiiri, we gbǝ rol ka, mor Dǝɓlii tǝ ga pee ɓeɓ malii tǝkine bone gin fahsǝŋ ginni. 7 Ɓol pǝ̃ǝ gin pǝ cok muŋ ah mo muŋ ɓo gŋ, pa ma ɗaŋ za sǝr ur gin pǝ cok kal ah ɓaŋ fahlii ɓo ka ga ɓeɓ sǝr Yuda tǝɗe'. Yaŋ sǝr Yuda daŋ a ga ciŋ gboŋni, koo dǝɓ vaŋno ka ga yea gŋ ya. 8 We ɓaa mbǝro dahsuu, we yeyee, we dahgorre, mor kpãh mai Dǝɓlii mo ɓaŋ ɓo pǝ'man tǝ sǝr Yuda ɓah vǝr gin tǝl ah ya ba.
9 Dǝɓlii faa: Ne zah'nan ah zahzyil ga nǝǝ za goŋ ne zaluuri, za joŋzahsyiŋ ga coora coo ne galle, profetoen ga kaara gǝriŋ. 10 So ame Jeremias me faa: Dǝɓlii Masǝŋ, amo zyak za yaŋ Jerusalem ɓe, mor amo faa nyi ra we ga yea jam, amma so zǝzǝ̃ǝ nyah kan ɓo nyi ra kyaŋ, ka ŋgom ra ga lalle.
11 Zah'nan ah no ginni, ne cok ah a ga faara nyi za yaŋ Jerusalem, zyak sǝŋ macwak ah a ga kuu gin fah kǝsyicok ge tǝ za Dǝɓlii, zyak ah mo tǝ ga kuu ka tǝgbana ma gee sor ne ya. 12 Zyak mai Dǝɓlii mo ga soɓ ge, a ga kuu pǝ'manne. Zǝzǝ̃ǝ Dǝɓlii ne suu ah tǝ ga ŋgoŋ kiita tǝ zan ahe.
Za sal ga ryaŋ sǝr Yuda
13 We ẽe pa syiŋ man tǝ gin na swãh bamme, muŋta sal ah ra tǝ kuu gin tǝgbana zyak mǝǝzuwuŋrĩ, pǝr ah a ɗuura kal vak moo zoo ɓe. Za mana, bone lwaa na ɓe! Na muŋ ɓe! 14 Jerusalem, mo vãh ɓǝɓe' pǝ zahzyil ɓo ge lalle, mor ka mo ǝ̃ǝ. Mo ga yea ne ɓǝ foo maɓe' ah ga nai lii ne? 15 We laa ɓǝ mo tǝ cii gin Dan gin ɗǝ, ɓǝ maɓe' ah tǝ cii tǝwaa Efraim ginni, a faara ɓǝ ɓeɓɓe. 16 Tǝ faara: We lai zana, we faa nyi za yaŋ Jerusalem, za syiŋ man tǝ ginra pǝ sǝr maɗǝk ah ginni, a ga ŋwaara ɓǝ tǝ yaŋ sǝr Yuda maluuri. 17 Dǝɓlii faa, a ga ryaŋra sǝr Yuda tǝgbana za moo byak 'wahe, mor zan ah ŋwoora kyaŋ ɓo ne Dǝɓlii. 18 Yuda, fahlii kal ɓo ne fan joŋ ɓo ye 'nam ɓǝ mai ge ɓo tǝ ɓo ne ko, faɓe' ɓo ye ge ɓo tǝ ɓo ne bone maiko, ɓǝ ah ga sye suu nyi mo.
Jeremias swaa ɓǝ mor zan ahe
19 Ame Jeremias me faa: Za mana, bone, me ka tǝ gak rõm bone ya! Zahzyil ɓe tǝ ɗuu wesaŋlaŋne, me ka gak kaa 'wa ya, mor me tǝ laa cii tǝsol salle, ne cii ɓǝ ŋwaa sal daŋ. 20 Ɓeɓ a gin ɓǝrki ɓǝrki, sǝr ne lii ah daŋ ɓeɓ ciŋ cok kolle, yaŋ ɓe ne tal zyim ɓe daŋ ɓeɓ ne pel nai sǝ. 21 Me ga kwo tutowal sal ga nai lii ne? Me ga laa cii tǝsol sal ga nai lii ne? 22 Dǝɓlii faa: Za ɓe ra pǝ tǝgwĩi, tǝra me ya, ara tǝgbana wee nyee ma tǝgwĩi ahe, ara ka ne tǝtǝl a, tǝra fahlii ka joŋ ɓǝɓe' ɓo to, amma tǝra fahlii ka joŋ fan masãh ah ya.
Jeremias kwo ɓeɓ mo tǝ ginni
23 Ame Jeremias me faa: Me ɓaŋ nahnǝn ẽe sǝrri, so me kwo sǝr ciŋ cok kol ɓo, me so ẽe coksǝŋ ge, cokfãi ah kǝkao. 24 Me ẽe waa ra ge, me kwan tǝ laŋra geri geri, gee daŋ laŋ tǝ leara ga sǝŋ. 25 Me so ẽere, me kwo dǝfuu ya, so juu ma zoo sǝŋ daŋ zwǝǝra kal ɓe. 26 Sǝr ma joŋ fan lii kŋ ciŋ cok kol ɓe, yaŋ ah maluu daŋ ciŋ gboŋni, mor kpãh mai Dǝɓlii mo ɓaŋ ɓo pǝ'manne.
27 (Dǝɓlii faa sǝr ne lii ah daŋ a ga ciŋ cok kolle, amma ka ga vǝrko sǝr tǝɗe' sǝ ya.)
28 Sǝr ga kaa syakke, coksǝŋ ga joŋ pǝfuu piɓɓa piɓɓa. Dǝɓlii faa ɓǝ ah ɓo naiko, ka so fer ɓǝ foo ah mo foo ɓo ya, zyeɓ ɓǝ ah ɓo naiko, ka so soɓ bai joŋ ya. 29 Za ga laara ɓǝ ŋwaa za pǝrri, ne za ma ne guu, zune daŋ a ga ɗuu kalle. Za ki ga ɗuura kal ga pǝ gǝ̃ǝre, za ki ga ɗuura yee ga tǝwaare, a ga soɓra yaŋ daŋ yea tǝkolle, koo dǝɓ vaŋno ka ga yea gŋ ya. 30 Jerusalem, ɓeɓ lwaa mo ɓe! Mor fẽe mo ɓoo mbǝro syẽ ɓo wo suu ne? Mo zyeɓ fagai ma ne vãm kaŋnyeeri ah wo suu tǝkine ɗea sǝŋgin mor nǝn mor fẽene? Amo zyeɓ suu ɓo pǝsãh tǝkolle, za 'yah ɓo soɓra mo ɓoo ɓe, tǝ kyeɓra mo ka in pǝ wul o. 31 Ame tǝ laa yee cii tǝgbana yee mawin mai mo kaa byaŋ ɓo, gor ah tǝ dah tǝgbana mawin mai mo tǝ byaŋ we ɓil kahe. Jerusalem ye tǝ yeyee, tǝ 'meere, woo jol gbah ge ɓo sǝŋ a faa: Za mana, bone lwaa me ɓe, gera ɓo ka in me pǝ wulli!
© Bible Moundang © Alliance Biblique du Tchad, 1996.
