Yee dǝɓ ma pǝ cok gaɓɓe
1 Lǝŋ David.
Masǝŋ mai me tǝ yii mo, mo kaa ɓoɓo ka.
2 Za faɓe' tǝkine za matǝ vǝrvǝr a kyeɓra ka ruu sal ne me,
A gwahra ber zah ɓe.
3 A faara ɓǝɓe' tǝtǝl ɓe cẽecẽe,
A kyeɓra ka ruu sal ne me bai morrĩ.
4 Ka laara pǝ'nyah ne me ya,
Amma ne daŋ laŋ me 'yah ra,
Me juupel mor ɓǝǝra.
5 A soora ɓǝ sãh ɓe me joŋ wo ɓǝǝ ne ɓǝɓe', 'Yah ɓe me joŋ wo ɓǝǝra so ciŋ ɓǝɓe'.
6 Mo nǝǝ dǝɓ maɓe' ah ka ŋgoŋ kiita tǝ pa syiŋ ɓe,
Mo soɓ dǝɓ vaŋno kǝsyil za syiŋ ah ce tǝŋgee ahe.
7 Ka mo ŋgoŋra kiita tǝl ah ɓe, kiita mo gbǝ ko,
Ka juupel ah mo ciŋ ɓǝɓe'.
8 Ka zah'nan cee ah mo vǝr gwari,
Ka dǝɓ ki mo ɓaŋ cok yeɓ ahe,
9 Wee ah mo ciŋra syelle,
Mawin ah mo ciŋ mawin wulli.
10 Ka wee ah mo ciŋra mowoo tǝkine za syea fanne,
Ka mo nĩira ra gin pǝ cok mai mo kaara ɓo gŋ.
11 Ka pa val ah mo woo fan ah mo ne daŋ,
Ka za gwǝǝ mo woora fan ah mo joŋ yeɓ lwaa ɓo ne daŋ ta.
12 Ka dǝɓ vaŋno mo kwo syak tǝl ah ka,
Koo ka dǝɓ vaŋno mo kwo syak tǝ wee syel ah ra ka ta.
13 Ka morsǝ̃ǝ ah mo vǝrri,
Ka tǝɗii ah mo dai zahŋhǝǝtǝ̃ǝ ma fahfal ah ka.
14 Ka Dǝɓlii mo foo ɓǝ ɓe' pam lii mo joŋra,
Ka mo rwahko faɓe' mai mah ah mo joŋ ge lal ka ta.
15 Ka Dǝɓlii mo foo ɓǝ faɓe' ɓǝǝ cẽecẽe,
Amma ka za ki mo yaŋra ɓǝ ɓǝǝ tǝɗe'.
16 Mor dǝɓ ah ne zah'nan cee ah kwo syak tǝ za ki ya,
Foo mor za syakke, mabaidǝɓɓi, tǝkine za matǝtǝ̃ǝre,
Ik ra pǝ wulli.
17 Ako ye pa 'yah tǝǝre,
Amma ka za ki mo so tǝǝra ko ta.
Ako ye pa ma syiŋ ɓǝ sãhe,
Amma ka za mo so joŋra ɓǝ sãh wol ah ka ta.
18 Tǝǝ ka wol ah pǝgaɓ ya,
A tǝgbana mbǝro ɓoo ahe.
Amma ka tǝǝ ah moo tǝǝko mo dan pǝzyil ah tǝgbana bii,
Mo dan pǝzyil woiŋ ah tǝgbana nǝmmi.
19 Ka mo rii suu ah ne tǝgbana mbǝro,
Ka cẽecẽe mo yea wol ah tǝgbana ganda baŋ haŋ ahe.
20 Ka Dǝɓlii mo ŋgoŋ kiita tǝ za syiŋ ɓe naiko tǝkine za mai moo faara ɓǝɓe' tǝ ɓe.
21 Amma Dǝɓlii, Masǝŋ ɓe, mo gbah jol ɓe tǝgbana ɓǝ faa ɓo mo faa ɓo,
Mo wǝǝ me mor ɓǝ sãh ɓo ne 'yah ɓo.
22 Ame pa syakke, me ye mabaidǝɓɓi.
Ame ne ɓǝ swaa pǝ zahzyil pǝ'manne.
23 Me tǝ kal ga tǝgbana cee kpuu moo kalle,
Tǝ nĩira me tǝgbana za moo nĩi tǝzyeere.
24 Zahciŋɓal ɓe pǝtǝtǝ̃ǝre,
Mor me ka lwaa farel a.
Suu ɓe nyah ɓo, me joŋ ɓo pǝtǝtǝ̃ǝre.
25 Ne cok za mo kwora me ɓe, a syakra me,
A yimra tǝtǝl ne syẽa me.
26 Dǝɓlii, Masǝŋ ɓe, mo gbah jol ɓe,
Mo ǝ̃ǝ me mor 'yah lii ɓo.
27 Mo joŋ za syiŋ ɓe ka mo tǝra, amo ye pa ma ǝ̃ǝ ɓe to.
28 Koo mo tǝǝra me laŋ, amma ma ɓo mo ga ẽe me.
Mo joŋ swãa re za mai mo tǝ foora mor ɓe.
Ka ame dǝɓ yeɓ ɓo me laa pǝ'nyahre.
29 Mo tǝr za syiŋ ɓe ka swãa mo re ra,
Ka mo ɓoora swãa tǝgbana mbǝro.
30 Me ga joŋ osoko nyi Dǝɓlii,
Me ga yii ko kǝsyil zana,
31 Mor cam tǝtǝl pa syakke,
Ə̃ǝ ko gin mor jol za mai mo ŋgoŋra kiita wul ɓo tǝl ahe.
© Bible Moundang © Alliance Biblique du Tchad, 1996.
