Zah'nan vǝr za Israel ge gwari ɓe
1 Dǝɓlii faa ɓǝ nyi me: 2 We dǝfuu, ɓǝ mai ame Dǝɓlii Masǝŋ me tǝ faa tǝ sǝr Israel a naiko, zah'nan vǝr sǝr ah daŋ ge gwari ɓe!
3 Za Israel, zah'nan vǝr ɓii ge gwari ɓe. Me ga ɓaŋ kpãh tǝ ɓii pǝ'manne, me ga ŋgoŋ kiita tǝ ɓii mor fan mai we joŋni, me ga faŋ val ɓǝɓe' mai we joŋ daŋ tǝtǝl ɓiiri. 4 Tǝtǝl ka ga 'mĩi me tǝ ɓii ya, me ka ga kwo syak tǝ ɓii ya ta. Amma me ga ŋgoŋ kiita tǝ ɓii tǝgbana ɓǝɓe' mai we joŋni. So we ga tǝ, ame ye Dǝɓlii.
5 Masǝŋ Dǝɓlii faa: Bone ga ge tǝ ɓii ɓǝrki ɓǝrki. 6 Zah'nan ge ɓe, zah'nan vǝr ɓii ge gwari ɓe. 7 Awe za mai we kaa ɓo pǝ sǝr nyẽe daŋ, zah'nan vǝr ɓii ge gwari ɓe, cok mai ka we gak joŋ fĩi tǝwaa ka, sai ka we yeyee to ge ɓe.
8 Me ka gbǝ rol a, me ga ɓaŋ kpãh tǝ ɓii gwari sǝ, me ga ŋgoŋ kiita tǝ ɓii mor fan mai we joŋni, me ga faŋ val ɓǝɓe' mai we joŋ daŋ tǝtǝl ɓiiri. 9 Tǝtǝl ka ga 'mĩi me tǝ ɓii ya, me ka ga kwo syak tǝ ɓii ya ta, me ga ŋgoŋ kiita tǝ ɓii tǝgbana ɓǝɓe' mai we joŋni, so we ga tǝ, ame ye Dǝɓlii, ame ye Dǝɓ mai me ŋgoŋ kiita tǝ ɓiiri.
10 Zah'nan bone za Israel ge gwari ɓe, faɓe' joŋ pǝ'man ɓe, yii suu laŋ a pǝlli o ta. 11 Ɓǝɓe' laŋ a ga pelle, zyakra ɓe, ara ka ne fan ki yao, joŋ ɓǝǝ ne yǝk ɓǝǝ daŋ vǝr ɓe.
12 Cok ah ge ɓe, zah'nan ah ge gwari ɓe. Dǝɓ ma lee fan mo 'nyah suu ka, dǝɓ ma lee fan ne fan laŋ mo yeyee ka, mor Masǝŋ tǝ ga ŋgoŋ kiita tǝ za daŋ zahki. 13 Pa ma lea fan ne fan mo no sǝŋ ne cee ba laŋ, ka ga lwaa jin mah lak ah ga cok ah ne fan mai mo leako ya. Mor Masǝŋ ɓaŋ kpãh ɓo tǝ za daŋ. Za ma joŋ faɓe' daŋ ka ga yeara sǝŋ ne cee ya. 14 A ga ulra tǝsol salle, zune daŋ a ga zyeɓ suu, amma dǝɓ ma pǝ̃ǝ ga sal ka ga yea ya, mor Masǝŋ ɓaŋ kpãh ɓo tǝ za daŋ zahki.
Kiita tǝ faɓe' za Israel
15 Nǝfah kǝlalle, sal no, nǝfah kǝɓǝr yaŋ, syem maɓe' ne koŋ no ta. Dǝɓ mo pǝ̃ǝ ɓǝr yaŋ ge lalle, sal ga i ko, so dǝɓ mo kǝɓǝr yaŋ ahe, syem maɓe' ne koŋ ga i ko pǝ wulli. 16 Za ki ga ɗuura kal ga tǝwaare, a ga yeara gŋ tǝgbana matǝvaa mai moo yera yee pǝ cok ma tǝforoŋ ahe, zune daŋ a ga 'mee gŋ tǝ ɓǝ faɓe' ahe. 17 Jol ɓǝǝ daŋ ka ga yea pǝswah ya, a ga cwǝ̃ǝra tǝtǝm tǝ gah ɓal ɗuu ga sǝŋ mgbǝyai mgbǝyai ne galle. 18 A ga ɓaara mbǝro dahsuu, a ga coora ne gal geri geri, a ga swãara tǝtǝl ga lalle, swãa ga re ra ne lii ɓǝǝ daŋ. 19 A ga myahra vãm kaŋnyeeri ne vãm solai ɓǝǝ ga lal tǝ fahlii tǝgǝǝ yaŋ tǝgbana fan maɓea ahe. Mor ne cok mai Dǝɓlii mo ga ɓaŋ kpãh tǝ ɓǝǝ joŋ ki ne ra, vãm kaŋnyeeri ne vãm solai ɓǝǝ ka gak ǝ̃ǝ ra com ah ya, ka gak joŋra laŋ fan ma 'nyah suu ɓǝǝ ne wala sahɓ ɓǝr ɓǝǝ ne yao. Mor vãm kaŋnyeeri, ne vãm solai ye kǝǝ ra dan pǝ faɓe'. 20 A yiira suu ɓǝǝ ne fan sãh ɓǝǝra, zyeɓra masǝŋ ki maɓea ah ra ne ko. Mor ah Dǝɓlii so joŋ fan sãh ɓǝǝ wo ɓǝǝ ciŋ fan maɓea ahe.
21 Dǝɓlii faa: Me ga soɓ za gwǝǝ gin woo fan ɓǝǝra, za ma bai syee mor ɓǝ lai ga woora joŋ ɓǝǝ daŋ kal ne ko, a ga ɓeɓra fan ah ne 'nahmme. 22 Ne cok za kaafuu mo ge tǝ woora fan sãh ɓǝr yaŋ ɓe ga ne ka ii fan ah ne 'nahm ɓe, me ka cii fahfal ẽe ra ya.
23 Mo coo celeelu, mor ɓǝ in wul baa ɓo pǝ sǝr ah ne lii ah daŋ gǝɓ, ɓǝɓe' laŋ a pǝ yaŋ maluu ra pǝlli ta. 24 Me ga ɗii za ma kal we ne ɓǝɓe' ge nyee ne ko, me ga soɓ ra re yaŋ ɓiiri. Ne cok me soɓ za ki mo ge tǝ ɓeɓra cok mai daŋ wee juupel gŋ ɓe, za ɓii maswah ah ra daŋ zahzyil ga nǝǝ ra. 25 Bone tǝ ginni, ne cok ah we ga kyeɓ jam, amma we ka ga lwaa ya. 26 Ɓeɓ ga ge tǝ ɓii ɓǝrki ɓǝrki, so we ga laa ɓǝ maɓe' ah morki morki ta. We ga fii profetoen ka mo faara ɓǝ fakwan nyi we. Za joŋzahsyiŋ ka lwaara ɓǝ ki ka cuu nyi zan a, zaluu laŋ ka ga lwaara ɓǝ ki ka gbah jol za ne ya ta. 27 Goŋ ga yeyee, zahzyil ga nǝǝ dǝɓlii ma pel zana, za pãa daŋ a ga coora coo ne galle. Me ga joŋ ki ne we tǝ ɓǝ fan mai daŋ we joŋni, me ga ŋgoŋ kiita tǝ ɓii tǝgbana mai we ŋgoŋ tǝ za ki ta. So we ga tǝ, ame ye Dǝɓlii.
© Bible Moundang © Alliance Biblique du Tchad, 1996.
