Ɓǝ ɗerewol macẽe ah mo zooni
1 Me so ẽe cok faɗa, ne cok ah me kwo ɗerewol macẽe ah zoo kal ge sǝŋ. 2 Angelos fii me faa: Mo kwo fẽene? Me zyii faa: Me kwo ɗerewol macẽe ah tǝ zoo ga sǝŋ, wah ah i jol ɓo jemma gwa, 'ah ah i jol ɓo jemma vaŋno.
3 So faa nyi me: Pǝ ɗerewol ah ŋwǝǝra ɓǝ tǝkẽawãk mai mo tǝ ga ge tǝ sǝr daŋ ɓo gŋ. Pǝ ɗerewol ah ma nekǝki ah faa, koo zune mo kiŋ nyin daŋ a ga nĩira ko gin wo sǝr ɓoo, so ŋwǝǝ ɓo gŋ ma nekǝki ah laŋ faa, koo zune mo haa zah ne berre, a ga nĩira ko ɓoo. 4 Dǝɓlii ma ne swah daŋ faa, zye ye ga pee tǝkẽawãk ah ge, a ga dan ɓǝr yaŋ nyin vaŋno vaŋno daŋ, so a ga dan ɓǝr yaŋ za mai moo haara zah ne berre, a ga kaa ɓǝr yaŋ ɓǝǝra, a ga ɓeɓ yaŋ ah ra tǝɗe'.
Fakwan mawin ma kaa pǝ keere
5 Angelos mai mo faa ɓǝ ne me ge faɗa, faa: Mo ẽe fan ma ŋhaa mo tǝ pǝ̃ǝ gin ɗǝ. 6 Me fii ko faa: A fẽe ye ne? Zyii faa nyi me: Kee yo, mai a cuu faɓe' sǝr daŋ. 7 So dǝɓ ki gbǝr fan coo zah fan ma ne vãm fuu, me kwo madǝwin kaa ɓo pǝ keere. 8 Angelos so faa nyi me: Mawin mai a cuu faɓe'. So woo ko ɓoo ge pǝ keere, coo zah ah ge gŋ. 9 So me ɓaŋ nahnǝn ẽe cokki, me kwo ŋwǝǝ gwa, ara ne yee maswah ah tǝgbana mǝ makãhgoŋe, ɓaŋra kee kŋ zoo kal ge zahmaswãh sǝŋ ne ko.
10 Me so fii angelos: Ɓaŋra kee sye ga kẽe ne ne? 11 Zyii zah ɓe faa: Tǝ vuura yaŋ nyi mawin ah pǝ sǝr Babilon. Ne cok yaŋ ah mo vuu vǝr ɓe, a ga kanra kee ah gŋ ka juupel wol ahe.
© Bible Moundang © Alliance Biblique du Tchad, 1996.
