Dǝɓlii faa ɓǝ tǝ profetoen mawǝǝ maber ahe
1 Dǝɓlii faa nyi me: 2 We dǝfuu, mo faa ɓǝ mai mo ga joŋ wo profetoen Israel mai moo lǝŋra ɓǝ foo ka syak ɓǝǝ faani, mo faa nyi ra, mo syiira sok laa ɓǝ faa Dǝɓlii mo tǝ ga faa.
3 Masǝŋ Dǝɓlii faa: Ɓǝ gaɓ tǝ profetoen ma tǝgwĩi raiko, a lǝŋra ɓǝ foo suu ɓǝǝ faani, ka kwanra fan ki ya. 4 Za Israel, profetoen ɓii a joŋra fan tǝgbana gyaori mai mo kaara ɓo tǝ gboŋni. 5 Ka ga dahɓra nyah ɓaale mai mo lee ge ɓo sǝŋ ya, ka vuura ɓaale ah ga sǝŋ ka mo byak we ne cok mai sal moo ga ge ne zah'nan Dǝɓlii ya. 6 Ka kwanra fan ki ya, a lǝŋra ɓǝ ne tǝtǝl ɓǝǝra, so a gwahra ber nyi zana, a lǝŋra rǝ tǝ faa ɓǝ faa ɓe, amma me pee ra ɗǝ ya. A lǝŋra me ga soɓ ɓǝ faa ɓǝǝ joŋ ga cok ahe. 7 Me tǝ faa nyi ra: Fakwan ɓii ɓǝ kol o, ɓǝ faa ɓii wee faa laŋ we tǝ gwah berre. Awe faani, ɓǝ ah ɓǝ faa Dǝɓlii yo, amma me faa ɓǝ nyi we ɗǝ ya.
8 So ame Dǝɓlii Masǝŋ me tǝ faa nyi ra: Ɓǝ faa ɓii wee faa daŋ ɓǝ kol o, ɓǝ fakwan ɓii laŋ we tǝ gwah berre, me ga joŋ ki ne we. 9 Ame ga ŋgoŋ kiita tǝ ɓii profetoen mai wee kee ɓǝ fakwan mai we lǝlǝŋ ɓo, tǝkine faa ɓǝ gwah ber nyi za ne ko. Ne cok za ɓe moo ga taira faa ɓǝ fan ka joŋni, we ka ga yea gŋ ya. Tǝɗii ɓii ka ga yea pǝ ɗerewol ma ŋwǝǝ tǝɗii za Israel a. We ka pii soo ga sǝr ɓii laŋ yao syaŋsyaŋ. So we ga tǝ, ame ye Masǝŋ Dǝɓlii.
10 Profetoen rai a zyakra za ɓe ne faa ɓǝ jam nyi ra, so ka jam laŋ ka yea man a. Za ɓe vuura ɓaale, profetoen maber rai ge ɓoora fal ah ne pǝɗama. 11 Mo faa nyi profetoen rai sye, me ga pee bam malii ah ge, syaŋ ga tǝ gin tǝ yaŋ ma ɓǝǝ mo ɓoora fal ah ɓo, zyak malii ah ga kuu tǝl ah ta. 12 Vuu ma ɓǝǝ ga zol ga lalle, zune daŋ a ga fii we faa: Ɗah vuu ma ɓii we ɓoo fal ah ɓo ne joŋ fan sãh fẽe ɓo gŋ nyee ne?
13 Mor ah Dǝɓlii Masǝŋ faa: Mor kpãh ɓe me ɓaŋ ɓo, me ga pee zyak ma'man ah ge, me ga tǝ bam ge ne syaŋ tǝgbana tǝsalle, ka mo ɓeɓ ɓaale ahe. 14 Me ga ɓeɓ mai we ɓoo fal ah ɓo, me ga 'wal ga sǝŋ ŋhaa ga kan tǝkpii mor ah mo kpii ɓo taa. A ga lee ga tǝ ɓii ik we daŋ pǝ wulli, so zune daŋ a ga tǝ, ame ye Dǝɓlii. 15 So ɓaale ne za mai mo ɓoora fal ah ɓo ne pǝɗama daŋ, a ga laara yǝk kpãh ɓe me ɓaŋ ɓo tǝ ɓǝǝra. So me ga faa nyi we, ɓaale ne za mai mo ɓoora fal ah daŋ kǝkao. 16 Profetoen za Israel mai moo faara ɓǝ jam nyi yaŋ Jerusalem, so laŋ ka jam ka yea man a, ara kǝkao. Ame Dǝɓlii Masǝŋ me faa naiko.
Dǝɓlii faa ɓǝ tǝ profetoen maŋwǝǝ maber ahe
17 Dǝɓlii faa: We dǝfuu, mo ɓaŋ nahnǝn mo ẽe ŋwǝǝ mai mo kǝsyil za ɓo, moo foora ɓǝ kol faa nyi zana. Mo faa ɓǝ fan mai mo ga joŋ wo ɓǝǝ tǝtǝl ɓǝǝra. 18 Mo faa nyi ra, ame Dǝɓlii Masǝŋ me faa: Ɓǝ gaɓ ga lwaa we ŋwǝǝ ma cur mbǝro joŋ yiila, mor ka za mo bamra zahkpem jolle, ne salabi mor ka koo tǝtǝl za maluu ne za manyee ahe. A joŋra nai mor ka kaa swah tǝ ɓǝǝ ne ko. We gbah cee za ɓe nai ɓe, ma ɓii we ga ǝ̃ǝ cee suu ɓii ne? 19 Awe ɓeɓ yǝk ɓe me ne pel za ɓe, mor ka we lwaa zyemĩi man baa jol ne nje, so ka we lwaa wee tǝcoŋ wol ne to. Za mai mo ka nǝn pǝkoŋ wul a, we ik ra pǝ wulli, za mai mo nǝn pǝkoŋ wulli, we so soɓ ra ne cee. So we gwah ber nyi za ɓe, a so nyiŋra ɓǝ ber ɓiiri.
20 Mor ahe, ame Dǝɓlii Masǝŋ me faa: Ame syiŋ zyim ɓii mai wee joŋ ka kaa swah tǝ za ne ko ɓo syiŋ, me ga ŋgǝ̃ǝ wo jol ɓii ra ga lalle, me ga wǝǝ za mai we kaa swah ɓo tǝ ɓǝǝ myahe. 21 Me ga ŋgǝ̃ǝ salabi ɓii ra ta, me ga wǝǝ za ɓe gin mor jol ɓiiri, we ka ga yea ne swah tǝ ɓǝǝ faɗa yao. So we ga tǝ, ame ye Dǝɓlii.
22 Awe nǝǝ zahzyil nyi za matǝ goŋga ah ra mai me 'yah dǝɓ mo ɓeɓ zahzyil nyi ra ya, ne ber mai wee gwahni. So we swaa zahzyil nyi za maɓea ah ka mo joŋra faɓe' ɓǝǝ ge pel ŋhaa ka cee ɓǝǝ mo ge muŋ. 23 Mor ahe, we ka fǝ̃ǝ kwo fakwan ber ɓii faɗa yao, we ka fǝ̃ǝ joŋ yiila ɓii laŋ yao. Me ga wǝǝ za ɓe gin mor jol ɓiiri, so we ga tǝ, ame ye Dǝɓlii.
© Bible Moundang © Alliance Biblique du Tchad, 1996.
