Tǝ'yak Matǝdaŋdaŋ ge
1 Ne cok zah'nan fĩi Pentekost ge dai ka za ma iŋ daŋ taira ɓo cok vaŋno. 2 Ne cok ah sǝ, laara cii fan gee sǝŋ, cii ah tǝgbana zyak mai moo kuu ne swahe, ge baa yaŋ mai mo haira ɓo gŋ kǝrkǝr. 3 Kwora fan tǝgbana tǝrĩi wii, so woŋ kan ge tǝtǝl ɓǝǝ vaŋno vaŋno daŋ. 4 Tǝ'yak Matǝdaŋdaŋ baa zahzyil ɓǝǝ daŋ, so tǝŋ faara ɓǝ ne zah camcam tǝgbana Tǝ'yak mo cuu nyi ra ka faani.
5 Yahuduen ma syeera mor ɓǝ iŋ ɓǝǝ urra gin sǝr camcam wo sǝr daŋ gera ɓo yaŋ Jerusalem. 6 Ne cok za mo laara cii fan ahe, so taira ge cok vaŋno, ɓǝ ah kiŋ tǝtǝl ɓǝǝ ne lii ah daŋ, mor zune kǝsyil ɓǝǝ daŋ a laa za ma iŋ a faara ɓǝ ne zah sǝr ah mo gee gŋ ge. 7 Za daŋ kaara tǝ ɓǝ ah gǝriŋ, gal re ra pǝlli, faara: Za mai mo tǝ faara ɓǝ Galilien ye ka ra daŋ ya ne? 8 So joŋ ɗii koo zune kǝsyil man a laara faa ɓǝ ne zah ah mo byaŋ ne ko ne? 9 Ana laŋ za ki kǝsyil man gera gin sǝr Pardia, Media ne Elam, ne za ma fak kǝ Mesopotamia, ne Yudea, Kapadokia, ne Pontus tǝkine sǝr Asia, 10 so ne za ma fah kǝ Frigia, Pamfilia, Egiɓ ne sǝr Libia ma kah Kirene. Za ki laŋ gera gin Rom ge, 11 Yahuduen ne za ma syeera mor ɓǝ iŋ Yahuduen, za ki kǝsyil man laŋ gera gin sǝr Kreta ne Arabia ge. So na daŋ na tǝ laa a faara ɓǝ yeɓ malii Masǝŋ mo joŋ ɓo ne zah man camcam. 12 Ara daŋ kaara tǝ ɓǝ ah gǝriŋ, tǝra mor ah ru so foo ɗǝne ya, so faara kǝsyil ki: Fan mai a 'yah cuu ɓǝ fẽene? 13 Amma za ki kǝsyil ɓǝǝ ryakra suu za ma iŋ faara: Zwahra yim ɓo ko tǝ tǝǝ ra.
Ɓǝ faa Petar
14 Petar ne zapee matǝ jemma tǝtǝl vaŋno urra uu sǝŋ, Petar tǝŋ faa ɓǝ nyi ra faa: Awe Yahuduen tǝkine za mai we kaa ɓo yaŋ Jerusalem daŋ, we syii sok ka we laa ɓǝ mai me tǝ ga faa nyi we. 15 Za mai yim ye ka tǝ tǝǝ ra tǝgbana we tǝ foo ya, mor zǝzǝ̃ǝ cok com doraŋ ma ne zah'nan ye ba. 16 Amma ɓǝ mai mo tǝ joŋ nyẽe, fan mai profeto Joel mo faa ɓǝ ah ɓo ɓaaɓe yo, faa:
17 Masǝŋ faa: Fan mai moo ga joŋ ne zah'nan ma fahfal tǝ lii:
Me ga pee Tǝ'yak ɓe tǝ koo zune daŋ.
Wee ɓii mawǝǝ ne maŋwǝǝ a ga faara ɓǝ tǝ ɓǝ fan mai mo tǝ ga joŋ pelle.
Wee tǝbanna ɓii a ga kwora fanne,
Za tam ɓii ga loora lomme.
18 Ne zah'nan ah me ga pee Tǝ'yak ɓe tǝ byak ɓe mawǝǝ ne maŋwǝǝ daŋ.
A ga faara ɓǝ tǝ ɓǝ fan mai mo tǝ ga joŋ pelle.
19 Me ga joŋ yeɓ matǝ gǝriŋ ah sǝŋ tǝlǝǝ sǝŋ,
Me ga joŋ dǝǝbǝǝri sǝŋ tǝ sǝr sǝŋ.
Me ga soɓ syimmi, wii, tǝkine suŋwii ge kǝpel zah'nan malii ne zah'nan mayǝk ah mai Dǝɓlii mo ga ge ne ko.
20 Com ga joŋ pǝfuu,
Fĩi ga yea pǝsyẽ na syimmi.
21 So koo zune mo ɗii tǝɗii Dǝɓlii daŋ a ga ǝ̃ǝ.
22 Awe za Israel, we laa ɓǝ mai me tǝ ga faa nyi we. Yesu ma yaŋ Nazaret ako ye Dǝɓ mai Masǝŋ mo cuu swah ah nyi we ne ki, mor Masǝŋ joŋ yeɓ maswah ah ne dǝǝbǝǝri tǝkine yeɓ matǝ gǝriŋ ah ne jol ah kǝsyil ɓii pǝlli. Awe ne suu ɓii laŋ we tǝ ɓǝ ah ɓe. 23 Tǝgbana Masǝŋ mo zyeɓ ɓǝ ah ɓo ne fatan ah kǝpelle, so soɓ ko ge jol ɓiiri, we i ko pǝ wul ne ɓaa ko ga wo kpuu ne jol za maɓe' ah ra. 24 Amma Masǝŋ ur ko gin pǝ wulli, wǝǝ bone wul gin tǝl ahe, mor wul ka ne fahlii ka yea ne swah tǝl ah ya. 25 Mor ah David faa tǝl ahe:
Me kwan Dǝɓlii pel ɓe cẽecẽe,
A no jokǝsãh ɓe mor ka me laŋ ka.
26 Mor ah zahzyil ɓe tǝ laa pǝ'nyahre,
Zah ɓe tǝ rahtǝrah ne ɓǝ 'nyahre.
Koo ne suu matǝtǝ̃ǝ mai me ne koi laŋ me ga kaa 'yak ka byakke.
27 Mor mo ka ga soɓ mazwãhsuu ɓe pǝ cok za ma wul mo gŋ ya,
Mo ka soɓ dǝɓ yeɓ ɓo sõo ya ta.
28 Mor mo cuu fahlii mai me ga lwaa cee ne nyi me ɓe,
Mo ga joŋ me laa pǝ'nyah pel ɓo.
29 Wee pa ɓe, me gak faa ɓǝ tǝ ɓǝ pa man lii David nyi we wat. David wǝ ɓe, ciira ko ɓe ta, pal ah no kǝsyil man ŋhaa tǝ'nahko. 30 Ako ye yea profeto Masǝŋ, so tǝ ɓe, Masǝŋ faa ɓǝ nyi ko ne haazahe, faa dǝɓ vaŋno kǝsyil morsǝ̃ǝ ah a ga kaa goŋ pǝ cok ahe. 31 David kwo fan mai Masǝŋ mo tǝ ga joŋ pel ɓe, mor ah faa ɓǝ tǝ ɓǝ ur Kristu gin pǝ wul ne cok mai mo faako:
Masǝŋ soɓ ko pǝ cok mai za ma wul mo gŋ ya,
Suu ah laŋ sõo ya.
32 Yesu mai me tǝ faa ɓǝ ahe, Masǝŋ ur ko gin pǝ wul ɓe, ana daŋ na ye za syedowal ahe. 33 Masǝŋ yii ko ɓo jokǝsãh ah coksǝŋ, ɗǝǝ Tǝ'yak Matǝdaŋdaŋ mai Pam mo faa ɓǝ ah ɓo ka nyini, so pee ge ɓo tǝ mana, ako ye we tǝ kwan tǝkine laa ɓǝ ah zǝzǝ̃ǝko. 34 Mor David ne suu ah yee ge sǝŋ ya, amma faa:
“Dǝɓlii faa nyi Dǝɓlii ɓe:
Mo kaa jokǝsãh ɓe,
35 Ŋhaa ka me joŋ za ma syiŋ ɓo daŋ swahra ge sǝŋ mor ɓal ɓo”.
36 Awe za Israel daŋ, we tǝ njaŋ, Yesu mai we ɓaa ge wo kpuu, Masǝŋ kan Dǝɓlii ɓo ne ki ne Kristu gwa daŋ.
37 Ne cok za mo laara naiko, ɓǝ ah nǝǝ zahzyil ɓǝǝra, so fiira Petar ne zapee manyeeki ah faara: Wee pa ɓuuru, ru ga joŋ ɗǝne? 38 Petar zyii faa nyi ra: We toobii ka koo zune kǝsyil ɓii daŋ mo nyiŋko baptisma pǝ tǝɗii Yesu Kristu, mor ka faɓe' ɓii mo rwahe, we ga ɗǝǝ Tǝ'yak Matǝdaŋdaŋ jol Masǝŋ. 39 Mor Masǝŋ faa ɓǝ ah ɓo mor ɓii ne wee ɓii daŋ, tǝkine za mai mo pǝɗǝkki, mai Dǝɓlii Masǝŋ man moo ga ɗii ra daŋ.
40 Petar faa ɓǝ camcam nyi ra pǝlli, lai ra tǝkine swaa ra, faa: We ǝ̃ǝ suu ɓii ne woŋ ki ne za mai mo muŋra ɓo. 41 Za pǝlli kǝsyil ɓǝǝ nyiŋra ɓǝ faa Petar so nyiŋra baptisma ta. Com ah pãa za tǝgbana ujenere sai ɓoo ge gŋ kǝsyil za ma iŋ ahe. 42 A taira laa ɓǝ cuu zapee cẽecẽe, a taira wo ki ne 'yah mǝ wee pamme, a renra farel cok vaŋno tǝkine juupel daŋ.
Kal za ma iŋni
43 Koo zune kǝsyil ɓǝǝ daŋ a ɗuu galle, mor zapee joŋra dǝǝbǝǝri ne yeɓ matǝ gǝriŋ ah pǝlli. 44 Za ma iŋ daŋ a yeara wo ki, a taira fan mai mo jol ɓǝǝ daŋ tǝki ta. 45 Leara fan ne 'wah ɓǝǝ tǝkine fan mai mo jol ɓǝǝra, a womra lak ah kǝsyil ki, koo zune daŋ a lwaa nǝn pǝkoŋ joŋ fan ahe. 46 Zah'nan daŋ a taira ga yaŋ Masǝŋ, a renra farel ɓǝǝ kǝsyil ki ɓǝr yaŋ ɓǝǝ ne laa pǝ'nyah ne zahzyil vaŋno. 47 A yiira Masǝŋ, a 'yahra za daŋ, Dǝɓlii ɓoo pãa za ma ǝ̃ǝ ah ga gŋ tǝgǝǝ ɓǝǝ zah'nan daŋ.
© Bible Moundang © Alliance Biblique du Tchad, 1996.
