Za ma kǝpel kǝsyil zahban Benyaamin mo kalra ge mor David
1 Za pǝlli kalra ge mor David ne cok mai mo woŋ ki ne Saul we Kis, mo ge kaa ɓo Ziklak, zan ah daŋ za ma ne tǝtǝl o, sooje maswah ah ye ra ta, 2 ara ye zahban Benyaamin mai Saul mo gŋ ta, zan ah tǝra 'nǝǝ guu ɓo no cam, so tǝra 'nǝǝ tǝsal ne jokǝsãh ne jokǝlǝɓai gwa daŋ. 3 Zaluu ma pel ɓǝǝ ye Ahizer ne Joas wee Semaa ma Gibea, Jeziel ne Pelet wee Asmavet, Beraka we Jehu ma Anatot, 4 Ismaia ma Gibeon, sooje maswah ah ye kǝsyil za matǝ jemma sai, ako ye dǝɓlii ɓǝǝra , Jeremias, Jahaziel, Johanan, ne Jozabad, ara daŋ daga Gedera. 5 Eluzai, Jerimot, Bealia, Semaria, ne Sefatia daŋ daga Harof. 6 Elkana, Isija, Azarel, Joezer, ne Jaskobeam, ara daŋ daga morsǝ̃ǝ Kora, 7 Joela ne Zebadia wee Jeroham ma Gedor yo.
Za ma ga mor David kǝsyil ban Gad
8 Marai tǝɗii sooje maswah ah ra yo, so za ma ne tǝtǝl daga kǝsyil zahban Gad mai mo ŋgeera suu ɓǝǝ ge dan kǝsyil kul sooje David ne cok mai mo kaako ɓo pǝ cok maswah ah kǝsyicok yo. Tǝra ruu sal ne bal tǝkine 'nǝǝ zǝǝ ɓo no cam, a ẽera cok tǝgbana ɓolle, a ɗuura tǝgbana nǝǝmin waare. 9-13 Lǝǝra ɓo ne patǝtǝl naiko: Ezar, Obadias, Eliaɓ, Mismanna, Jeremias, Attai, Eliel, Johanan, Elzabad, Jeremias, ne Makbanai. 14 Za marai daŋ ye morsǝ̃ǝ ban Gad, ara ye zaluu sooje mai mo lwaara za ɓo ujenere ujenere, za ki laŋ ara ye zaluu ah mai mo lwaara za ɓo temere temere. 15 Ne fĩi patǝ vaŋno ah pǝzyil syii ahe, ne cok ah ka bii el Yordan ge kan ɓo ne zah cii lǝkahm lǝkahm, so yeera kal ge ruu sal ne za mai mo kaara ɓo pǝ cok ma tǝforoŋ kah el ah nǝfah morcomzah'nan ne morcomlil ah gwa daŋ, myahra za mai mo kaara ɓo gŋ vaŋno vaŋno.
Za ma ga mor David kǝsyil za Benyaamin ne Yuda
16 Za ki daga morsǝ̃ǝ ban Benyaamin ne Yuda kalra ge wo David pǝ cok muŋ ahe. 17 David ur ge zyaŋ tǝ ɓǝǝ faa nyi ra: We ge ɓo tǝgbana bai ka gbah jol ɓe ɓe, ka me nyiŋ we laŋ ɓe ta, we tai ne ru o. Amma we ge ɓo ka joŋ tǝkor ɓe nyi za syiŋ ɓe ɓe, ame joŋ ɓǝɓe' wo ɓii ya, Masǝŋ pa man lii ra a ga ẽe ɓǝ ah a ga ŋgoŋ kiita tǝ ɓiiri. 18 So Tǝ'yak Masǝŋ ge tǝ dǝɓ ki kǝsyil ɓǝǝ a ɗii dǝɓ ah ne Amasai, ako ye dǝɓlii za matǝ jemma sai kŋ, faa: David we Isai, aru ye ma ɓo, ru ge ɓo wo ɓo ka gbah jol ɓo, Masǝŋ no ne mo. David nyiŋ ra, so woo ra rǝk zaluu sooje ah ra ne ko.
Zahban Manasse ma ga mor David
19 Za ki kǝsyil sooje za zahban Manasse ur kalra ge mor David ne cok mai mo pǝ̃ǝ ne Filistien ka ga ruu sal ne Saul. (David ka tǝ ga gbah jol Filistien ya, mor ah zaluu ɓǝǝ yeera zah ah pii soo, a ɗuura gal ka mo joŋko tǝkor ɓǝǝ nyi dǝɓlii ah Saul ka.) 20 Sooje Manasse mai mo kalra ge mor David, ne cok David mo tǝ ga Ziklak a naiko: Adna, Jozabad, Jediel, Mikal, Jozabad, Elihu, ne Zelletai, ara daŋ ye zaluu mai mo lwaa sooje ɓo ujenere ujenere. 21 Joŋra yeɓ nyi David na zaluu ma pel sooje ah ra, mor ara daŋ sooje maswah ah ye ra. Fahfal ah so ciŋra zaluu sooje za Israel. 22 Zah'nan daŋ za mafuu ah a gin pǝzyil za sal David, sooje ah joŋ pǝpãare.
Pãa sooje David
23-37 Kul sooje mai mo bamra suu ne fan sal mo ge danra kǝsyil sooje David yaŋ Hebron ka gbah jol ah kaa goŋ pǝ cok Saul, tǝgbana Dǝɓlii mo faa ɓo, pãa ɓǝǝ a naiko: Za Yuda ma woora bal sal ne zǝǝ ara 6.800 Ban Simon mai mo feera ɓǝ sooje ɓo pǝsãh ara 7.100. Ban Lewi za 4.600. Jehojada dǝɓ morsǝ̃ǝ Aron a ne za 3.700. Sadok we tǝbanna mai mo tǝ ɓǝ sal ɓo ne za yaŋ pah ah zaluu ma pel za 22. Za Benyaamin mai Saul mo gee gŋ ge, ara 3.000. Kǝlii za Benyaamin ara mor Saul. Efraim: sooje maswah ah mai ara mo ne tǝɗii kǝsyil za ɓǝǝ 20.800. Za Manasse ma morcomlilli: za mai mo syenra ra ɓo ka mo ge kaara goŋ ne David ara 18.000. Isakar: zaluu 200, so tǝkine za ma ne tǝtǝl ah mai mo tǝra fan mai ka za Israel mo joŋ, tǝkine cok masãh ah mai ka mo joŋra fan ah ne ko. Zebulon: za mai mo zyeɓra suu ɓo ka gak ruu salle, mai mo tǝra fahlii ruu sal ɓo ne fan sal camcam daŋ, pãa ɓǝǝ 50.000. Naftali: za swah sooje 1.000, so za mai mo zyeɓra suu sal mo woora bal ɓo ne zǝǝ jol a 37.000. Dan: sooje mai mo feera ɓǝ sal ɓo a 28.600. Asǝr: za mai mo zyeɓra suu kaa ɓo ne ka ruu sal ara 40.000. Zahban ma Yordan nǝzakǝŋhaa nǝfah kǝmorcomzah'nanne - Ruben, Gad ne Manasse ma morcomzah'nanne: za mai mo feera ɓǝ sal ɓo moo gak ruura sal ne fan sal camcam ara 120.000.
38 Za mai mo zyeɓra suu sal ɓo naiko kalra ge yaŋ Hebron ka ɓaŋ David kan goŋ ne tǝ za Israel, tǝcoŋ za Israel mapãa ah daŋ laŋ 'yahra ka David ye mo kaa goŋe. 39 Ge nǝnra wo David zah'nan sai, joŋra fĩi rera farel ne fazwan mai wee pa ɓǝǝ mo joŋra mor ɓǝǝra. 40 Za maɗǝk ah ma mor zahban Isakar, Zebulon ne Naftali mai mo kaara ɓo nǝfah kǝsǝŋ, woora tǝwaare, summi, lee wuuri, lee kpuu camcam, lee kpuu vin tǝkine nǝm tǝbaakãm ge ne tǝ korro, njoŋnjoŋ, pǝr ma ɗii ne facwǝ̃ǝre, tǝkine dǝǝ, so gbahra dǝǝ ne gwii ge ne ka joŋ farel ne ren ta. Fan mai daŋ joŋ nai mor laa pǝ'nyah mai za mo tǝ laara pǝ sǝr Israel ne lii ah daŋ.
© Bible Moundang © Alliance Biblique du Tchad, 1996.
