1 KEE ƁƏ 19 - Bible Moundang (MUA)

David ik Ammonien ne Sirien

1 Fahfal ah comki, Nahas goŋ Ammon wuu, nan ah Hanun kaa goŋ pǝ cok ahe. 2 David faa: Me ga joŋ ɓǝ sãh wo Hanun we Nahas tǝgbana pah ah mo joŋ wo ɓe ta. David pee zan ah ka haozah wol ah ne ɓǝ wul pamme, amma ne cok mo ge daira pǝ sǝr Ammon wo goŋ Hanun, 3 zaluu Ammonien faara nyi goŋ Hanun: Mo lǝŋ ɗah ɓo David tǝ yii pa ɓo ko pee za ge ɓo tǝ haozah wo ɓo pǝ cok wul ah ne? Ka nai ya, peera ge ɓo nyee mor ka foo sǝr ka so gin ɗaŋni. 4 Hanun gbah za mai David mo pee ra ge wol ahe, swãa pyaŋ ɓǝǝ ge lalle, so ŋgom mbǝro ɓǝǝ gin sǝŋ ŋhaa ge kan tǝwaa zahmor taataa, so soɓ fahlii nyi ra gur kal o. 5 Swãa jin ga sǝr ɓǝǝ re ra pǝlli. Ne cok David mo laa ɓǝ fan mai mo joŋ ɓo, pepee ge wo ɓǝǝ faa nyi ra: We ge yaŋ ka ba, we kaa yaŋ Jeriko ka pyaŋ ɓii mo luu ɗao, ka we ge ba.

6 Goŋ Hanun ne Ammonien daŋ kwora ru ciŋ za syiŋ David ɓe, peera vãm solai nǝn ton jemma nai ge wo Sirien ma Mesopotamia, ne ma Maaka ne Zoba ka soo sooje tǝkine muŋta salle. 7 Muŋta sal mai mo soora ra ɓo 32.000 tǝkine za sal goŋ Maaka ge ɗǝrra gwari ne Medeba. Ammonien daŋ pǝ̃ǝra yaŋ ɓǝǝ ge lal zyeɓra suu ka ruu salle. 8 Ne cok David mo laa ɓǝ fan mai mo tǝ joŋni, so pee Joaɓ ne za sal daŋ kalra ge gŋ. 9 Ammonien pǝ̃ǝra ge dǝra sal ge lal zah yaŋ ɓǝǝ malii ma ɗii ne Rabba, za goŋ mai mo gera ɓo ka gbah jol ɓǝǝ laŋ, uura ma ɓǝǝ tǝnyiŋ 'wah lal cam.

10 Joaɓ mo ge kwo za sal za syiŋ ɓǝǝ pel tǝkine kǝfal ɓǝǝ daŋ, so syen sooje maswah ah kǝsyil sooje za Israel woora rǝk pel Sirien jaŋjaŋ. 11 So soɓ tǝcoŋ za sal manyeeki ah daŋ jol naa mah ah Abisai, woora laŋ rǝk pel Ammonien jaŋjaŋ ta. 12 Joaɓ faa nyi ko: Mo kwo Sirien mo kalra swah ɓe ɓe, ka mo ge gbah jol ɓe, Ammonien mo kalra swah ɓo laŋ, me ga gbah jol ɓo ta. 13 Na swaa suu mana, na uu pǝswah na ruu sal mor za man ne yaŋ maluu mai Masǝŋ man mo nyi ɓo nyi na. Dǝɓlii mo joŋko fan mai mo 'nyah suu ah ɓo. 14 Joaɓ ne za mai mo ne ki tǝŋ ruura sal ne Sirien, so Sirien ɗuura pel ɓǝǝra. 15 Ne cok Ammonien mo kwora Sirien mo tǝ ɗuura pel Abisai, so zolra kal fah yaŋ ɓǝǝ ta. So Joaɓ pii soo kal ge yaŋ Jerusalem.

16 Ne cok Sirien mo kwora za Israel ikra ra ɓo naiko, so pera pee ge tai za sal Sirien mai mo kaara ɓo kah el Efrat nǝfah kǝmorcomzah'nanne. Sobak swah sal Hadadezar ye kal pel ɓǝǝra. 17 So ne cok David mo laa ɓǝ ahe, David tai za sal Israel daŋ yee el Yordan ne ra, ge rǝk ra pel Sirien, so tǝŋra ruu salle. 18 Za Israel nĩira za sal Sirien. David ne za sal ah ikra pǝr ma kwak muŋta sal Sirien ujenere rǝŋ, mǝǝna ujenere jemma nai. So ira Sobak swah sooje sǝr Siria ta. 19 Ne cok za goŋ mai Hadadezar mo lwaa ra mo kwora za Israel moo ik ra naiko, so zyeɓra ɓǝ ka kaa jam ne David. David so lwaa ra ge mor jol tǝɗe'. 20 Fahfal ah Sirien ka zyiira ɓǝ gbah jol Ammonien yao.