'Yahe
1 Koo me gak faa ɓǝ ne zah dǝfuu, wala ne angeloi, me ka ne 'yah ya ɓe, ka ɓǝ faa ɓe a tǝgbana tǝwyah wala koŋkeere mai moo ciini. 2 Koo me ne fanɗǝǝ ma faa ɓǝ Masǝŋ nyi zana, koo me ne fatan fẽene daŋ, koo me tǝ mor ɓǝ ma tǝsyeɓ ɓo daŋ, koo me ne iŋ pǝlli ka me gak fiŋ waa pǝ cok ah ge cok ki, me ka ne 'yah ya ɓe, ka ame ye fan kolle. 3 Koo me woo fan ɓe daŋ wom nyi zana, koo me soɓ suu ɓe ka wii mo sye, amma me ka ne 'yah ya ɓe, ka ka ne yeɓ wo ɓe ya.
4 'Yah a ne rõm pǝlli, 'yah a kwan syakke, 'yah ka pǝ tǝwon a, ka yii suu ya, ka fuu suu ah ya, 5 ka rǝk swãa tǝ dǝɓ ya, ka kyeɓ fan mor suu ah to ya, ka ɓaŋ kpãh ya, ka gban ɓǝɓe' pǝ zahzyil a. 6 'Yah ka laa pǝ'nyah ne ɓǝɓe' ya, amma a laa pǝ'nyah ne goŋga. 7 'Yah a rõm fan daŋ, a nyiŋ fan daŋ, a byak fan daŋ, a pee pǝ fan daŋ mbaŋ.
8 'Yah ga lii, faa ɓǝ Masǝŋ a vǝrri, fanɗǝǝ ma faa ɓǝ ne zah camcam a vǝrri, fatan laŋ a vǝrri. 9 Mor fanɗǝǝ man ma fatanne, ne ma faa ɓǝ Masǝŋ a yea biŋ biŋ nai to. 10 Amma ne cok fan masãh ah mo ge ɓe, fan matǝ biŋ biŋ rai a ga vǝrri.
11 Ne cok me yea pǝlaŋne, me faa ɓǝ tǝgbana welaŋne, me foo ɓǝ na welaŋne, me joŋ fan na welaŋne. Amma zǝzǝ̃ǝko me joŋ dǝɓlii ɓe, me soɓ fan joŋ welaŋ ɓoo ɓe. 12 Zǝzǝ̃ǝko na tǝ ẽe goŋga tǝgbana dǝɓ moo ẽe cee pǝ fakwancee pǝryu pǝryu, amma cok ah mo ge ɓe, na ga kwo ryakryak ahe. Zǝzǝ̃ǝko me tǝ fan biŋ biŋ to, amma ne cok ah me ga tǝ belbel tǝgbana Masǝŋ mo tǝ me ɓo.
13 Zǝzǝ̃ǝko fan matǝ sai rai a yeara: iŋni, kyaŋni, ne 'yahe. Amma fan matǝ sai rai 'yah kal ra ɓo daŋ.
© Bible Moundang © Alliance Biblique du Tchad, 1996.
