Za yeɓ Masǝŋ
1 Wee pa ɓe, me ka gak faa ɓǝ wo ɓii tǝgbana za ma ne Tǝ'yak Masǝŋ ya, amma me faa wo ɓii tǝgbana za mai mo tǝ ɓǝ fan suu ɓo to. Awe tǝgbana wee nyee pǝ ɓǝ iŋ eklesia. 2 Me wol we ne wonni, me nyi farel maswah ah nyi we ya, mor we ka ga re ya, koo ŋhaa zǝzǝ̃ǝ laŋ we ka gak re ya ba. 3 Mor we kaa ɓo ne ɓǝ suu to na za sǝr maino. We joŋ tǝwon wo ki, we bǝǝ bal wo ki. Ne mai we ka tǝ cuu we ye za sǝr maiko ne joŋ tǝgbana za sǝr mai moo joŋra ya ne? 4 Ne cok dǝɓ ki kǝsyil ɓii moo faa: Ma ɓe me mor Paulus, so dǝɓ ki moo faa: Ma ɓe me mor Apollus, we ka tǝ joŋ tǝgbana za sǝr moo joŋra ya ne?
5 Azu ye Apollus ne? Azu ye Paulus ne? Aru ye za yeɓ Masǝŋ mai ru zaŋ we ciŋ za ma iŋ ɓo. Zune kǝsyil ɓuu daŋ a joŋ yeɓ mai Dǝɓlii mo nyi ɓo nyi ko ka joŋni. 6 Ame ruu ruu ah ge sǝŋ, Apollus ye sah bii ahe, amma Masǝŋ yee ciŋ ciŋ ahe. 7 Dǝɓ ma ruu ruu ah ne dǝɓ ma sah bii ah gwa daŋ ɓǝ mayǝk ye ka, amma ɓǝ mayǝk ah ako ye Masǝŋ moo ciŋ ciŋ ahe. 8 Dǝɓ ma ruu ah ne dǝɓ ma sah bii ah ara zahki. Masǝŋ ga soo zune daŋ kǝsyil ɓǝǝ tǝgbana yeɓ ah mo joŋko. 9 Mor aru ye za ma joŋ yeɓ mor Masǝŋ gwa daŋ. Awe ye 'wah Masǝŋ.
Awe ye yaŋ Masǝŋ ta. 10 Tǝgbana gboŋgboŋ mai Masǝŋ mo joŋ wo ɓe, me joŋ yeɓ ah tǝgbana pa vuu masãhe. Me kpir mor ah ɓe, dǝɓ ki ye tǝ vuu tǝl ah ga sǝŋ. Amma zune daŋ mo tǝ vuu ɓe, sai mo joŋko yella ne vuu ahe. 11 Mor Masǝŋ kpii mor ah ɓoo ɓe. Mor ah ako ye Yesu Kristu, dǝɓ ka gak kpii mor maki ah cam ya. 12 Za ki ga vuura ga tǝ kpii ah ne vãm kaŋnyeeri, wala vãm solai, koo ne tǝsal masyem ahe. So za ki ga vuura ga tǝl ah ne kpuu wala ne keesyerre, koo ne fãa. 13 Mor yeɓ zune daŋ a ga joo gin lal ne zah'nan mai Kristu mo kan ɓo. Mor ne zah'nan ah wii ga cuu yeɓ zune daŋ, wii ga lii yeɓ zune vaŋno vaŋno daŋ, yeɓ dǝɓ ah mo ɗǝne ɗǝne daŋ wii ga cuu. 14 Dǝɓ mo vuu tǝ kpii ah ne fan mai moo gak uu pel wii ɓe, dǝɓ ah ga lwaa soo. 15 Amma wii mo sye yeɓ dǝɓ ah ɓe, ka lwaa soo ah yao. Suu syak ah a ga ǝ̃ǝ, a ga yea tǝgbana nǝǝra ko ɓo gin tǝ wii ge lalle.
16 We tǝ sõone awe ye yaŋ Masǝŋ, Tǝ'yak Masǝŋ kaa ɓo pǝzyil ɓiiri we tǝ ya ne? 17 Koo zune mo ɓeɓ yaŋ Masǝŋ ɓe, Masǝŋ ga muŋ dǝɓ ahe. Mor yaŋ Masǝŋ a daŋdaŋ, awe ye yaŋ ahe.
18 Dǝɓ mo zyakko suu ah ka, koo zune kǝsyil ɓii mo lǝŋ zye ye pa fatan pǝ sǝr maiko, mo ciŋko tǝgwĩi, mor ka mo tǝko fanne. 19 Mor fatan sǝr mai a wo Masǝŋ na ɓǝ tǝgwĩi. Tǝgbana Ɗerewol mo faa: Masǝŋ gbah za fatan ɓo ne mǝmmǝǝ ɓǝ foo ɓǝǝra. 20 So Ɗerewol faa faɗa: Dǝɓlii tǝ ɓǝ foo za fatan ɓe, ɓǝ ah ɓǝ kol o. 21 Mor ah ka dǝɓ mo yiiko suu ah ne fan mai dǝfuu moo joŋ ka, mor fan daŋ ma ɓii yo. 22 Koo Paulus, koo Apollus, koo Petar, koo duniaru, wala koo cee, koo wulli, koo fan mai mo no zǝzǝ̃ǝko, koo mai mo tǝ gin pelle, fan marai daŋ ma ɓii yo. 23 Amma awe, we ye mǝ Kristu, Kristu mǝ Masǝŋ yo.
© Bible Moundang © Alliance Biblique du Tchad, 1996.
