Ɗii ki ga pel za ma bai iŋ ne ko
1 Kǝsyil ɓii dǝɓ ki mo no ne ɓǝ ne naa pam ɓe, we ɗii ki ga pel lakaali za bai iŋ ne bai ga pel za Masǝŋ ne mor fẽene? 2 We tǝ sõone za Masǝŋ ga ŋgoŋra kiita tǝ dunia ya ne? Ko we ga ŋgoŋ kiita tǝ dunia nanaa ɗao, we ka so gak ŋgoŋ kiita ɓǝ fan matǝ biŋ ya ne? 3 We tǝ sõone na ga ŋgoŋ kiita tǝ angeloi ya ne? Soko tǝgbana ɓǝ fan sǝr ma tǝ'nah ne? 4 We no ne kiita ɓǝ fan sǝr ma tǝ'nah kǝsyil ki ɓe, we so soɓ za mai eklesia moo kwan ra na za kol ka ŋgoŋ ah mor fẽene? 5 Me tǝ faa nyi we nai ka swãa mo re we. Ayee, mǝ nai dǝɓ ma ne fatan kǝka tǝgǝǝ ɓii koo vaŋno ka mo gak zyeɓko ɓǝ kǝsyil wee pam ya ne? 6 A pǝsãh no ka naa dǝǝ mo ɗii naa dǝǝ ge cok kiita ne ka soɓ za ma bai iŋ ŋgoŋ kiita tǝl ah ne?
7 'Manna, ɓǝɓe' no kǝsyil ɓiiri, mor naa dǝǝ ɗii naa dǝǝ ga cok kiita ne ko. We ka gak rõm ɓǝɓe' ah ya mor fẽene? Pǝram we ka soɓ ra kiŋ fan ɓii o ya ne? 8 Jeertǝ awe ye soo tǝ joŋ ɓǝɓe' tǝkine kiŋ nyin wo za ki ne mai wee joŋ wee pa ɓii naiko. 9 We tǝ sõone za matǝ vǝrvǝr ka ga rera Goŋ Masǝŋ ya, we tǝ ya ne? We zyak suu ɓii ka. Za ma bai goŋga, wala za ma syee mor masǝŋ ki cam, wala za joŋ ɓǝǝre, za ma swahra ne za wǝǝre, 10 za kiŋ nyinni, za cwaa fanne, za ma tǝǝ ne yimmi, za tǝtǝǝre, wala za kaafuu, za marai ka ga rera Goŋ Masǝŋ ya. 11 Za ki kǝsyil ɓii yeara nai ta. Amma zǝzǝ̃ǝko faɓe' ɓii vãh ɓe. Awe nǝǝ kan ɓo mor Masǝŋ o. We ciŋ za matǝ njaŋ ɓo pel Masǝŋ pǝ tǝɗii Dǝɓlii Yesu Kristu ne Tǝ'yak Masǝŋ mana.
We yii Masǝŋ ne suu ɓiiri
12 Za ki kǝsyil ɓii a faara: Me no ne fahlii ka joŋ fan daŋ. Oho, amma fan daŋ ka wo ɓii pǝsãh daŋ ya. Me gak faa: Me no ne fahlii ka joŋ fan daŋ. Amma me 'yah ka koo fẽene mo gbǝ me ciŋ byak ah ne ya. 13 Za ki a faara: Farel mor ɓǝrri, ɓǝr laŋ a mor farelle. Oho, amma Masǝŋ ga vǝr gwa daŋ. Amma suu dǝfuu ka mor joŋ ɓǝǝr a, a mor Dǝɓlii, Dǝɓlii laŋ a mor suu. 14 Masǝŋ mai mo ur Dǝɓlii gin pǝ wulli, a ga ur na gin pǝ wul ne swah ah ta.
15 We tǝ sõone suu ɓii fan suu Kristu ye ya ne? Me so ga ɓaŋ fan suu Kristu ko ka joŋ na fan suu matǝkoi ne? Ka nai ya. 16 Wala we tǝ sõone dǝɓ mo tai ki ne matǝkoi ɓe, ka ciŋ suu vaŋno ɓo ne ki we tǝ ya ne? Mor Ɗerewol faa: Ara gwa daŋ ga ciŋra suu vaŋno. 17 Amma dǝɓ mo tai ne Dǝɓlii ako ye tǝ'yak vaŋno ne ki.
18 We ɗuu ɓǝ ɓǝǝre. Faɓe' fẽene daŋ dǝɓ moo joŋni, a joŋ ma wo suu ah lalle, amma dǝɓ mo soɓ suu ah mor joŋ ɓǝǝre, ka tǝ joŋ faɓe' wo suu ahe. 19 We tǝ sõone suu ɓii ye yaŋ Tǝ'yak Matǝdaŋdaŋ mai mo kaa ɓo pǝzyil ɓiiri, Masǝŋ ye nyi Tǝ'yak ah ɓo we, we tǝ ya ne? Awe ye ka mǝ suu ɓii ya, amma we ye mǝ Masǝŋ. 20 Masǝŋ lee we ɓo pǝsyemme, mor ah we yii Masǝŋ ne suu ɓiiri.
© Bible Moundang © Alliance Biblique du Tchad, 1996.
