Fii tǝ ɓǝ nǝǝ mai moo joŋra syiŋ wo masǝŋ ki ra ne ko
1 Zǝzǝ̃ǝ na ẽe ɓǝ tǝ ɓǝ nǝǝ mai moo ŋgomra joŋ syiŋ wo masǝŋ ki ra ne ɗao. Goŋga yo, ana daŋ na no ne fatanne, tǝgbana we faa. Amma fatan a kǝǝ dǝɓ yii suu, 'yah a joŋ dǝɓ ga pel pǝ iŋni. 2 Dǝɓ mo lǝŋ zye tǝ fan ɓo ka ɓah tan ah tǝgbana mai mo tǝ 'yah ka tan ah ya ba. 3 Amma dǝɓ ma 'yah Masǝŋ, Masǝŋ tan dǝɓ ahe.
4 So tǝ ɓǝ ren nǝǝ ma joŋ syiŋ wo masǝŋ ki ra: fii mai mo fiira a naiko: Dǝɓ gak re nǝǝ mai moo ŋgomra joŋ syiŋ wo masǝŋ ki ra ne no ne? Na tǝ ɓe, Masǝŋ maki ah cam kǝka wo sǝr a, sai Masǝŋ a vaŋno to. 5 Koo moo ɗiira masǝŋ ki ra mor masyiibam tǝkine wo sǝr pǝlli - tǝgbana masǝŋ ki ra tǝkine dǝɓlii mo pǝpãare - 6 amma wo man Masǝŋ a vaŋno to. Ako ye Pa mana, ako ye joŋ fan daŋ, ana ne cee, na ye mǝ ahe. Dǝɓlii laŋ a vaŋno to, ako ye Yesu Kristu. Fan daŋ joŋ ɓo mor ahe, ana no mor ah ta.
7 Amma za tǝra goŋga mai ɓo ka daŋ ya. Mor za ki ciira ɓo ne ɓǝ masǝŋ ki ra pǝlli, ŋhaa zǝzǝ̃ǝko mo tǝ renra nǝǝ ɓe, a lǝŋra tǝgbana nǝǝ ma joŋ syiŋ wo masǝŋ ki cam yo. Fatan zahzyil ɓǝǝ pǝtǝtǝ̃ǝre, zahzyil nǝǝ ra ne ren farel ahe. 8 Farel ka gak zaŋ na ga wo Masǝŋ ya. Na ka tǝ ren a, fan ki ka so pee na mor ah ya. Na so tǝ renne, na ka ga lwaa fan ki mor ah ya ta.
9 Amma we joŋ yella ka lwaa tǝtǝl ɓii we lwaa ɓo we tǝ joŋ fan ne ko, ka mo joŋ za mai mo pǝtǝtǝ̃ǝ pǝ iŋ lee pǝ faɓe' ka. 10 Mor dǝɓ mai fatan zahzyil ah mo pǝtǝtǝ̃ǝ mo kwo mo dǝɓ ma ne fatan mo kaa ɓo tǝ ren fan ɓǝr yaŋ masǝŋ ki cam ɓe, ɓǝ ah ka ga taŋ fatan zahzyil ah ka so ren nǝǝ ma joŋ syiŋ wo masǝŋ ki ra ya ne? 11 Ne fahlii mai dǝɓ matǝtǝ̃ǝre, we pam mai Kristu mo wǝ mor ah a ga muŋ mor ɓǝ fatan ɓo. 12 We tǝ joŋ faɓe' ma morãi wo wee pa ɓii ne ɓeɓ fatan zahzyil ɓǝǝ matǝtǝ̃ǝ nai ɓe, ka we tǝ joŋ faɓe' wo Kristu ne suu ahe. 13 Mor ahe, farel mo tǝ ga joŋ we pa ɓe ka lee pǝ faɓe' ɓe, me ka re nǝǝ ya syaŋsyaŋ, mor ka me joŋ we pa ɓe lee ne ka.
© Bible Moundang © Alliance Biblique du Tchad, 1996.
