Paulus faa ɓǝ fahlii mai mo ne ko tǝkine yeɓ papee ahe
1 Me ka ne tǝtǝl suu ɓe ya ne? Me ye ka papee ya ne? Me kwo Dǝɓlii man Yesu ya ne? Awe ye ka lee syẽm yeɓ ɓe pǝ yeɓ Dǝɓlii sye ya ne? 2 Koo za ki mo zyii nyiŋra me na papee ya laŋ, ma ɓii we gak nyiŋ me. Ne fahlii mai we nyiŋ Dǝɓlii ɓo, awe ne suu ɓii we no na fan ma cuu ame ye papee.
3 Ɓǝ mai me tǝ zyii ka wǝǝ suu ɓe ne pel za mai mo tǝ faara ɓǝ tǝ ɓe a naiko: 4 Me ka ne fahlii ka lwaa farel tǝkine fazwan mor yeɓ ɓe ya ne? 5 Me ka ne fahlii ka ɓaŋ mawin ma iŋ ah kan ka so kyãh ne ko tǝgbana zapee manyeeki ah ne wee mah Dǝɓlii tǝkine Petar mo joŋra ya ne? 6 Wala ame ne Barnabas to ru ye ne fahlii ka joŋ yeɓ ne jol ɓuu ka wol suu ɓuu ne sǝ ne? 7 We laa sõone sooje mai moo ruu sal a so joŋ yeɓ soo suu ah ne we laa taa ɓe ne? Wala dǝɓ ma pǝǝ 'wah ka ren fakpãhpǝǝ ah mo pǝǝ ɓo ya ne? Wala dǝɓ ma pii fan ka zwan won fan ah mo tǝ pii ya ne?
8 We lǝŋ sõone me uu ɓo tǝ ɓǝ mai me tǝ cuu mor ah ne ɓǝ fan ma mor zah'nancee ma tǝ'nah nai sǝ ka, mor ɓǝ lai Mosus laŋ faa ɓo nai ta. 9 Ɓǝ ah ŋwǝǝ ɓo pǝ ɓǝ lai ah faa: We baŋ zah nyi ŋgǝǝri mai mo tǝ ɗuura sor ka. Masǝŋ tǝ foo ɓǝ ŋgǝǝri ye ne ɓǝ faa ah ne? 10 Faa ɓǝ ah ɓo ka tǝ ɓǝ man ya ne? Goŋga, ɓǝ ah ŋwǝǝ ɓo mor mana. Dǝɓ ma pǝpǝǝ ne dǝɓ ma ɗuu sor gwa daŋ mo joŋra yeɓ ɓǝǝ ne byak fan gaɓ ɓǝǝ gŋ. 11 Aru ruu nah fan ma tǝ'yak wo ɓiiri, ru so tǝ fii fan ma mor suu ma tǝ'nah jol ɓii ɓe, ka ɓǝ lii ye ne? 12 Za ki mo ne fahlii joŋ ah wo ɓii nai ɓe, aru ka ne fahlii ah kal ra ya ne? Amma ru ɓaŋ syiŋ joŋ ah ya. Jeertǝ ru rõm ɓǝ daŋ mor ka ru kan fan ma ɓee tǝ ɓal tǝl ah tǝ fahlii Ɓǝ'nyah Kristu ka. 13 We tǝ sõone za mai moo joŋra yeɓ yaŋ Masǝŋ a lwaara farel ɓǝǝ gin pǝ yaŋ Masǝŋ ta, we tǝ ya ne? Za mai moo ŋgomra fan joŋ syiŋ ne pǝ cok joŋ syiŋrĩ, a lwaara zah ma ɓǝǝ pǝzyil fan joŋ syiŋ ah ta. 14 Nai ta, Dǝɓlii faa ɓǝ ah ɓo kal za ma cuura Ɓǝ'nyah ka mo lwaara farel ɓǝǝ ne yeɓ ahe.
15 Amma me ɓaŋ syiŋ joŋ ɓǝ mai me no ne fahlii joŋ ah ya, so me ŋwǝǝ ɓǝ ah nai mor ka me fii fan ne me ɗǝǝ fan mor ah ya ta. Pǝram wul ɓe gin tǝ mai dǝɓ moo fer fahlii joŋ fan mai me ne ko ka ciŋ ɓǝ kolle. 16 Me ka ne fahlii ka yii suu ɓe mor me tǝ cuu Ɓǝ'nyahr a, mor ɓǝ ah kan ɓo tǝ ɓe na doole. Ne cok me soɓ cuu Ɓǝ'nyah ɓe, ɓǝ magaɓ ga yea tǝ ɓe. 17 Ame ye me nǝǝ yeɓ ah ɓo ne 'yah zahzyil ɓe tǝ joŋ ɓe, ka me gak byak fan soo ahe. Amma me tǝ joŋ yeɓ ah ne doole ɓe, sai me joŋ yeɓ ah tǝgbana yeɓ ah mo soɓ ɓo jol ɓe ka joŋni. 18 Ko soo ɓe gŋ ko makẽne? Mor ah me tǝ cuu Ɓǝ'nyahre, me cuu tǝkolle, me ka tǝ fii fan mai pa cuu Ɓǝ'nyah mo ne fahlii fii ah ya.
19 Ame ne tǝtǝl suu ɓe, me ye ka byak dǝɓ ya, amma me so joŋ suu ɓe ɓo na byak za daŋ mor ka me lwaa ǝ̃ǝ kǝlii zana. 20 Me tǝ joŋ yeɓ kǝsyil Yahuduen ɓe, me yea na Yahuduyo, mor ka me lwaa ǝ̃ǝ ra. Ne cok me tǝ joŋ yeɓ kǝsyil za ma syee mor ɓǝ lai Mosus ɓe, me yea tǝgbana me tǝ syee mor ah ta, mor ka me lwaa ra. Ne daŋ laŋ ame ne suu ɓe me ka tǝ syee mor ɓǝ lai ah ya. 21 Nai ta, ne cok me ne za mai mo tǝra ɓǝ lai Mosus ya ɓe, me yea tǝgbana ra, me ka kan syee ɓǝ lai Mosus ya, mor ka me ǝ̃ǝ ra. Mai cuu ɓo ka ŋ me ka tǝ syee mor ɓǝ lai Masǝŋ ya, ko ye ka, amma me tǝ syee mor ɓǝ lai Kristu. 22 Me kǝsyil za mai mo pǝtǝtǝ̃ǝ pǝ iŋni, me yea tǝgbana me pǝtǝtǝ̃ǝ ta, mor ka me ǝ̃ǝ ra. Ame joŋ suu ɓe ciŋ fan daŋ mor za daŋ, mor ka koo ne fahlii fẽene daŋ me lwaa ǝ̃ǝ za ki.
23 Me joŋ daŋ mor Ɓǝ'nyahre, mor ka ame laŋ me lwaa ẽe ahe. 24 We tǝ belbelle, za mai moo liira zah maɗul a ɗuura daŋ, amma sai dǝɓ vaŋno yee lwaa soo ahe. We ɗuu nai ta, mor ka we lwaa soo daŋ. 25 Koo zune kǝsyil za ma lii zah maɗul mo 'yah ka zye pǝ̃ǝ za ki ɓe, a zyeɓ suu ah uu ne pǝsãhe, a joŋra nai mor ka lwaa njok yǝk mai mo ka nǝn a. Amma ma man na tǝ joŋ mor ka lwaa njok yǝk mai moo yea ga lii. 26 Mor ahe, me tǝ ɗuu njaŋ ka me ge dai pǝ cok in zah ah mo ɗee ɓo. Mor ah laŋ ame tǝgbana pa ma in dǝɓ ne jol mai mo ka in cok kol a. 27 Me cak suu ɓe ne swahe, me gban ko na byakke, mor ame ye dǝɓ ma cuu nyi za ki ka mo so ɓoora me ge lal ka.
© Bible Moundang © Alliance Biblique du Tchad, 1996.
