1 Dǝɓ Masǝŋ maki no ur daga sǝr Yuda ge ne ɓǝ faa Dǝɓlii yaŋ Betel, ne cok ah ka Jeroboam uu ɓo kah cok joŋ syiŋ ka joŋ syiŋrĩ. 2 Dǝɓlii faa ɓǝ nyi dǝɓ yeɓ ahe, so dǝɓ ah ɓyaŋ ɓǝ tǝ cok joŋ syiŋ faa: Cok joŋ syiŋrĩ, cok joŋ syiŋrĩ, Dǝɓlii faa sye: A ga byaŋra we wor morsǝ̃ǝ David, a ɗii ne Josias, a ga gbah za joŋzahsyiŋ mai moo joŋra syiŋ tǝgee sǝŋ daŋ ka ŋgom joŋ syiŋ tǝ ɓo ne ra, a ga tǝǝ woiŋ dǝfuu tǝtǝl ɓo ta. 3 So cuu ɓǝ maki ah faɗa faa: We ga kwo fan ma cuu fan mai Dǝɓlii mo faa ɓǝ ah a ga joŋko, cok joŋ syiŋ ga dahe, sãh mai mo tǝtǝl ah a ga myah ga sǝŋ.
4 Ne cok goŋ mo laa dǝɓ Masǝŋ mo faa ɓǝɓe' tǝ cok joŋ syiŋ Betel naiko, nyen jol gin tǝ cok joŋ syiŋ ge lal faa: We gbǝ ko. Amma jol ah mai mo nyen ge ɓo tǝ dǝɓ Masǝŋ wǝ yak swaaraŋ, gak ka soo jin ga wo suu ah ne yao. 5 Cok joŋ syiŋ dahe, sãh mai mo tǝ cok joŋ syiŋ myah ge sǝŋ, tǝgbana fan ma cuu fan mai Dǝɓlii mo pee dǝɓ Masǝŋ mo faa nyi ra.
6 Goŋ faa nyi dǝɓ Masǝŋ: Mo pǝǝ Dǝɓlii Masǝŋ ɓo, mo juupel mor ɓe ka jol ɓe mo laɓɓe. Dǝɓ ah so pǝǝ Masǝŋ mor ahe, jol goŋ so laɓ ɓe, ge tǝgbana matãa. 7 Goŋ so faa nyi dǝɓ Masǝŋ: Mo ge yaŋ ne me, ka mo ge re farel ɗao, me ga nyi fan nyi mo ta. 8 Amma dǝɓ Masǝŋ faa nyi goŋe: Koo moo ga nyi raita yaŋ ɓo nyi me laŋ, me ka ga ne mo ya. Me ka re fan koo ka zwan fan ga zah pǝ cok mai ya. 9 Mor Dǝɓlii faa nyi me: Mo re farel ka, mo zwǝ bii ka, mo so jin syee tǝ fahlii mai mo tǝ syee gŋ ge ka ta. 10 So ɓaŋ fahlii ki kalle, ɓaŋ fahlii mai mo syee gŋ ge yaŋ Betel yao.
Profeto Masǝŋ so laa zah Masǝŋ ya
11 Amma profeto Masǝŋ matam ki no kaa ɓo Betel, wee ah ge keera ɓǝ fan mai dǝɓ Masǝŋ nyẽe mo joŋ com ah Betel daŋ nyi ko. Keera ɓǝ mai dǝɓ ah mo faa nyi goŋ nyi pa ɓǝǝ ta. 12 Pa ɓǝǝ fii ra faa: Ɓaŋ fahlii makẽe ɓo ne? Wee ah so cuura fahlii mai dǝɓ Masǝŋ mo gee Yuda ge mo ɓaŋ ɓo. 13 Faa nyi wee ahe: We baŋ tǝgaŋ nyi korro ɓe. Baŋra tǝgaŋ nyi korro, so yee kaa tǝl ahe. 14 Foo mor dǝɓ Masǝŋ kalle, ge lwaa kaa ɓo mor kpuu malii ahe, fii ko faa: Amo ye profeto Masǝŋ mai mo gee Yuda ge ko ne? Zyii zah ah faa: Ame ko yo. 15 Profeto matam faa nyi ko: Mo ge yaŋ ne me ka mo re farelle. 16 Amma zyii zah ah faa: Me ka ga ne mo ya, me ka re fan koo ka zwan fan pǝ cok mai ya. 17 Mor Dǝɓlii faa nyi me: Mo re farel koo ne zwan bii gŋ ka, mo so jin syee tǝ fahlii mai mo syee gŋ ne ga kao. 18 So dǝɓ ah faa nyi ko: Ame laŋ me ye profeto Masǝŋ tǝgbana mo ta. Dǝɓlii ye pee angelos ah ge ne ɓǝ faa nyi me: Mo ɗii ko ge yaŋ ɓo ne ko, ka mo reko farelle, mo zwǝko bii. Amma gwah ber ɓo nyi ko. 19 So dǝɓ Masǝŋ pii soo ne ki, ge re farel yaŋ ahe, zwǝ bii ta.
Profeto Masǝŋ lwaa kiita ahe
20 Ne cok ka kaara ɓo zah farel ba, ɓǝ faa Dǝɓlii ge wo profeto matam mo kaa ɓo Betel, 21 so ɗii dǝɓ Masǝŋ mai mo gee Yuda ge faa: Dǝɓlii faa sye: Amo zyii gban ɓǝ Dǝɓlii ya, mo syee mor ɓǝ mai Dǝɓlii Masǝŋ ɓo mo faa nyi mo ya. 22 Amo pii soo mo ge re farelle, mo zwǝ bii pǝ cok mai me faa nyi mo: Mo re farel koo ne zwan bii gŋ ka. Mor ahe, wul ɓo ka ga cii pǝ pal pa ɓo ra ya.
23 Ne cok mo re fan mo so zwǝ fan vǝrri, profeto matam baŋ tǝgaŋ nyi korro profeto maki ahe, pii soo ka kalle. 24 Ɓol ge lwaa ko tǝ fahlii, i ko pǝ wulli, wul ah ɓoo tǝ fahlii nooko, korro uu kah ahe, ɓol laŋ uu kah wul ah gwari. 25 Za mai mo tǝ pǝ̃ǝra fahlii mo ge kwora wul ah mo ɓoo ɓo tǝ fahlii, ɓol mo uu ɓo kah wul ahe, ge keera ɓǝ ah yaŋ mai profeto matam kŋ mo kaa ɓo gŋ.
26 Ne cok profeto Masǝŋ mai mo ge yee zah ah tǝ fahlii pii soo ne mo laa ɓǝ ah naiko, faa: Dǝɓ Masǝŋ mai mo zyii gban ɓǝ faa Dǝɓlii ya kŋ yo. Mor ah Dǝɓlii soɓ ɓol gbǝ ko, i ko pǝ wul tǝgbana ɓǝ mai Dǝɓlii mo faa ɓo nyi ko.
27 So faa nyi wee ahe: We baŋ tǝgaŋ nyi me tǝ korro. Baŋra tǝgaŋ ge nyi tǝ korro. 28 Yee tǝl ah kal ne ko, ge lwaa wul ah ɓoo ɓo tǝ fahlii, korro ne ɓol uura ɓo kah wul ahe. Ɓol re wul ah ya, gbǝ korro laŋ ya ta. 29 Profeto Masǝŋ ɓaŋ wul dǝɓ Masǝŋ kan ge tǝ korro kal ge yaŋ mai mo kaa ɓo gŋ ne ka cii ko tǝkine yee wul ahe. 30 Ɓaŋ wul ah sor ge pǝ pal ma syak ahe, so yera yee wul ah faa: Kaiya naa pa ɓe, mo wǝ ɓe!
31 Fahfal mo cii ko vǝrri, faa nyi wee ahe: Me wǝ ɓe, ka we cii me pǝ pal mai dǝɓ Masǝŋ mo cii ɓo gŋ, we kan wul ɓe ge kah ahe. 32 Mor ɓǝ mai Dǝɓlii mo faa tǝtǝl cok joŋ syiŋ Betel, tǝkine mai mo faa tǝtǝl cok mai mo vuura ɓo tǝgee sǝŋ mo pǝ yaŋ Samaria maluu daŋ, a ga joŋ baa ga cok ahe.
33 Fahfal fan mai mo joŋ, Jeroboam toobii soɓ fahlii ɓe' ah ra ya, so kal ne woo za joŋzahsyiŋ daga kǝsyil za daŋ ka joŋ yeɓ pǝ cok ma tǝgee sǝŋ. Koo zune mo 'yah daŋ, a nǝǝ ko kan mor ka joŋ yeɓ zahsyiŋ pǝ cok mai mo tǝgeere. 34 Ɓǝ mai gbǝr fahlii joŋ faɓe' nyi za yaŋ Jeroboam, mor ka mo vǝrra, morsǝ̃ǝ ɓǝǝ mo pee gin wo sǝrri.
© Bible Moundang © Alliance Biblique du Tchad, 1996.
