Elias ɗuu kal ge Horeɓ
1 Akaɓ kee ɓǝ fan mai Elias mo joŋ daŋ nyi Jesabel tǝkine mai mo ik profetoen Ba'al pǝ wul ne kafahe daŋ. 2 Jesabel pee dǝɓ ge wo Elias faa nyi ko: Tǝ'nan ne cok naiko, me ga i mo pǝ wul tǝgbana mo ik profetoen ɓe. Me joŋ nai ya ɓe, ka masǝŋ ɓe ra mo joŋra me nai sye nai sye, ŋhaa mo kal tǝl ah laŋ ta. 3 Gal re Elias ur ɗuu kal ka ǝ̃ǝ suu ahe, ge dai yaŋ Beerseba sǝr Yuda, ge soɓ dǝɓ yeɓ ah gŋ.
4 Amma pǝ̃ǝ mǝ ah kal ge fah kǝsyicokki, syee nǝn daidai syel zah'nan vaŋno wõi, ge kaa mor kpuu ki, so cwaa wul nyi suu ah ka zye wuu. Faa: Kii ɓe Dǝɓlii, mo ɓaŋ me o, mor me kal pa ɓe ra ne sãh ya.
5 Swǝ ge sǝŋ nǝnǝm mor kpuu ahe. Amma angelos ge laŋ ko faa nyi ko: Mo ur mo re fanne. 6 So ur sǝŋ ẽe cokki, kwo farel kan ɓo kah tǝtǝl ah tǝkine daŋ kan ɓo ne bii, re, zwǝ, so swǝ ge sǝŋ kpǝ. 7 Amma Angelos Dǝblii so ge wol ah patǝ gwa ah laŋ ko faa: Mo ur mo re fanne, mor mo tǝ ga gwǝǝ maɗǝkki, maki a ga yea pǝgaɓ wo ɓo. 8 Elias ur re farelle, so ur syel kal ne swah farel ah zah'nan jemma nai, suŋ jemma nai ŋhaa ge dai waa Masǝŋ moo ɗii ne Horeɓ .
9 Ge dan pǝ yii gŋ, swǝ pǝ yii ahe. So Dǝɓlii faa nyi ko: Amo joŋ fẽe nyee ne Elias? 10 Elias zyii faa: Ame tǝ joŋ tǝwon mor Dǝɓlii ma ne swah daŋ, mor za Israel soɓra ɓǝ gbanzah ɓo ɓe, dahra cok joŋ syiŋ ɓo ge lalle, ikra profetoen ɓo ne kafahe, ame ye coŋ ɓo syak ɓe to, amma so tǝ kyeɓra ka in me pǝ wul ta. 11 So faa nyi ko: Mo pǝ̃ǝ mo ge uu pel ɓe tǝwaare. So Dǝɓlii ge pǝ̃ǝ cok ahe. Zyak ma'man ge kuu pǝswahe, waa tǝsal ge sǝŋ dah pǝɗakka. Amma Dǝɓlii kǝka pǝzyil zyak ah ya. Fahfal zyak ah sǝr so coo, amma Dǝɓlii ka pǝzyil sǝr ah ya. 12 Fahfal coo sǝrri, wii ge, amma Dǝɓlii kǝka pǝzyil wii ah ya. Fahfal wii laŋ kyaŋ cii, kyaŋ cii ge pǝnyiŋ syik.
13 Ne cok Elias mo laa, so rii cok nahnǝn ah ne mbǝro ahe, pǝ̃ǝ ge uu zah yii lalle. So kyaŋ faa ɓǝ ge nyi ko: Mo joŋ fẽe nyee ne Elias? 14 Elias zyii faa: Ame tǝ joŋ tǝwon pǝlli mor Dǝɓlii Masǝŋ ma ne swah daŋ, mor za Israel soɓra ɓǝ gbanzah ɓo ɓe, dahra cok joŋ syiŋ ɓo ge lalle, ikra profetoen ɓo ne kafahe, ame ye coŋ ɓo syak ɓe to, amma tǝ kyeɓra ka in me pǝ wul ta.
15 Dǝɓlii faa nyi ko: Mo pii soo mo ɓaŋ fahlii ɓo matãa ma ga fah kǝsyicok Damaskus. Mo ge dai gŋ ɓe, mo syee nǝm tǝ Hazayel kan goŋ sǝr Siria ne ko. 16 So mo syee nǝm tǝ Jehu we Nimsi kan goŋ Israel ne ko, mo so syee nǝm tǝ Elisa we Safat ma Abel-Mehola ka mo kan profeto ne pǝ cok ɓo. 17 Dǝɓ mai moo ga ǝ̃ǝ zah kafahe Hazayel, Jehu ga i ko pǝ wulli, dǝɓ mai moo ga ǝ̃ǝ zah kafahe Jehu, Elisa ga i ko pǝ wulli. 18 Amma me ga coŋ za ujenere rǝŋ kǝsyil za Israel, za mai mo keara ge sǝŋ juupel pel Ba'al a.
Ɗii Elisa
19 So Elias ur kalle, ge lwaa Elisa we Safat ka tǝ pǝpǝǝ ne dǝǝ pel ah zahsol ki gwa gwa jemma tǝtǝl gwa, amma patǝ jemma tǝtǝl gwa ah ako ye tǝ pǝǝ ne ko ne suu ahe. Elias ge wol ahe, ge ɓoo mbǝro ah ge nyi tǝtǝlli. 20 Elisa soɓ dǝǝ pǝpǝǝ ahe, so ɗuu kal ge mor Elias faa: Mo soɓ me ge faa we ɗah kaa jam o nyi pa ɓe ne ma ɓe ɗao, ka me so ge mor ɓo ba. Elias faa nyi ko: Mo gyo ka mo pii soo ge, mo foo ɓǝ fan mai me joŋ ɓo wo ɓo. 21 Elisa soɓ ko, so ge woo ŋgǝǝri matǝ gwa ŋgommi, so kǝǝ nǝǝ ah ne kpuu zahsol dǝǝ, so nyi nyi za rera. So ur kal ge mor Elias ge joŋ yeɓ ne ki.
© Bible Moundang © Alliance Biblique du Tchad, 1996.
