Salomo ɓaŋ sunduku gbanzah ge yaŋ Masǝŋ ne ko
(2 KeeƁ 5:2–6:2)1 So Salomo tai zaluu Israel, ne zaluu ma mor ban tǝkine zaluu ma piicel Israel daŋ, gera wo Salomo yaŋ Jerusalem mor ka ɓaŋ sunduku gbanzah gin pǝ yaŋ David mai mo Sion. 2 Za wǝǝ Israel daŋ taira ge wo goŋ Salomo pǝ fĩi ma ɗii ne Etanim, tǝgba faa: pǝzyil fĩi patǝ rǝŋ ahe. 3 Zaluu Israel daŋ gera. 4 So za joŋzahsyiŋ ɓaŋra sunduku Dǝɓlii ne tal mbǝro taini, ne fan yeɓ mai mo nǝǝ rǝk ɓo mor yeɓ Dǝɓlii mo ɓǝr tal mbǝro ah daŋ, za joŋzahsyiŋ ne Lewitien woora kal ne ko. 5 Goŋ Salomo ne za Israel mo taira ɓo wol ah daŋ, uura pel sunduku, ŋgomra pǝsǝ̃ǝ ne dǝǝ joŋ syiŋ ne ko, pãa ah ka gak kee ya.
6 So za joŋzahsyiŋ ɓaŋra sunduku gbanzah Dǝɓlii ge kanra pǝ cok ah ɓǝr yaŋ ma fahfal mor yee cerubim pǝ cok matǝdaŋdaŋ tǝɗe'. 7 Mor cerubim syelra yee ɓǝǝ ge ɓo tǝ cok mai sunduku mo gŋ. Cerubim riira tǝ sunduku ne kǝndaŋ ah ra ɓo. 8 Kǝndaŋ ah ra pǝwah no cam, dǝɓ gak kwan zah kǝndaŋ ah ga ɓǝr yaŋ matǝdaŋdaŋ pel yaŋ matǝdaŋdaŋ tǝɗe', amma nefah kǝlal ɓe, ka gak kwan a. A no gŋ ŋhaa tǝ'nahko. 9 Fan ki kǝka ɓǝr sunduku ah ya, sai tǝsal ma'ah matǝ gwa ye to, Mosus rǝk ge ɓǝr sunduku tǝwaa Horeɓ ne cok mai Dǝɓlii mo gbǝ zah ne za Israel fahfal mo pǝ̃ǝra gin sǝr Egiɓ. 10 Ne cok za joŋzahsyiŋ mo pǝ̃ǝra gin pǝ cok matǝdaŋdaŋ, swãh ge baa yaŋ Dǝɓlii kǝrkǝr. 11 Mor swãh ah mo baa naiko, za joŋzahsyiŋ gak uura gŋ ka joŋ yeɓ ɓǝǝ ya, mor yǝk Dǝɓlii baa yaŋ ah ɓo kǝrkǝrri.
12 So Salomo faa: Dǝɓlii, amo faa mo ga kaa pǝ cokfuu. 13 Ame vuu yaŋ kal ɓo nyi mo, pǝ cok mai ka mo kaa gŋ ga lii ga lii.
Salomo faa ɓǝ nǝǝ yaŋ Masǝŋ
(2 KeeƁ 6:3-11)14 Za Israel daŋ uura ɓo ne ɓalle. Goŋ so jin nahnǝnni, fii ẽe Masǝŋ tǝ za Israel mo taira ɓo gŋ daŋ. 15 So faa: Osoko wo Dǝɓlii Masǝŋ Israel mai mo faa ɓǝ nyi pa ɓe David ne zah ahe, so joŋ ɓǝ mai mo faako vǝr ne jol ahe. 16 Mor faa: Daga zah'nan mai me pǝ̃ǝ ne za ɓe Israel daga sǝr Egiɓ, me nǝǝ yaŋ ki kǝsyil ban Israel koo vaŋno ka me vuu yaŋ gŋ ka tǝɗii ɓe mo yea gŋ ya. Amma me nǝǝ David ka mo kaako goŋ tǝ za ɓe Israel. 17 Pa ɓe David foo kǝnah pǝ zahzyil ah ka zye vuu yaŋ mor tǝɗii Dǝɓlii Masǝŋ Israel. 18 So Dǝɓlii faa nyi pa ɓe David: Ɓǝ mai mo faa pǝ zahzyil ɓo ka vuu yaŋ mor tǝɗii ɓe, mo joŋ ɓo pǝsãhe. 19 Amma mo ka vuu yaŋ ah ya, sai we ɓǝr ɓo mai moo ga byaŋ ne suu ɓo ako ye ga vuu yaŋ mor tǝɗii ɓe. 20 Dǝɓlii so joŋ ɓǝ faa ah mai mo faako. Zǝzǝ̃ǝko ame uu ɓo pǝ cok pa ɓe David, me kaa goŋ ɓo tǝ za Israel tǝgbana Dǝɓlii mo faa ɓo. Me vuu yaŋ mai ɓo mor tǝɗii Dǝɓlii Masǝŋ Israel. 21 Ame zyeɓ cok ɓǝr ah mor ka sunduku gbanzah Dǝɓlii mo kan gŋ, Dǝɓlii gbǝ zah mai ne pa ɓuu lii ra ne cok mo pǝ̃ǝ ne ra gin sǝr Egiɓ.
Juupel Salomo
(2 KeeƁ 6:12-42)22 So Salomo uu pel cok joŋ syiŋ wo Dǝɓlii ne nahnǝn za Israel mo taira ɓo daŋ, wai jol ah ge sǝŋ gwa daŋ, 23 faa:
Dǝɓlii Masǝŋ Israel, Masǝŋ maki ah ma na mo kǝka. Koo sǝŋ pǝ coksǝŋ, koo tǝ sǝr sǝŋ laŋ kǝka, amo, mo tǝ byak ɓǝ gbanzah ɓo tǝkine kwan syak tǝ za yeɓ ɓo mai moo syeera mor ɓo ne zahzyil vaŋno. 24 Ɓǝ mai mo faa nyi pa ɓe David mo joŋ baa ge ɓo cok ahe. Amo faa ne zah ɓo, mo so joŋ ɓǝ ah vǝr ɓo ne jol ɓo, tǝgbana ɓǝ ah mo joŋ ɓo tǝ'nahko. 25 Zǝzǝ̃ǝko Dǝɓlii Masǝŋ Israel, mo joŋ ɓǝ mai mo faa ɓo nyi dǝɓ yeɓ ɓo pa ɓe David baa ge cok ahe, mor mo faa nyi ko: Mo ka pee dǝɓ ma kaa tǝ fakal goŋ Israel pel ɓe ya. Amma sai wee ɓo mo joŋra yella, mo syeera mor ɓe tǝgbana mo syee mor ɓe. 26 Mor ahe, Masǝŋ Israel, mo soɓ ɓǝ faa ɓo mai mo faa ɓo nyi dǝɓ yeɓ ɓo pa ɓe David joŋ na mo faa.
27 Amma Masǝŋ a ga kaa tǝ sǝr nyee 'manna ne? Mo ẽe sǝŋ ne coksǝŋ ah ra, ka gak kii mo ya, soko ne yaŋ mai me vuu ɓo mor ɓo ne? 28 Oseni, Dǝɓlii Masǝŋ ɓe, mo foo ɓǝ juupel ɓe ne pǝǝ ɓe me tǝ pǝǝ mo, mo syii sok mo laa yee ɓe ne juupel ɓe me tǝ juupel pel ɓo tǝ'nahko. 29 Mo gbǝr nahnǝn ɓo mo ẽe yaŋ mai com ne suŋ daŋ, mo ẽe cok mai mo faa: Me ga cuu suu ɓe gŋ. Mo laa juupel mai me tǝ juu wo ɓo pǝ cok maiko. 30 Ame ne za ɓo Israel mo pǝǝra mo pǝ cok mai ɓe, mo laa pǝǝ ɓuuru. Oho, mo laa ge cok kal ɓo coksǝŋ, mo laa, mo rõm ru ta.
31 Dǝɓ mo joŋ faɓe' wo jǝk ah ɓe, mo so faara nyi ko mo haako zahe, so mo ge tǝ haa zah pel cok joŋ syiŋ ɓǝr yaŋ mai ɓe, 32 ka mo laa ge cok kal ɓo sǝŋ, ka mo joŋ yeɓɓe, mo ŋgoŋ kiita tǝ za yeɓ ɓo, mo faa ɓǝɓe' tǝ pa ma joŋ faɓe', mo soɓ ɓǝɓe' ah ge tǝtǝl ahe. Mo joŋ dǝɓ ma bai ɓǝɓe' njaŋ, mo soo ko tǝgbana njaŋ ahe.
33 Ne cok za ɓo Israel mo ɗuura pel za syiŋ ɓǝǝ mor joŋra faɓe' ɓo wo ɓo ɓe, mo so jinra ge wo ɓo mo ɗiira tǝɗii ɓo, mo so juura pel mo pǝǝra mo ɓǝr yaŋ mai ɓe, 34 ka mo laa ge coksǝŋ, mo rõm faɓe' za ɓo Israel, mo so jin ra ge pǝ sǝr mai mo nyi nyi pa ɓǝǝ lii.
35 So masyiibam sǝŋ mo coo, bam mo tǝ ya mor joŋra faɓe' ɓo wo ɓo ɓe, mo so ge juura pel wo ɓo pǝ cok mai mo ɗiira tǝɗii ɓo, mo so toora bii tǝ ɓǝɓe' mai mo lai ra ɓo ne ɓǝ ah ɓe, 36 ka mo rõm faɓe' za yeɓ ɓo, za ɓo Israel, mor ka mo cuu fahlii masãh mai ka mo syeera gŋ ɓo nyi ra. Mo pee bam tǝ ge tǝ sǝr mai mo nyi ɓo nyi za ɓo ka mo rera.
37 So koŋ mo ge wǝ wo sǝrri, wala mo syem maɓe' ma zǝǝ za ye mo ge ɓo, koo sor mo yakke, wala mǝǝvǝm ne tǝzyee ye mo ge, wala tǝcwãa ye mo byaŋ, wala za syiŋ ɓǝǝ ye mo ge ryaŋ zah ɓǝǝ pǝ yaŋ ɓǝǝ maki ah vaŋno, koo mo bone fẽene ye mo ge, koo mo syem yo, 38 ka koo mo zune yo wala mo za ɓo Israel daŋ yo, koo mo zu ye kǝsyil ɓǝǝ mo tǝ ɓǝɓe' zahzyil ahe, mo cuu jol ah ge wo yaŋ mai ɓe, 39 ka mo laa ge pǝ cok kal ɓo coksǝŋ, mo rõmme, mo joŋ yeɓɓe, mo soo zune daŋ tǝgbana yeɓ ahe, mor mo tǝ zahzyil ah ɓe, mor amo syak ɓo mo ye tǝ zahzyil dǝfuu ɓo. 40 Mo joŋ mor ka mo ɗuura gal ɓo pǝ zah'nan cee ɓǝǝ mo kaara ɓo tǝ sǝr mai mo nyi nyi pa ɓuu lii.
41 Ne cok za mo ga faara ɓǝ yǝk tǝɗii ɓo tǝkine swah ɓo mai mo joŋ ɓo, za gwǝǝ laŋ ga laara ɓǝ ahe. 42 So za gwǝǝ mai mo ye ka za ɓo Israel a, mo ur gin sǝr maɗǝk ge juupel pǝ yaŋ mai ɓe, 43 ka Dǝɓlii mo laa ge coksǝŋ pǝ cok kal ɓo mo gŋ, mo joŋ tǝgbana fan mai dǝɓ gwǝǝ mo fii mo mor ah daŋ, mor ka za sǝr daŋ mo tǝra tǝɗii ɓo, ka mo ɗuura mo tǝgbana za ɓo Israel, mor ka mo tǝra tǝɗii ɓo mai mo ɗii ɓo pǝ yaŋ mai me vuu ɓo.
44 So za ɓo mo pǝ̃ǝra ka ga ruu sal ne za syiŋ ɓǝǝ ne fahlii mai mo ye mo pee ra ge ɓe, mo so juura pel wo Dǝɓlii mo rǝkra nahnǝn ge wo yaŋ Jerusalem mai mo nǝǝ ɓo tǝkine yaŋ mai me vuu ɓo mor tǝɗii ɓo ɓe, 45 ka mo laa ge coksǝŋ, mo laa juupel ɓǝǝ ne pǝǝ ɓǝǝra, mo gbah jol ɓǝǝra.
46 So mo joŋra faɓe' wo ɓo ɓe - mor dǝfuu ma bai joŋ faɓe' kǝka - mo so ɓaŋ kpãh tǝ ɓǝǝ mo soɓ ra ge mor jol pa syiŋ ɓǝǝ mo woo ra na byak kal ge sǝr ah ne ɓe, koo mo pǝɗǝkki, wala mo gwari, 47 mo so foora ɓǝ pǝ zahzyil ɓǝǝ pǝ sǝr mai mo gera ɓo gŋ na byakke, mo toora bii mo pǝǝra mo pǝ sǝr mai ara mo gŋ na byakke, mo faara: Aru joŋ faɓe' ɓe, ru joŋ fan ma nen bai joŋ ah ne maɓe' ah ɓe, 48 mo jinra ge wo ɓo ne zahzyil ɓǝǝ ne mazwãhsuu ɓǝǝ daŋ pǝ sǝr za syiŋ ɓǝǝ mai mo woora ra na byak kal ge ɓo gŋ ne ɓe, mo so juura pel wo ɓo gŋ ŋhaa rǝk nahnǝn ge pǝ sǝr mai mo nyi nyi pa ɓǝǝ lii ne yaŋ Jerusalem mai mo nǝǝ ɓo tǝkine yaŋ mai me vuu ɓo mor tǝɗii ɓo ɓe, 49 ka mo laa juupel ɓǝǝ ne pǝǝ ɓǝǝra, mo gbah jol ɓǝǝra. 50 Mo rõm faɓe' za ɓo mai mo joŋra ɓo wo ɓo tǝkine ɓǝɓe' camcam daŋ mo joŋra ɓo, mo joŋ ka tǝtǝl mo 'mĩi za mai mo gera ɓo pǝ byak sǝr ɓǝǝ tǝ ɓǝǝra, ka mo kwora syak tǝtǝl ɓǝǝra. 51 Mor ara ye za ɓo, za ka syak ɓo ye ra, amo pǝ̃ǝ ne ra gin sǝr Egiɓ pǝ cok gaɓ tǝgbana pǝzyil wii.
52 Mo gbǝr nahnǝn ɓo, Dǝɓlii Masǝŋ, mo laa pǝǝ ɓe tǝkine mǝ za ɓo ru ga pǝǝ mo ne cok fẽene daŋ. 53 Mor amo ye nǝǝ ru gin kǝsyil zahban za sǝr daŋ ka ru ciŋ za ma ɓo. Tǝgbana mo faa ɓǝ ah ne zah dǝɓ yeɓ ɓo Mosus, ne cok mo pǝ̃ǝ ne pa ɓuu lii ra daga gin sǝr Egiɓ, mo baa ɓǝ ah ge cok ah ryakryak.
Salomo fii ẽe Masǝŋ
54 Ne cok Salomo mo tǝ juupel wo Dǝɓlii, kea ɓo sǝŋ pel cok joŋ syiŋrĩ, wai jol ge ɓo sǝŋ. Fahfal mo vǝr juupel wo Dǝɓlii, so ur sǝŋ. 55 Uu sǝŋ. Ɓyaŋ ɓǝ ne kyaŋ pǝ'man fii ẽe Masǝŋ tǝ za Israel mo taira ɓo gŋ daŋ, faa:
56 Osoko wo Dǝɓlii mai mo nyi 'yak nyi zan ah Israel tǝgbana ɓǝ mai mo faako ɓo daŋ, koo ɓǝ vaŋno kǝsyil ɓǝ sãh ah mai mo faako ne zah dǝɓ yeɓ ah Mosus daŋ cee ge lal a. 57 Dǝɓlii Masǝŋ man mo yeako ne na tǝgbana mo yea ne pa man lii ra, mo soɓko na ka, mo yaŋko na ka ta. 58 Amma mo ferko zahzyil man ge wol ahe, ka na syee fahlii ah ra, na gbǝ ɓǝ lai ahe, tǝkine ɓǝ faa ah ra mai mo faa nyi pa man lii ra. 59 Ɓǝ faa ɓe mai me tǝ faa pǝǝ Dǝɓlii ne ko, mo yea pel Dǝɓlii Masǝŋ man com ne suŋ daŋ, ka mo nyiŋko goŋga ɓǝ faa ɓe ne ɓǝ zan ah Israel zah'nan daŋ tǝgbana 'yah man na tǝ 'yahe, 60 mor ka za sǝr daŋ mo tǝra, Dǝɓlii ako ye Masǝŋ to, maki ah na ko kǝka. 61 We soɓ zahzyil ɓii daŋ yea wo Dǝɓlii Masǝŋ man tǝɗe', we woŋ ki ne ki ka, we syee mor ɓǝ lai ah ra, we gbǝ ɓǝ faa ah tǝgbana ma tǝ'nahko.
Syiŋ ma joŋ wo Dǝɓlii
(2 KeeƁ 7:4-10)62 So goŋ ne za Israel mo ne ki daŋ ŋgomra fan joŋra syiŋ ne pel Dǝɓlii. 63 Salomo ŋgom dǝǝ 22.000, ne pǝsǝ̃ǝ 120.000, joŋ syiŋ ma nyi jam ne pel Dǝɓlii. Goŋ ne za Israel daŋ joŋra syiŋ ka gbǝr zahfah yaŋ Dǝɓlii ne ko. 64 Com moo, goŋ joŋ cok zahɓel ma pel yaŋ Masǝŋ, daŋ ciŋ cok ma joŋ yeɓ pel Masǝŋ ka tǝǝ syiŋ suŋwii gŋ ne joŋ syiŋ ma farelle, tǝkine nǝm nǝǝ ma joŋ syiŋ ma nyi jam. Mor cok joŋ syiŋ ma ne vãm syẽ a pǝlaŋne, kii mor ka joŋ syiŋ marai gŋ daŋ ya.
65 Ne cok ah Salomo joŋ fĩi Jul ne za Israel mo ne ki daŋ. Za taira pǝlli, tǝŋ daga pǝ cok yee bii Hamat ŋhaa ge dai ne el sǝr Egiɓ. Joŋra fĩi pel Dǝɓlii Masǝŋ man zah'nan rǝŋ. 66 So ne zah'nan nama ah nyi fahlii nyi za kalra o. Joŋra osoko nyi goŋe, kalra ge fah yaŋ ɓǝǝ ne laa pǝ'nyahre. Zahzyil ɓǝǝ laa pǝ'nyah pǝlli, mor ɓǝ sãh mai Dǝɓlii mo joŋ wo dǝɓ yeɓ ah David, ne zan ah Israel daŋ.
© Bible Moundang © Alliance Biblique du Tchad, 1996.
