Tǝsal ma ne cee, ne za matǝdaŋdaŋ
1 We soɓ ɓǝɓe' camcam daŋ ge lalle: gwah berre, vǝrvǝrri, tǝwonni, tǝkine ɓǝ faa maɓea ah daŋ. 2 We yea tǝgbana wee pǝ̃ǝ, cẽecẽe we yea ne koŋ won tǝ'yak masãhe. Mor we tǝ zwan ɓe, we ga giŋ ne ko, we ga ǝ̃ǝ. 3 Tǝgbana Ɗerewol mo faa: “Zǝzǝ̃ǝko we laa 'nyah Dǝɓlii ɓe.”
4 We tǝɓ ge wo Dǝɓlii, ako ye tǝsal ma ne cee mai dǝfuu mo ɓoora ge lalle, amma Masǝŋ nǝǝ ko, kwo ko pǝyǝkki. 5 We tǝɓ ge tǝgbana tǝsal ma ne cee, we soɓ Masǝŋ mo vuu yaŋ ah ne we, ka we joŋ yeɓ tǝgbana za joŋzahsyiŋ Masǝŋ, ka joŋ syiŋ ma tǝ'yak ka 'nyah suu Masǝŋ ne Yesu Kristu. 6 Mor Ɗerewol faa:
Me nǝǝ tǝsal mayǝk ah ɓo,
Zǝzǝ̃ǝ me ɓaŋ ko kan tǝsal nyah yaŋ Sion ɓo ne ko.
Dǝɓ mo nyiŋ ko ɓe,
Swãa ka ga re dǝɓ ah ya.
7 Tǝsal mai a pǝyǝk wo ɓii za ma iŋ ah pǝlli, amma ma wo za ma bai iŋni:
Tǝsal mai za ma vuura yaŋ mo ɓoora ge lalle,
So jin ciŋ tǝsal mayǝk lii ah ɓo.
8 So faa ɓo pǝ Ɗerewol pǝ cok maki ahe:
Tǝsal mai za ga ɓea tǝ ɓal tǝl ahe,
Za ga leara tǝ pǝɗakka ahe.
A ga ɓeara tǝ ɓal tǝl ahe, mor zyii nyiŋra ɓǝ ah ya, so Masǝŋ kan ra ɓo mor mai ta.
9 Amma awe, we ye ban mai mo syen ɓo, we ye za joŋzahsyiŋ Goŋe, za matǝdaŋdaŋ, za mǝ Masǝŋ, Masǝŋ syen we mor ka we cuu ɓǝ yeɓ ah malii, mai mo ɗii we ka pǝ̃ǝ gin pǝ cokfuu ka ga pǝ cokfãi ah matǝ gǝriŋ. 2:14; Esa 9:1 10 Ɓaaɓe we ye ka yea za Masǝŋ ya, amma zǝzǝ̃ǝko awe ye zan ah o. Ɓaaɓe we yea tǝ ɓǝ kwan syak Masǝŋ ya, amma zǝzǝ̃ǝko kwo syak tǝ ɓii ɓe.
We yea na za yeɓ Masǝŋ
11 Me lai we za 'yah ɓe, awe tǝgbana za gwǝǝ mai mo tǝ kyãhra gwǝǝ tǝ sǝr maiko, we byak suu ɓii wo fan cwaa suu dǝfuu mai moo ruu sal ne mazwãhsuu. 12 We syee kǝsyil za ma bai iŋ pǝsãhe. Koo mo tǝ tǝǝra we tǝgbana za joŋ faɓe' laŋ, mo tǝ kwanra yeɓ sãh ɓii ɓe, doole a ga yiira Masǝŋ com ah moo ga ge ne ko.
13 We yea ne laa zah mor tǝɗii Dǝɓlii. Koo zu ye ne mo ne swah tǝ za daŋ, we laa zah ahe, we laa zah goŋ mo pǝyǝk kal za daŋ, 14 tǝkine govener mai goŋ mo pee ra ɓo mor ka ŋgoŋ kiita tǝ za ma joŋra faɓe', a ga sãara za mai moo joŋra fan sãhe. 15 Mor fan mai Masǝŋ mo tǝ 'yahe, ako ye mai ka we coo zah za ma bai tan fan ne za ma tǝgwĩi ah ne fan sãh mai wee joŋni. 16 We yea na za mai mo lwaa tǝtǝl suu ɓǝǝ ɓo. We joŋ lwaa tǝtǝl ɓii we lwaa ɓo na fan ma rii nǝn faɓe' ne ka, amma we joŋ na za yeɓ Masǝŋ. 17 We yii za daŋ, we 'yah wee pa ɓii ma iŋ ra, we ɗuu Masǝŋ, we kee goŋe.
Tǝbǝlam bone Kristu
18 Za yeɓɓe, we laa zah pah yeɓ ɓiiri, we yii ra ne zahzyil tǝɗe', we laa zah ɓǝǝ ne ɓǝ masãh ah ne matǝ 'wa ah to ka, amma we laa ne magaɓ ah ra daŋ. 19 We tǝ rõm bone ma bai mor ah mai moo cuura nyi we mor we tǝ Masǝŋ ɓo ɓe, Masǝŋ ga soo we mor ahe. 20 We tǝ rõm bone mai mo tǝ cuura nyi we tǝ ɓǝ faɓe' mai wee joŋ ɓe, reba ah wo ɓii ko fẽene? Amma we tǝ laa bone mor fan sãh mai we joŋ we so rõm ɓe, ka a pǝsãh pel Masǝŋ. 21 Mor Masǝŋ ɗii we ɓo mor maiko. Mor Kristu ne suu ah laa bone mor ɓiiri, so soɓ ɓǝ ah ɓo we ka we syee tǝbǝlam ahe. 22 Kristu joŋ faɓe' taa ya, gwah ber laŋ taa ya ta. 23 Ne cok mo tǝǝra ko, so jin tǝǝ ra ya. Ne cok mo laa bone, so fõo dǝɓ kaa ne ya, amma soɓ ɓǝ ah daŋ jol Masǝŋ mai ako ye mo pa kiita matǝ njaŋ. 24 Kristu ne suu ah ɓaŋ faɓe' man ge tǝ suu ah tǝ kpuuceere, mor ka na wuk wo faɓe', na yea ne cee ne joŋ yeɓ matǝ njaŋ. Awe laɓ ɓo mor nwãh ahe. 25 Awe yea tǝgbana pǝsǝ̃ǝ mai mo zyak ɓo, amma zǝzǝ̃ǝko we pii soo ge wo pakǝpii ne pa byak mazwãhsuu ɓii ɓe.
© Bible Moundang © Alliance Biblique du Tchad, 1996.
