Yunatan joŋ yeɓ malii
1 Comki Yunatan we Saul faa nyi dǝɓ ɓaŋ paŋzǝǝ ahe: Mo ge, na yee ge cok ɗǝr za ma byak Filistien nǝzakǝŋhaano. Amma faa ɓǝ ah kah pam ya. 2 Saul ge kaa ɓo kah Gibea mor kpuu tǝgõm Migron. Za mai mo no ne ki, dǝfuu temere yea. 3 (Ahija we Akitoɓ naa mah Ikabod we Fineas we Eli pa joŋzahsyiŋ Dǝɓlii ma yaŋ Silo ɓoo ɗaŋsikki ɓo.) Za tǝ sõone Yunatan kal ɓo ya.
4 Kǝsyil fahlii mai Yunatan mo 'yah ka yee gŋ ka ga yaŋ sal sooje ma byak Filistien syembee ma ne syel no gŋ kǝita kǝita, maki ah ɗii ne Boses, a ɗii maki ah ne Sene. 5 Syel syembee vaŋno a fah kǝsǝŋ, ɓyaŋ ki ɓo ne Mikmas jaŋjaŋ, maki ah vaŋno a fah morkǝsǝŋ, ɓyaŋ ki ɓo ne Geba jaŋjaŋ.
6 Yunatan faa nyi pa ɓaŋ paŋzǝǝ ahe: Mo ge o, na yee ge yaŋ sal gãhnyah raino, maki Dǝɓlii Masǝŋ joŋ mor man ba, mor fan ki ka cak Dǝɓlii ne ǝ̃ǝ dǝɓ ne jol za pãa koo ne jol za matǝ biŋ laŋ ya. 7 Pa ɓaŋ paŋzǝǝ ah faa nyi ko: Mo joŋ ɓǝ mai mo no pǝ zahzyil ɓo daŋ. Mo gyo, me ga ne mo, ɓǝ foo ɓe na ma ɓo ta. 8 Yunatan faa: Pǝsãhe, na ge wo zai o, na ge cuu suu man wo ɓǝǝra. 9 Mo faara nyi na ru ga lwaa we no ɓe, ka na uu pǝ cok man sǝ, na ka ga wo ɓǝǝr a. 10 Amma mo kal faara we ge wo ɓuu ɓe, ka na ge sǝ, ka Dǝɓlii soɓ ra ge mor jol man ɓe, ka fan cuu ah nyi na kuuko.
11 Ne cok mo cuura suu ɓǝǝ wo za yaŋ sal Filistien, za Filistien faara: Eẽ Yahuduen mo pǝ̃ǝra gin pǝ yii ɓǝǝ mo yea mokra ɓo gŋ ɗǝ. 12 Za yaŋ sal Filistien faa ge nyi Yunatan ne pa ɓaŋ paŋzǝǝ ahe: We ge wo ɓuu ka ru ge cuu fan nyi we sa. So Yunatan faa nyi pa ɓaŋ paŋzǝǝ ahe: Mo syee ge fal ɓe, mor Dǝɓlii soɓ ra ge mor jol Israel ɓe. 13 Yunatan ker ge kerre, pa ɓaŋ paŋzǝǝ ah ge mor ahe. Filistien leara ge sǝŋ pel Yunatan. Pa ɓaŋ paŋzǝǝ ah yah ik ra fahfal ahe. 14 Ik za ma kǝpel mai Yunatan ne pa ɓaŋ paŋzǝǝ ah mo ik ra, dǝfuu tǝgbana jemma gwa. 15 Gal re za yaŋ sal tǝkine za mai mo kaara ɓo kah ah daŋ. Za yaŋ sal ne za mǝǝna daŋ ɗuura gal ta, sǝr cocoo, mor Dǝɓlii joŋ ra ka mo ɗuura galle.
Za Israel ik Filistien
16 Sooje ma byak Saul mai mo Gibea mǝ Benyaamin ẽera cok ge, kwora dǝfuu cea myah tǝtǝl ɓo camcam. 17 Saul faa nyi za mai mo ne ki: We kee zana, ɗah zu ye pǝ̃ǝ kǝsyil man kal ɓo ne? Ne cok mo keera zana, lwaara Yunatan ne pa ɓaŋ paŋzǝǝ ah gŋ ya. 18 Saul so faa nyi Ahija: Mo ɓaŋ ɗaŋsikki Dǝɓlii ge ne ko. (Mor Ahija yee ɓoo ɗaŋsikki pel za Israel.) 19 Ne cok mai Saul mo tǝ faa ɓǝ ne pa joŋzahsyiŋrĩ, ɓǝ ŋwaa sal pǝ cok ɗǝr Filistien ɓoo ga pelle ga pelle. Saul so faa nyi pa joŋzahsyiŋrĩ: Mo soɓ o. Cok ka so fii Dǝɓlii kǝka. 20 Saul ne za mai mo ne ki daŋ taira ge zah salle. Filistien jin ceera ki ne kafahe soo sǝŋ, sal ah pǝcwak no cam. 21 Yahuduen mai mo ne Filistien pǝtãa laŋ, mai mo pǝ̃ǝra ge ɓo zah sal ne ra daŋ jinra pii soo ge wo za Israel mai mo no ne Saul ne Yunatan. 22 Za Israel makẽne mo lal mokra ɓo tǝgǝǝ waa Efraim laara Filistien ɗuura ɓe, ara laŋ so ɗuura ge mor ɓǝǝ ka ruu sal ne ra. 23 Dǝɓlii ǝ̃ǝ za Israel com moo naiko, sal ah ruu ŋhaa ge dai nǝn Bet-Haven nǝkǝŋhaa.
Fan mai mo joŋ fahfal ruu salle
24 Com ah Saul haa zah nyi za faa: Koo zune mo re farel ka lil ɓah joŋ ya kǝpel me faŋ val tǝ za syiŋ ɓe ɓe, tǝkẽawãk tǝ dǝɓ ahe. So dǝɓ vaŋno ma maa farel ga zah kǝka, mor ah za Israel gaɓra pǝlli. 25 Za daŋ gera pǝ gǝ̃ǝre, tǝnjwǝǝ no gŋ tǝ sǝrri. 26 Ne cok za mo ge pǝ gǝ̃ǝre, manǝm tǝnjwǝǝ tǝ zyer ga sǝŋ. Koo dǝɓ vaŋno maa jol ge zah ya, mor a ɗuura gal ɓǝ haazahe. 27 Amma Yunatan laa ɓǝ haazah pam mo haa nyi zan ge sok ya, mor maiko nyen zah kǝndaŋ jol ah 'naa manǝm tǝnjwǝǝ ah ne ge ɓǝr jolle, so maa ge zahe, nahnǝn ah tahn daŋdaŋ. 28 Dǝɓ vaŋno kǝsyil zan faa nyi ko: Pa ɓo haa zah ɓo nyi zana aa ɓe tǝkẽawãk tǝ dǝɓ ma re farel tǝ'nahko. 29 Yunatan zyii faa: Pa ɓe tǝ ɓeɓ cokki, we ẽe ɗǝ, nahnǝn ɓe tahn ɓo daŋdaŋ mor me juu tǝnjwǝǝ ge zahe. 30 Kǝnah za mo re fan ma woo zah sal jol za syiŋ ɓǝǝ ɓo ɓe, a yea ɗǝne? Mor na ka ik Filistien tǝ'nah pǝlli yao.
31 Com ah ikra Filistien daga Mikmas ŋhaa dai Ajalon. Za gaɓ pǝlli. 32 Za ur ne woo fan zah sal o, nĩira gwii, dǝǝ tǝkine wee dǝǝ ŋgomra ge tǝ sǝrri, za rera nǝǝ ne syim daŋ. 33 Ge faara ɓǝ ah nyi Saul: Za tǝ joŋ faɓe' wo Dǝɓlii ne ren nǝǝ ne syimmi. Saul zyii faa: We zyak fahlii ɓe, we hǝr tǝsal malii ge nyi me. 34 So faa nyi ra: We kyãh kǝsyil zan we faa nyi ra: Koo zune mo gee me ne dǝǝ ah koo gwii ahe, we ge ŋgom nyee ka we re, we joŋ faɓe' wo Dǝɓlii ne re nǝǝ ne syim ka. Ne suŋ moo zune daŋ ge ne dǝǝ ah mor jolle, ge ŋgom ra gŋ. 35 Saul vuu cok joŋ syiŋ wo Dǝɓlii. Ako ye cok joŋ syiŋ ma kǝpel mo vuuko wo Dǝɓlii.
36 Saul so faa: Na ge foo mor Filistien ne suŋni, ka na woo fan ɓǝǝ ŋhaa cok zah'nan mo ge, ka na soɓ koo dǝɓ kǝsyil ɓǝǝ vaŋno ka. Faara nyi ko: Mo joŋ daŋ tǝgbana zahzyil ɓo mo 'yahe. So pa joŋzahsyiŋ faa: Na fii Dǝɓlii. 37 Saul fii Dǝɓlii faa: Me ge mor Filistien o ne? Mo ga soɓ ra ge mor jol Israel no ne? Amma Dǝɓlii zyii ɓǝ ki zah ah com moo ya. 38 Saul so faa: Zaluu we tǝɓ ge nyee daŋ ka we ẽe njaŋ, ɗah faɓe' ah joŋ ɓo tǝ'nah ɗǝne? 39 'Manna Dǝɓlii ma ǝ̃ǝ za Israel no ne cee, koo mo na ɓe Yunatan o, a wǝko 'manna 'manna. Amma koo dǝɓ vaŋno kǝsyil za zyii ɓǝ ki zah ah ya. 40 So faa nyi za Israel daŋ: We uu ge kǝtǝ vaŋno, ame ne na ɓe Yunatan ru uu kǝtǝ vaŋno ta. Faara nyi Saul: Mo joŋ tǝgbana mo 'yahe.
41 Saul faa: Dǝɓlii Masǝŋ Israel, mor fẽe mo zyii zah dǝɓ ɓo tǝ'nah ya ne? Faɓe' ah mo no tǝ ɓe wala tǝ na ɓe Yunatan ɓe, mo cuu ɓǝ ah ne Urim. Amma faɓe' ah mo tǝ za ɓo Israel ɓe, mo cuu ɓǝ ah ne Tummin. Byãh syiŋ gbǝ Yunatan ne Saul, amma za Israel ǝ̃ǝ gin zyil ɓǝ ahe. 42 Saul so faa: We byãh syiŋ kǝsyil ɓe ne na ɓe Yunatan. Syiŋ ah gbǝ Yunatan. 43 Saul faa nyi Yunatan: Mo faa ɓǝ fan mai mo joŋ ɓo nyi me. Yunatan faa goŋga ah nyi ko njaŋ: Me maa tǝnjwǝǝ ge zah biŋ ɓe, me 'naa tǝnjwǝǝ ne zah kǝndaŋ jol ɓe, me maa ge zahe, ame ko yo, me wǝ o. 44 So Saul faa: Masǝŋ mo joŋ ɓǝ ah naiko, koo mo joŋ kal tǝ mai ta, 'manna Yunatan mo ga wuu. 45 Amma za faa nyi Saul: Yunatan mai mo ǝ̃ǝ za Israel ko a ga wuu ne? Dǝɓlii mo cak ɓǝ ahe, Dǝɓlii no, koo rĩi tǝtǝl ah vaŋno ka lee ga sǝŋ ya, mor joŋ yeɓ ɓo ne Masǝŋ tǝ'nahko. Za ǝ̃ǝ Yunatan naiko, so wǝko yao.
46 So Saul soɓ foo mor Filistien o. Filistien laŋ so pii soora ge cok kal ɓǝǝra.
Morsǝ̃ǝ Saul
47 Daga cok Saul mo kaa goŋ Israel, ruu sal ne za syiŋ ah ryaŋ cok ɓoo daŋ, ruu sal ne za Moab, za Ammon, za Edom, za goŋ Zoba tǝkine Filistien daŋ, cok makẽne mo geko gŋ daŋ a kaa kacella sǝ sǝ. 48 A pǝ dǝworre, ik Amalekien, ǝ̃ǝ za Israel jol za ma ren sǝr ɓǝǝra.
49 Wee Saul mawǝǝ ye Yunatan, Isvi tǝkine Malkisua. Wee ah maŋwǝǝ gwa, a ɗii malii ah ne Meraɓ, malaŋ ɗii ne Mikal. 50 A ɗii mawin Saul ne Akinoam, ako ye mǝlaŋ Akimaas. A ɗii swah sal Saul ne Abner, ako ye we Ner dǝlaŋ Saul o. 51 Kis pah Saul ne Ner pah Abner, ara ye wee Abiel.
52 Ne cok Saul mo yea sǝŋ, ruura sal magaɓ ne Filistien, koo ne cok fẽene daŋ Saul mo kwo dǝɓ maswah ɓe, dǝɓ ah mo dǝwor ye ɓe, a ɓaŋ ga wol ah ne ko.
© Bible Moundang © Alliance Biblique du Tchad, 1996.
