Syeera nǝm tǝ David kan goŋ ne ko
1 Dǝɓlii faa nyi Samuel: Mo ga soɓ yeyee mor Saul nekẽne? Mor me faa ka kaako goŋ Israel ao. Mo suu nǝm baa ciŋ ɓo, mo gyo, me pee mo ga wo Isai dǝɓ Betlehem, mor kǝsyil wee ah me kwo ma 'nyah suu ɓe ɓo no gŋ nǝn kaa goŋe. 2 Samuel faa: Me gak ga ɗah ɗǝne? Saul mo laa ɓǝ ah ɓe, a i me ga lalle. Dǝɓlii faa: Mo gbǝ woi dǝǝ ge ne ko, mo faa: Me ge ɓo tǝ joŋ syiŋ wo Dǝɓlii. 3 Mo ɗii Isai ge cok joŋ syiŋ ahe, so me ga cuu fan mai mo ga joŋ nyi mo, ka mo syee nǝm tǝtǝl dǝɓ mai me ga faa ɓǝ ah nyi mo.
4 Samuel ge joŋ na mai Dǝɓlii mo ree nyi ko, kal ge Betlehem. Zaluu yaŋ ah ge zyaŋra tǝtǝl ah ne suu cocoo, fiira: Gin ɓo jam ye ne? 5 Zyii faa: Jam yo, me ge ɓo tǝ joŋ syiŋ wo Dǝɓlii. We vãh suu ɓiiri, ka we ge cok joŋ syiŋ ne me. Vãh Isai ne wee ahe, so ɗii ra ge cok joŋ syiŋrĩ.
6 Ne cok mo ge daira, Samuel ẽe Eliaɓ, faa pǝ zahzyil ahe: Dǝɓ mai Dǝɓlii mo nǝǝ ɓo ko ye pel ah nyẽeno. 7 Amma Dǝɓlii faa nyi Samuel: Mo ẽe cok nahnǝn ah ka, mo ẽe wah suu ah ka ta, mor me nǝǝ ko ya. Dǝɓlii ka ẽe fan na dǝfuu moo ẽe ya. Dǝfuu ẽe lal fanne, amma Dǝɓlii ẽe zahzyilli.
8 Isai ɗii Abinadaɓ ge pǝ̃ǝ pel Samuel. Samuel faa: Dǝɓlii nǝǝ dǝɓ mai ya ta. 9 So Isai ɗii Syimma ge pǝ̃ǝ, so faa: Mai laŋ Dǝɓlii nǝǝ ko ya. 10 Isai ɗii wee ah rǝŋ daŋ ge pǝ̃ǝra pel Samuel. So Samuel faa nyi Isai: Dǝɓlii nǝǝ za marai koo vaŋno ya. 11 Samuel so faa nyi Isai: Daŋ wee ɓo ko rai ne? So zyii faa: Coŋ kahkǝr ɓo, a cok pii fanne. Samuel faa nyi Isai: Mo pepee ɗii ko ge, mor na ka kaa ŋhaa ka mo geko gin lal ge ɗao ya. 12 Isai pepee ɗii ko ge, a bǝnyao, cok nǝn ah ne kee suu ah pǝsãhe. Dǝɓlii faa nyi Samuel: Mo ur mo syee nǝm tǝl ahe, ako ye maiko. 13 Samuel ɓaŋ ciŋ nǝmmi, so syee nǝm tǝl ah kǝsyil wee pah ahe . Tǝ'yak Masǝŋ ge tǝ David daga com ah ŋhaa ge pelle. Samuel ur kal fah yaŋ Rama.
David woŋ tǝnjuŋ pel Saul
14 Tǝ'yak Dǝɓlii soɓ Saul, so tǝ'yak ɓe' gee wo Dǝɓlii ge gaɓ ko. 15 Za yeɓ Saul faara nyi ko: Tǝ'yak ɓe' gee wo Masǝŋ tǝ gaɓ mo. 16 Pǝram dǝɓlii ɓuu mo nyi fahlii nyi za yeɓ ma pel ɓo, ka mo kyeɓra pa woŋ tǝnjuŋ masãh ahe, ka tǝ'yak ɓe' mo gee wo Masǝŋ tǝ gaɓ mo ɓe, mo woŋko pel ɓo ne jol ahe, ka mo laa pǝram. 17 Saul faa nyi za yeɓ ahe: We kyeɓ pa woŋ tǝnjuŋ masãh ah gee me ne ko. 18 Dǝɓ vaŋno kǝsyil za yeɓ ah zyii ɓǝ faa: Me kwo we Isai ma Betlehem tǝ woŋ ah pǝsãhe, a pǝswahe, gorom yo, tǝ ɓǝ faa pǝ zah ɓo, dǝɓ suu sãh ye ta, Dǝɓlii no ne ki.
19 Saul pee za ge wo Isai faa: Mo pee we ɓo ma pii gwii ma ɗii ne David gee me. 20 Isai gbǝ korro woo wol tǝkine dah bii lee kpuu vin ne we tǝparswak pee ge nyi Saul ne jol wel ah David. 21 David ge wo Saul, joŋ yeɓ nyi ko. Saul 'yah ko pǝlli, so ciŋ pa ɓaŋ paŋzǝǝ ahe. 22 Saul pepee ge wo Isai faa: Oseni, mo soɓ we ɓo David joŋ yeɓ nyi me, mor ɓǝ ah 'nyah suu ɓe ɓo. 23 Koo ne cok fẽene daŋ tǝ'yak ɓe' mo gee wo Masǝŋ ge tǝ Saul ɓe, David a ɓaŋ tǝnjuŋ woŋni. Mo joŋ nai ɓe, Saul kaa 'wa, a laa pǝram, tǝ'yak ɓe' soɓ ko.
© Bible Moundang © Alliance Biblique du Tchad, 1996.
