Saul kyeɓ ka in David pǝ wulli
1 Saul faa ɓǝ nyi nan ah Yunatan tǝkine za yeɓ ah daŋ, a 'yah ka in David pǝ wulli. Amma Yunatan we Saul a laa ɓǝ David pǝ'nyah no cam. 2 Yunatan ge faa nyi David: Pa ɓe Saul tǝ kyeɓ mo ka in pǝ wulli, mo byak suu ɓo tǝ'nanne, mo ɗuu muŋ. 3 Ame laŋ me ga uu kah pa ɓe pǝ 'wah tǝnyiŋ mai mo gŋ, me ga faa ɓǝ ɓo nyi pa ɓe, me laa mo faako ɗǝne ɓe, me ga kee nyi mo ba.
4 Yunatan faa ɓǝ sãh tǝ David nyi pam no cam. Faa: Goŋ mo joŋ faɓe' wo dǝɓ yeɓ ah David ka, mor joŋ ɓǝɓe' wo ɓo ya. Jeertǝ yeɓ ah mo joŋ wo ɓo daŋ a pǝsãh no cam. 5 Soɓ cee suu ah na wulli, so i Filistiyo. Dǝɓlii joŋ yeɓ ǝ̃ǝ malii ah mor za Israel daŋ. Mo kwo laŋ ɓe, mo laa pǝ'nyah ta. Mor fẽe mo ga joŋ faɓe' wo dǝɓ ma bai faɓe' ne in ko bai mor ne?
6 Saul laa ɓǝ faa Yunatan. So haa zah faa: Dǝɓlii no sǝŋ, me ka i David pǝ wul ao. 7 So Yunatan ɗii David kee ɓǝ mai daŋ nyi ko. Yunatan so zaŋ ko kal ge wo Saul ne ko. David so ɓaŋ yeɓ ah kal tǝ joŋ na matãa.
8 So sal ur kpǝ, David pǝ̃ǝ ruu sal ne Filistien, ik ra ŋhaa ɗuura pel ahe.
9 So comki tǝ'yak ɓe' gee wo Dǝɓlii ge tǝ Saul, kaa ɓǝr yaŋ ah ne zǝǝ jolle. David woŋ tǝnjuŋ nyi. 10 Saul kyeɓ ka swan David ga wo yaŋ ne zǝǝ, amma David woyam ŋhaa zǝǝ ge swǝ yaŋ. So David ǝ̃ǝ ɗuu ne suŋ ah kalle.
11 Ne suŋ moo Saul pee zan ah ge yaŋ David ka mo byakra ko ka in pǝ wul ne zah'nanne. Amma Mikal mawin David kee ɓǝ ah nyi ko faa: Mo kyeɓ cok muŋ suu ɓo ne suŋ mai ya ɓe, tǝ'nan a ga ira mo pǝ wulli. 12 Mikal lal ɓaŋ David pǝ̃ǝ zahtǝwoo, David ǝ̃ǝ ɗuu kalle. 13 Mikal ɓaŋ foto masǝŋ ki cam sor ge tǝ ɗeere, so ɓaŋ syiŋ sǝgwii ma jejer ah ik ge nyi tǝtǝlli, so ɓaŋ mbǝro jǝŋ ge nyi gŋ. 14 Ne cok Saul mo pee zan ah ka ga gban David, amma Mikal faa: A ne syemme. 15 Saul so nĩi zan ah kal ge faa: We ge ẽe ko, ka we ɓaŋ gee me ne ɗee ah daŋ me ga i ko pǝ wulli. 16 Zapee kalra ge, ge lwaara foto masǝŋ ki cam tǝ ɗee ne syiŋ sǝgwii ma jejer tǝtǝl ahe. 17 Saul faa nyi Mikal: Mo joŋ tǝgwĩi ne me nai mor fẽe ŋhaa ka mo soɓ pa syiŋ ɓe ǝ̃ǝ kal ne? Mikal zyii faa nyi Saul: David faa nyi me sye: Me soɓ zye kalle, mo ka nai ya ɓe, zye i me pǝ wulli.
18 Amma David ǝ̃ǝ ɗuu kalle. Ge wo Samuel yaŋ Rama, ge kee ɓǝ mai Saul mo joŋ wol ah daŋ nyi ko. Ako ne Samuel gwa daŋ kalra ge kaa Najot. 19 Ge faara nyi Saul: David no Najot yaŋ Rama. 20 Saul pee za ka ga gban David. Amma ne cok zapee mo ge kwora tai profetoen taira ɓo tǝ dǝra daa ne ɓyaŋ ɓǝ, Samuel ye dǝɓlii ɓǝǝra, Tǝ'yak Masǝŋ ge tǝ zapee Saul, so kalra ne dǝdaa ne ɓyaŋ ɓǝ ta. 21 Ge faara ɓǝ ah nyi Saul, so Saul pee zapee maki ahe, amma so kalra laŋ ne dǝdaa ne ɓyaŋ ɓǝ ta. So pepee patǝ sai ahe, zan ah ge kalra ne joŋ nai kpǝ. 22 Saul ur ne suu ah kal ge yaŋ Rama. Ge dai zah lak bii malii mo kah Seko, fifii gŋ faa: Samuel ne David kẽne? Zyiira zah ah faa: Ara Najot yaŋ Rama. 23 Kal ge Najot yaŋ Rama. Tǝ'yak Masǝŋ ge tǝl ah ta. Saul so ɓaŋ fahlii ne dǝdaa ne ɓyaŋ ɓǝ ŋhaa ge dai Najot yaŋ Rama. 24 Saul wǝǝ mbǝro ahe, so dǝdaa ne ɓyaŋ ɓǝ pel Samuel, zok com moo tǝkine suŋ ah daŋ, swǝ ne zahmor kolle. Mor ah a faara zahlii: Saul sye a kǝsyil profetoen o ta ne?
© Bible Moundang © Alliance Biblique du Tchad, 1996.
