Yunatan gbah jol David
1 David ɗuu gin Najot ma Rama kal ge wo Yunatan, ge faa: Me joŋ fẽe ɓo ne? Me joŋ faɓe' fẽe ɓo wo pa ɓo ko a kyeɓ ka in me pǝ wul ne? 2 Yunatan faa nyi ko: Ka nai ya, mo ka wǝ ya, mor pa ɓe mo ga joŋ fan ɓe, koo fan ah mo biŋ, koo mo pǝ'manne, ka pee bai faa ɓǝ ah nyi me ya. Mor fẽe pa ɓe ga muŋ ɓǝ mai wo ɓe ne? Ɓǝ ah ka yea nai ya. 3 David zyii zah ah faa: Pa ɓo tǝ ɓe, mo 'yah ɓǝ ɓe ɓo, a 'yah ka mo tǝ ɓǝ ah ka zahzyil mo nǝǝ mo ka. 'Manna tǝgbana Dǝɓlii mo no sǝŋ, me tǝ faa nyi mo, me gwari ne wulli.
4 Yunatan faa nyi David: Me ga joŋ fan makẽne mo 'yah daŋ nyi mo. 5 David faa nyi Yunatan: Tǝ'nan fĩi mafuu ga ciŋ, kǝnah me ga kaa cok vaŋno ka ren farel ne goŋe. Amma mo soɓ me ge muŋ suu ɓe tǝnyiŋ 'wah ŋhaa lil patǝ sai zah'nanne. 6 Ka pa ɓo mo ge tǝ ɓǝ bai gin ɓe cok ah ɓe, mo faa: David 'yah fahlii ka ga yaŋ ah Betlehem ka joŋ syiŋ ma joŋ pǝ syii mor zan ah daŋ gŋ. 7 Mo faako pǝsãhe ɓe, ka byak ɓo ǝ̃ǝ gin zah wul ɓe. Amma mo ɓaŋko kpãh ɓe, ka mo tǝ, foo ɓǝɓe' ɓo no. 8 Mo joŋ ɓǝ sãh wo dǝɓ yeɓ ɓo mor mo gbǝ zah ne dǝɓ yeɓ ɓo pel Masǝŋ ɓe. Amma ɓǝɓe' mo no tǝtǝl ɓe ɓe, mo i me pǝ wul ne suu ɓo, mo 'yah ga wo pa ɓo ne me mor fẽene?
9 So Yunatan faa nyi David: Me tǝ ryakryak pa ɓe foo ɓǝɓe' ɓo ka joŋ wo ɓo no ɓe, me ka faa nyi mo ya ne? 10 So David faa nyi Yunatan: Pa ɓo mo zyii ɓǝɓe' zah ɓo ɓe, zu gin faa nyi me ne?
11 Yunatan faa nyi David: Mo ge o, na ge tǝnyiŋ 'wahe. Ara gwa daŋ pǝ̃ǝra kal ge fah tǝnyiŋ 'wahe. 12 So Yunatan faa nyi David faɗa: Dǝɓlii Masǝŋ Israel ye pa syedowal. Tǝ'nanne koo tǝ'nanŋhaa ne cok naiko me ga fii pa ɓe. Ɓǝ ah mo pǝ'nyah tǝ ɓo ɓe, me ga pepee mo gwari ka faa ɓǝ ah nyi mo. 13 Dǝɓlii mo joŋ nai ne me tǝ fahlii ɓǝ ah daŋ, mo joŋ kal tǝ mai laŋ ta, pa ɓe mo tǝ kyeɓ yella ka joŋ ɓǝɓe' wo ɓo no ɓe, me ga cuu ɓǝ ah wo ɓo, me ga soɓ mo kal jam. Dǝɓlii mo yea ne mo tǝgbana mo no ne pa ɓe. 14 Me no ne cee ba ɓe, mo joŋ ɓǝ 'nyah Dǝɓlii wo ɓe ka me wǝ ka. 15 Koo me wǝ laŋ, mo soɓ joŋ ɓǝ sãh wo za yaŋ ɓe ka syaŋsyaŋ. Koo ne cok mai Dǝɓlii mo ga vǝr za ma syiŋ David gin wo sǝr daŋ laŋ, 16 tǝɗii Yunatan mo vǝr ne za yaŋ Saul ka. Mo ka nai ya ɓe, Dǝɓlii ga faŋ val ah tǝ ɓo.
17 Yunatan so haa zah nyi David faɗa, mor a 'yah ko tǝgbana suu ahe. 18 Yunatan faa nyi ko: Tǝ'nan fĩi mafuu ga ciŋ, a ga tǝra, mo ka nyee ya, mor dǝɓ ki ka yea pǝ cok kal ɓo ya. 19 Tǝ'nanŋhaa ɓe, a ga tǝra njaŋ, mo ka nyee ya, ka mo ge muŋ suu ɓo pǝ cok ma com mai kŋ kah tǝsal ŋhaano. 20 Ka me ga 'nǝǝ guu sai ga kah tǝsal ah tǝgbana me tǝ lii fan ka danne. 21 Me ga pee we tǝbanna, me faa: Mo gyo mo ge kyeɓ guu ahe. Me so faa nyi we tǝbanna ah guu ah nǝn ɓo nǝkǝino mo woo o ɓe, ka mo ge o, mo lwaa jam ɓe. 'Manna tǝgbana Dǝɓlii mo no sǝŋ, ɓǝ ki kǝkao. 22 Amma me faa nyi we tǝbanna: Guu nǝn ɓo nǝkǝŋhaa ɓe, ka mo gyo, Dǝɓlii nyi fahlii mo ɓe. 23 Ka ɓǝ mai na faa ɓo kǝsyil ki ame ne mo, Dǝɓlii mo yea kǝsyil man ga lii ga lii.
24 David ge muŋ tǝnyiŋ 'wahe. Fĩi mafuu ciŋ, goŋ ge kaa cok ren farelle. 25 Goŋ kaa pǝ cok kal ah wo korvuu tǝgbana matãa. Yunatan kaa pel ah jaŋjaŋ, Abner kaa kah Saul amma cok kal David tǝkolle. 26 Saul faa ɓǝ ki com moo ya, foo tǝgba fan joŋ ma wol ahe, ka yea daŋdaŋ ya . 27 Tǝ'nan ciŋ fĩi ah zah'nan gwa ah cok kal David tǝkol faɗa. Saul faa nyi nan ah Yunatan: Mor fẽe we Isai ge cok ren farel tǝsoo ya ne tǝ'nah daŋ ne? 28 Yunatan zyii zah Saul faa: David 'yah fahlii jol ɓe ka ga Betlehem, 29 faa nyi me: Mo soɓ zye ge gŋ ka ga joŋ syiŋ ma joŋ pǝ syii daŋ mor za ɓe gŋ, mor naa pa ɓe faa nyi me ka me ge gŋ, mo 'yah ɓǝ 'min ɓe, mo soɓ zye ge ka ẽe wee pa 'minni. Mor ah lwaa fahlii gin cok ren farel goŋ ya.
30 Saul ɓaŋ kpãh ne Yunatan pǝ'man faa nyi ko: Amo na mawin ɓe', me tǝ sõone mo baŋ zah ɓo ne we Isai ka cuu swãa suu ɓo ne cuu swãa zahmor kol ma ɓo ya ne? 31 We Isai mo no wo sǝr ne cee ɓe, mo ka yea jam ya, amo, koo goŋ ɓo. Mo pepee ɗii ko ge wo ɓe ne zǝzǝ̃ǝko, mor kii nǝ pǝ koŋ wul ɓe. 32 Yunatan zyii zah pah ah Saul faa: Mo in ko ga lal mor fẽene? Joŋ fẽe ɓo ne? 33 Saul 'nǝǝ Yunatan ne zǝǝ ka swan ko. Daga cok ah Yunatan tǝ njaŋ, pah ah 'yah ka in David ga lal pǝ wulli. 34 Yunatan ur gin cok ren farel ɓaŋ kpãh pǝ'manne, 'yah farel joŋ fĩi mafuu ne patǝ gwa zah'nan ao, mor a swaa ɓǝ David, mor pah ah cuu swãa ah ɓo ta.
35 Tǝ'nan ah ne zah'nan Yunatan ur kal ge tǝnyiŋ 'wah pǝ cok mai mo zyeɓra ɓǝ ah ɓo ne David kŋ. We tǝbanna no ne ki. 36 Faa nyi wel ahe: Mo ɗuu o, me ga 'nǝǝ guu ka mo ge woo ge ne ko. We tǝbanna kal tǝ ɗulli, Yunatan 'nǝǝ guu ge pel ah nǝkǝŋhaa. 37 Ne cok we mo ɗuu ge dai cok mai Yunatan mo 'nǝǝ guu ge gŋ, so Yunatan ɗii we tǝbanna faa: Guu ah no pel ɓo nǝkǝŋhaa. 38 Yunatan so ɗii we tǝbanna ah faa: Mo hǝǝ o mo uu ka. We tǝbanna woo guu ge nyi dǝɓlii ah Yunatan ne ko. 39 We tǝbanna tǝ ɓǝ ki kǝsyil ɓǝ ah ya, amma Yunatan ne David tǝra ma ɓǝǝ mor ah ɓe. 40 Yunatan so nyi fan sal ah ra daŋ nyi we yaŋ ah faa nyi ko: Mo ge yaŋ ne ko.
41 Fahfal we mo kalle, David ur gin kah tǝsal ge, kea ge sǝŋ, ɗǝŋ tǝtǝl ge tǝ sǝr ɓal sai, zwahra ki ne zahe, gbahra ki ne yee ŋhaa ɓǝ ah kal swah David. 42 Yunatan faa nyi David: Mo ge jam o, tǝgbana na haa zah ɓo nyi ki ne tǝɗii Dǝɓlii na faa ka Dǝɓlii mo yea kǝsyil mana, mo yeako kǝsyil morsǝ̃ǝ ɓe ne morsǝ̃ǝ ɓo ga lii ga lii. 43 So David ur kal o, Yunatan laŋ pii soo ge yaŋ o ta .
© Bible Moundang © Alliance Biblique du Tchad, 1996.
