David kaa kǝsyil Filistien
1 David faa pǝ zahzyil ahe: Comki Saul ga i me pǝ wulli, pǝram me hǝǝ gwari kal ge sǝr Filistien, a ga soɓ kyeɓ ɓe sǝr Israel daŋ, me ga ǝ̃ǝ jol ah naiko. 2 David ur ne za mai mo ne ki ara temere yea, kalra fah wo Akis we Maok goŋ Gat. 3 David kaa ne Akis Gat tǝkine zan ah ne yaŋ ɓǝǝ daŋ. David ne ŋwǝǝ ah gwa, Akinoam ma yaŋ Jezereel ne Abigail mawin Nabal ma Karmel. 4 Ge faara nyi Saul: David ɗuu kal ge Gat ɓe. So Saul kyeɓ ko faɗa yao.
5 David faa nyi Akis: Mo laa pǝ'nyah ne me ɓe, mo nyi cok kal nyi me ge pǝ yaŋ ma lal vaŋno, dǝɓ yeɓ ɓo kaa kah ɓo yaŋ kal goŋ ɓo nai ɗǝne? 6 Com ah Akis nyi Ziklak nyi ko, mor maiko Ziklak ciŋ cok za goŋ Yuda ŋhaa tǝ'nahko. 7 Kal mai David mo kaa pǝ sǝr Filistien, joŋ syii vaŋno ne fĩi nai.
8 David ne zan ah ur ge ryaŋra Gesurien, Girzien ne Amalekien, mor zan ah ye za ma kaara sǝr ah daga ɓaaɓe, daga sǝr Sur ŋhaa sǝr Egiɓ. 9 David re sǝr ah tǝɗe', coŋ fan ma ne cee koo dǝwor ne madǝwin a. Woo pǝsǝ̃ǝre, dǝǝ, korro, njoŋnjoŋ tǝkine mbǝro daŋ, so jin kal ge wo Akis. 10 Ne cok Akis mo fii David: We ge re yaŋ kǝkẽe tǝ'nah ne ɓe, David a faa: Nǝfah morkǝsǝŋ sǝr Yuda nǝfah morkǝsǝŋ sǝr Jerameelien, koo nǝfah morkǝsǝŋ sǝr Kenien. 11 David coŋ dǝwor koo madǝwin a, woora kal ge Gat ne ko, mor ako faa: Ka mo faara ɓǝ ɓǝǝ sõone David joŋ naino, David joŋ naino ka. Joŋ naiko pǝ zah'nan mai mo kaako sǝr Filistien daŋ. 12 Akis nyiŋ ɓǝ David, faa kal ahe: Joŋ zan ah Israel naiko, syiŋra ko ɓo kpǝtǝtǝ ko, dǝɓ yeɓ ɓe ye yea ga lii.
© Bible Moundang © Alliance Biblique du Tchad, 1996.
