Wul Saul ne nan ahe
(1 KeeƁ 10:1-12)1 Ne cok ah Filistien ruura sal ne za Israel, so za Israel ɗuura gal pel Filistien, wul ɓǝǝ lea tǝgǝǝ waa Gilboa. 2 So Filistien ɗuura lwaa mor Saul ne wee ahe, ikra Yunatan ne Abinadaɓ tǝkine Malkisua wee Saul pǝ wulli. 3 Yǝk sal daŋ so ge tǝ Saul, za ma ne guu ge daira mor ah jwǝǝra ko ne guu. 4 So Saul faa nyi dǝɓ ɓaŋ paŋzǝǝ ahe: Mo nǝǝ kafahe ɓo ce me ne pǝ wulli, ka gãhnyah rai mo cee me mo joŋra kyẽm ne me ka. Amma dǝɓ ɓaŋ paŋzǝǝ ah zyii ya, gal re ko pǝlli. Saul nǝǝ kafahe ma syak ah haa suu ah ge tǝl ahe. 5 Dǝɓ ɓaŋ paŋzǝǝ ah mo ẽe Saul wǝ ɓe, haa suu ah ge tǝ kafahe mǝ ah ta, wǝ ne Saul. 6 Saul ne wee ah mawǝǝ sai, ne dǝɓ ɓaŋ paŋzǝǝ ah tǝkine zan ah daŋ wukra com ah naiko. 7 Ne cok ah za Israel mai ara mo nǝzakǝ cok tǝforoŋ Jezereel ne ma nǝzakǝŋhaa Yordan kwora sooje za Israel ɗuu kalra, so mo kwora Saul ne wee ah wukra, soɓra yaŋ ɓǝǝ ɗuura kalle. So Filistien ge kaara gŋ.
8 Tǝ'nan ah Filistien gera ka mgbai fan wo wulli, ge lwaara Saul ne wee ah sai ɓaa ɓo tǝgǝǝ waa Gilboa. 9 Ŋgoŋra tǝtǝl ahe, wǝǝra fan sal ahe, so peara ge wo sǝr Filistien kẽne daŋ ka cuu ɓǝ 'nyah ah yaŋ masǝŋ ɓǝǝ ne wo za daŋ. 10 Rǝkra fan sal Saul nyẽe ɓǝr yaŋ Astarte, raora suu ah tǝ ɓaale Bet-San. 11 Ne cok ah za ma kaara Jabes ma Giliat laara ɓǝ Filistien mo joŋra wo Saul, 12 so za maswah urra nǝn suŋ tǝ syelle, ge ɓaŋra suu Saul ne suu wee ah gin tǝ ɓaale Bet-San gera Jabes ne ko, so syakra wul ɓǝǝ ne wii gŋ. 13 Woora woiŋ ɓǝǝ cii mor baa Jabes. So syẽera fan tǝgǝǝ zah'nan rǝŋ.
© Bible Moundang © Alliance Biblique du Tchad, 1996.
