1 Za Kirjat-Jearim gera, so ɓaŋra sunduku Dǝɓlii kalra ge yaŋ Abinadaɓ mai mo kaa ɓo tǝgee ne ko. Nǝǝra nan ah Eleasar kan mor ka byak sunduku ahe.
Samuel kaa lakaali kǝsyil za Israel
2 Ne cok sunduku Dǝɓlii mo ge Kirjat-Jearim, zah'nan nǝn fahfal ah pǝpãa ɓe, joŋ ɓo tǝgbana syii jemma gwa. Za Israel daŋ yera yee wo Dǝɓlii.
3 So Samuel faa nyi za Israel daŋ: We ge ɓo wo Dǝɓlii ne zahzyil ɓii daŋ ɓe, sai we myah masǝŋ za gwǝǝ tǝkine Astarte daŋ ge lalle. We soɓ zahzyil ɓii wo Dǝɓlii, we joŋ mor ah syak ah to. A ga ǝ̃ǝ we jol Filistien. 4 Za Israel myahra Ba'al ne Astarte ge lalle, joŋra mor Dǝɓlii to.
5 Samuel faa: We tai za Israel daŋ ge Mispa, me ga pǝǝ Dǝɓlii mor ɓiiri. 6 Taira ge Mispa. Beara bii sahra ge tǝ sǝr pel Dǝɓlii. So syẽera fan com ahe, faara: Ru joŋ faɓe' wo Dǝɓlii ɓe. (Samuel a zyeɓ ɓǝ tǝgǝǝ za Israel pǝ cok Mispa.)
7 Filistien laara za Israel taira ge ɓo Mispa. So za goŋ Filistien pǝ̃ǝra sal ge zah za Israel. Ne cok za Israel mo laara ɓǝ ahe, gal Filistien re ra. 8 Za Israel faara nyi Samuel: Mo soɓ juupel wo Dǝɓlii Masǝŋ man mor man ka, mor ka mo ǝ̃ǝko na gin jol Filistien. 9 Samuel ɓaŋ we pǝsãhm ma zwan wonni, ge joŋ syiŋ suŋwii ne wo Dǝɓlii 'wa daŋ. Samuel juupel wo Dǝɓlii mor za Israel, so Dǝɓlii laa juupel ahe. 10 Ne cok Samuel mo tǝ joŋ syiŋ suŋwii, Filistien tǝɓra ge gwari ka ruu sal ne za Israel. Com ah Dǝɓlii pee ɓyaŋ bam maswah ah ge ɓyaŋ tǝ Filistien. Gal re ra, so myahra ɗulli. 11 Za Israel pǝ̃ǝra gin Mispa, mgbãara Filistien kpǝtak ikra ra ŋhaa ge dai mor Bet-Kar gbǝm.
12 So Samuel ɓaŋ tǝsal vaŋno pee kǝsyil Mispa ne Syen. Ɗii cok ah ne Eben-Ezer mor faako sye: Daga ɓaaɓe ŋhaa tǝ'nahko Dǝɓlii tǝ gbah jol mana. 13 Filistien wuura syellele, so fǝ̃ǝ dǝǝra ɓal ge tǝ sǝr za Israel taa yao. Ne cok zah'nan Samuel mo kaa ge daŋ, jol Dǝɓlii no tǝ Filistien. 14 Yaŋ maluu mai Filistien mo nyiŋra jol za Israel daŋ pii soo ge jol za Israel katãako, tǝŋ daga Ekron ŋhaa dai Gat. Za Israel nyiŋra sǝr ɓǝǝ jol Filistien daŋ. Fahfal ah za Israel kaara jam ne Amorien.
15 Samuel joŋ lakaali za Israel zah'nan cee ah daŋ. 16 Syii daŋ a pǝ̃ǝ ga kyãh Betel ne Gilgal tǝkine Mispa, a zyeɓ ɓǝ za Israel ma pǝ cok rai daŋ. 17 So fahfal ah a jin gin Rama, mor yaŋ ah gŋ. Ako ye lakaali za Israel gŋ ta. Vuu cok joŋ syiŋ wo Dǝɓlii laŋ ɓo gŋ.
© Bible Moundang © Alliance Biblique du Tchad, 1996.
