We zyeɓ suu ɓii mor gin Dǝɓlii
1 Wee pa ɓe, we ka ne 'yah ka dǝɓ mo ŋwǝǝ ɓǝ zah'nan ah tǝkine cok com mai fan ah moo ga joŋ ne nyi we ya. 2 Mor awe ne suu ɓii we tǝ belbel zah'nan mai Dǝɓlii moo ga ge ne ko, a ga yea tǝgbana nyin moo gin ne suŋni. 3 Mor ne cok ah za ga faara: “Fan daŋ a jam, ɓǝ ki kǝka.” So ne cok ah sǝ, fan ma ɓeɓ ɓǝǝ ga ge tǝ ɓǝǝra. Ka gak ɗuura ǝ̃ǝ ya, a ga yea tǝgbana ɓǝr syen byaŋ moo gin lwaa mawin ma ne ɓilli. 4 Amma awe, wee pa ɓe, we ka pǝ cokfuu ka zah'nan ah mo ge dai tǝ ɓii ɓwak na nyin ya. 5 Awe daŋ we ye za mǝ cokfãi, awe mǝ comme. Ana ye ka mǝ suŋn a, wala mǝ cokfuu ya. 6 Mor ahe, na ka nwãh nǝm tǝgbana za ki ya, amma na kpiŋ kaa ne nahnǝnni, na soɓ fan ki kiŋ tǝtǝl nyi na ka. 7 Mor za ma nwãhra nǝmmi, a nwãhra ne suŋni, za ma zwahra yim tǝǝ ne ko, a zwahra tǝǝ ne ko ne suŋni. 8 Amma ana, na ye mǝ comme, na yea ne tǝtǝlli. Na ɓoo iŋ tǝkine 'yah tǝgbana mbǝro vãmme, byak ǝ̃ǝ man mo yea tǝgbana njok vãmme. 9 Masǝŋ syen na ɓo mor ka ɓaŋ kpãh tǝ man a, amma mor ka na lwaa ǝ̃ǝ ne Dǝɓlii man Yesu Kristu, 10 mai mo wǝ mor mana, mor ka ne cok gin ah koo na ne cee, koo na wuk ɓo, ka na yea ne cee ne ki. 11 Mor maiko, we swaa zahzyil nyi ki, we gbah jol ki tǝgbana mai we tǝ joŋ zǝzǝ̃ǝko.
Ɓǝ faa ma fahfal tǝ lii
12 Wee pa ɓe, ru pǝǝ we ka we foo ɓǝ za mai mo tǝ joŋra yeɓ kǝsyil ɓiiri, za mai Dǝɓlii mo syen ra ɓo ka zaŋ we tǝkine lai we. 13 We yii ra pǝlli tǝkine 'yah ra mor yeɓ mai mo tǝ joŋra. Awe laŋ we kaa wo ki jam.
14 Ru pǝǝ we, wee pa ɓe, we lai za ma vǝǝkoi ahe, we swaa zahzyil nyi za ma ɗuura galle, we gbah jol za mai mo pǝtǝtǝ̃ǝre, we rõm kaa ne za daŋ. 15 We joŋ yella ka koo zune kǝsyil ɓii mo soo ɓǝɓe' ne ɓǝɓe' ta ka. Amma ne cok daŋ we kyeɓ ka joŋ fan masãh ah wo ki, tǝkine wo za daŋ.

16 We laa pǝ'nyah cẽecẽe. 17 Ne cok daŋ we juupelle. 18 We joŋ osoko mor fan daŋ, mor ne kal ɓii we tai ki ɓo ne Yesu Kristu, Masǝŋ a 'yah ka we joŋ naiko.
19 We cak yeɓ Tǝ'yak Matǝdaŋdaŋ ka. 20 We syẽa ɓǝ mai Tǝ'yak Masǝŋ moo nyi nyi dǝɓ ka faa ka. 21 We lii fan daŋ, ka we gbǝ masãh ahe. 22 We byak suu ɓii wo ɓǝɓe' daŋ.
23 Masǝŋ mai moo nyi jam nyi na mo joŋ we na za mǝ ah tǝɗe' ka mo byak we, tǝ'yak ɓiiri, ne mazwãhsuu ɓii tǝkine suu ɓiiri, ka mo yea bai ɓǝɓe' ne zah'nan gin Dǝɓlii man Yesu Kristu. 24 Dǝɓ mai mo ɗii we Dǝɓ tǝ goŋga yo, ako ye ga joŋ ɓǝ ahe.
25 Wee pa ɓe, we juupel mor ɓuuru. 26 We haozah wo wee pa man daŋ ne zwan ki ne zahe ne fahlii mai wee pam moo joŋra wo ki.
27 Me fii we pǝ tǝɗii Dǝɓlii ka we kee leetǝr mai nyi wee pa man daŋ.
28 Dǝɓlii man Yesu Kristu mo joŋ gboŋgboŋ wo ɓiiri.
© Bible Moundang © Alliance Biblique du Tchad, 1996.