Fahlii yeɓ ma joŋ kǝsyil za ma iŋni
1 Mo lai dǝɓ malii ah ne swah ka, amma mo faa ɓǝ nyi ko tǝgbana pa ɓo, mo faa wo wee tǝbanna tǝgbana wee pamme. 2 Mo lai ŋwǝǝ matam ah tǝgbana ma ɓo, mo lai ŋwǝǝ macuu ah na wee ma ɓo maŋwǝǝre, ne byak suu ɓo pǝsãhe.
3 Mo yii ŋwǝǝ wul mai ara ye mo ŋwǝǝ wul matǝ goŋga. 4 Amma mawin wul mai mo no ne weere, wala wee namme, ka mo feera fahlii ka joŋ yeɓ syee mor ɓǝ iŋ ɓǝǝ ne gbah jol za ɓǝǝra, tǝgbana mo joŋra wo ɓǝǝ kǝpel ta. Ka mo joŋra wo za ɓǝǝ ne zum ɓǝǝ naiko, mor ɓǝ ah a 'nyah suu Masǝŋ. 5 Mawin wul mai mo ye mawin wul matǝ 'manna 'manna, ako ye mai mo ka ne dǝɓ ma gbah jol ah ya, mai fan byak ah mo uu ɓo tǝ Masǝŋ, so moo juupel fii ko ne com ne suŋ daŋ ka Masǝŋ mo gbahko jol ahe. 6 Amma mawin wul mai moo syee ne cwaa fanne, koo mo no ne cee ba laŋ, ka wul o. 7 Mo lai ra ne ɓǝ ahe, mor ka za mo yeara ne ɓǝ ki tǝtǝl ɓǝǝ ka. 8 Dǝɓ mo ɓaŋ syiŋ ɓǝ zah zum ah ya ɓe, so ma kal daŋ ah ye za yaŋ ahe, ka soɓ iŋ ah ɓoo ɓe, ka a pǝɓe' kal dǝɓ ma bai iŋ tǝ syaŋsyaŋ ɓe ta.
9 Mo ŋwǝǝ ɗii mawin wul ge kǝsyil ŋwǝǝ wul ka, sai mah ah mo joŋko syii ɓo jemma yea ɗǝ, so mo kanko laŋ wor ɓo vaŋno to, 10 mo so tǝra ko ɓo mor yeɓ sãh ah mo joŋko: wol wee ah ɓo pǝsãhe, nyiŋ za mai moo ginra yaŋ ahe, vãh ɓal nyi za syee mor Masǝŋ, gbah jol za ma pǝ bone, tǝkine joŋ yeɓ sãh camcam daŋ.
11 Mo zyii ŋwǝǝ ɗii ŋwǝǝ wul macuu ah ge kǝsyil ŋwǝǝ wul ka, mor fan cwaa ga kǝǝ ra ka 'yah kan worre, so a ga soɓra Kristu ɓoo. 12 A ga yeara ne ɓǝɓe' tǝtǝlli, mor syelra gbanzah ɓǝǝ ma kǝpel mo gbǝra pel Kristu ɓe. 13 So a ga feera fahlii ka muŋ cok tǝkol bai joŋ yeɓɓe, ne kyãh ga tǝgǝǝ yaŋ. Amma so maɓe' lii ah faɗa, a ga ciŋra za jak ɓǝ lii ne za zwǝ̃ǝ ɓǝ, a ga faara ɓǝ fan mai mo ka nǝn faa ɓǝǝ ya. 14 Mor ahe, me 'yah ŋwǝǝ wul macuu ah mo kanra wǝǝre, ka mo bemra wee tǝkine byak yaŋ ɓǝǝra, mor ka za syiŋ man mo lwaara fahlii ka faa ɓǝɓe' tǝ man ka. 15 Mor ŋwǝǝ wul manyeeki ah soɓra goŋga ɓoo so kalra ɓo tǝ syee mor Satan. 16 Amma mawin ma iŋ ah mo ne ŋwǝǝ wul kǝsyil zahzum ah ɓe, ka mo gbahko jol ɓǝǝra, mo soɓko ra gaɓ eklesia ka, mor ka eklesia mo gbahra jol ŋwǝǝ wul mai mo ka ne za gbah jol ɓǝǝr a.
17 Zaluu eklesia mai moo joŋra yeɓ ɓǝǝ pǝsãhe, a nǝn pǝ koŋ mai ka dǝɓ mo yii ra zahlǝŋ gwa, ma kal daŋ ah ye za mai moo cuura ɓǝ tǝkine cuu fanne. 18 Mor Ɗerewol faa: Mo kaŋ fan maa zah ŋgǝǝri mai mo tǝ ɗuu sor ne ka. So faa faɗa: Dǝɓ yeɓ ne fahlii ka lwaa fan soo ahe. 19 Mo nyiŋ ɓǝ mai mo ge cera dǝɓlii eklesia ne sǝ ka, sai ɓǝ ah mo yea ne zah za gwa koo sai ɗǝ. 20 Mo lai za mai mo joŋra faɓe' ne nahnǝn za pãa daŋ, mor ka tǝcoŋ za ki mo ɗuura galle.
21 Me faa nyi mo pel Masǝŋ ne pel Yesu Kristu tǝkine pel angeloi ma syen ahe: mo syee mor ɓǝ lai maiko. Mo kwo za camcam ka, wala mo joŋ fan wo koo zune ne zahsyee ka. 22 Mo hǝǝ ne kan jol tǝ dǝɓ mor ka soɓ yeɓ eklesia jol ah ka. Mo tai ne faɓe' za ki ka, mo byak suu ɓo pǝsãhe.
23 Mo zwǝ bii kol to ka, amma mo zwǝ bii lee kpuu vin biŋ mor ɓǝr ne syem mai moo gaɓ mo ka mo taŋ ɓǝr ne ko.
24 Faɓe' mǝ za ki a kwan caŋryaŋ kǝpel bai mai kiita mo ŋgoŋ tǝl ahe, amma mǝ za ki a pǝ̃ǝ gin lal fahfal ɓǝǝra. 25 Nai ta, yeɓ masãh ah laŋ a kwan caŋryaŋ, koo mai mo ɓah ka kwan caŋryaŋ ya ba laŋ ka gak muŋ ya.
© Bible Moundang © Alliance Biblique du Tchad, 1996.
