Zahban ma fahsǝŋ urra ɓǝ
(1 ZaG 12:1-20)1 Rehoboam kal ge Sikem, mor za Israel ma fahsǝŋ daŋ taira kal ge ɓo gŋ ka ɓaŋ ko kan goŋ ne ko. 2 Ka Jeroboam we Nebat ɗuu gal goŋ Salomo kal ge ɓo sǝr Egiɓ, amma ne cok ɓǝ ah mo ge dai ko gŋ, so pii soo ge yaŋ. 3 Zahban Israel ma fahsǝŋ peera pee ge ɗii ko, so taira ki kalra ge wo Rehoboam, faara nyi ko: 4 Pa ɓo joŋ ru tǝgbana byakke, amma mo tǝr gaɓ ah wo ɓuu ge lal ɓe, ru ga syee mor ɓo. 5 Rehoboam zyii zah ɓǝǝ faa: We soɓ me foo ɓǝ ah tǝgǝǝ zah'nan sai ɗao, ka we pii soo ge wo ɓe. Za zolra kalle.
6 So goŋ Rehoboam fii zaluu mai mo yea tǝ gbahra jol pah ah Salomo faa: We 'yah me zyii ɓǝ zah za mai mo fiira fii ɓo zah ɓe ɗǝne? 7 Zyiira faa nyi ko: Mo joŋ ɓǝ sãh wo zai mo zyii ɓǝ zah ɓǝǝ pǝ'nyah ɓe, a ga syeera mor ɓo ne zahzyil vaŋno cẽecẽe.
8 Amma Rehoboam zyii laa ɓǝ mai zaluu mo faara nyi ko ya, so kal ge wo wee tǝbanna mai mo joŋra laŋ zahki, mo so tǝ gbahra jol ahe, 9 fii ra faa: We 'yah me zyii ɓǝ zah za mai mo fiira fii ɓo zah ɓe, ka me tǝr ɓǝ gaɓ mai pa ɓe mo yea tǝ joŋ wo ɓǝǝ ge lalle ɗǝne? 10 Tǝbanna mai mo joŋra laŋ zahki ne ki faara nyi ko: Mo faa nyi ra welam laŋ jol ɓe a pǝ'man kal zahkpem jol pa ɓe ɓe. 11 Mo faa nyi ra: Pa ɓe kan faswaa mayǝk ah tǝtǝl ɓiiri, amma me so ga ɓoo faswaa ah gai we gŋ faɗa. Pa ɓe loɓ we ne bǝrǝǝ makolle, ma ɓe me ga loɓ we ne bǝrǝǝ mazahyakke.
12 Ne zah'nan patǝ sai ah Jeroboam ne za pãa daŋ gera wo Rehoboam tǝgbana mo faa ɓo nyi ra. 13 Goŋ zyii laa ɓǝ mai zaluu mo faara nyi ko ya, ge zyii ɓǝ zah za pǝgaɓ sǝ, 14 tǝgbana mai wee tǝbanna mo faara nyi ko. Faa: Pa ɓe kan faswaa mayǝk ah tǝtǝl ɓiiri, amma me so ga ɓoo faswaa ga nyi we gŋ faɗa. Pa ɓe loɓ we ne bǝrǝǝ makolle, ma ɓe me ga loɓ we ne bǝrǝǝ mazahyakke. 15 Goŋ zyii ka laa ɓǝ faa za mo faara nyi ko ya, mor Dǝɓlii Masǝŋ ye joŋ ɓǝ ah ɓo, mor ka baa ɓǝ mai mo faako nyi Jeroboam we Nebat ne zah profeto Ahija.
16 Ne cok za mo kwora goŋ laa zah ɓǝǝr a, ŋwaara ɓǝ faa: Na soɓ David ne za yaŋ ah o, joŋra fẽe ɓo mor man ne? Za Israel, na pii soo ge yaŋ o, na soɓ Rehoboam mo kaako goŋ ah o.
Za Israel daŋ ŋwoora kyaŋ soɓ ko. 17 Rehoboam kaa goŋ tǝ za mai mo kaara ɓo pǝ sǝr Yuda to o.
18 So goŋ Rehoboam pee Adoniram dǝɓlii za mai mo ɓaŋra ra ge ɓo tǝ yeɓ ne swah ge wo za Israel, amma ge ɓaara ko ne tǝsal pǝ wulli. Rehoboam hǝǝ yee muŋta sal ah ɗuu kal ge yaŋ Jerusalem. 19 Daga cok ah sǝ, za Israel ma fahsǝŋ ŋwoora kyaŋ soɓ morsǝ̃ǝ goŋ David.
© Bible Moundang © Alliance Biblique du Tchad, 1996.
