2 KEE ƁƏ 12 - Bible Moundang (MUA)

Egiɓien ge ɗaŋra sǝr Yuda

1 Ne cok Rehoboam mo kaa goŋ mo kwo zye jwǝǝ sǝ̃ǝ gŋ ɓe, ako ne zan ah daŋ soɓra ɓǝ lai Dǝɓlii ɓoo. 2 Mor ah Sisak goŋ sǝr Egiɓ ge ruu sal ne yaŋ Jerusalem ne syii patǝ dappe ah Rehoboam mo kaa goŋ ɓo. 3 Ur gin sǝr Egiɓ ge ne muŋta sal ujenere ne temere gwa, za pǝr ujenere jemma yea, so ne sooje pãa ah ka gak kee ya: Libien, Sukkien ne Etiopien daŋ. 4 Re yaŋ maluu ma ne ɓaale ah mo pǝ sǝr Yuda daŋ, ŋhaa ge dai yaŋ Jerusalem.

5 Profeto Semaja ur kal ge wo goŋ Rehoboam ne zaluu sǝr Yuda mo ɗuura gal Sisak tai ge ɓo yaŋ Jerusalem. Faa nyi ra: Dǝɓlii faa sye: Awe soɓ me ɓoo, amma zǝzǝ̃ǝ ame soɓ we ge mor jol Sisak ɓe.

6 Goŋ ne zaluu daŋ tǝra ɓe, ru joŋ faɓe' ɓe, so faara: Dǝɓlii a njaŋ. 7 Ne cok Dǝɓlii mo kwo naiko, so faa ɓǝ nyi Semaja: Zai kwora faɓe' ɓǝǝ ɓe, me ka muŋ ra yao, me ga soɓ ra ɗuu ka mo ǝ̃ǝra, me ka ga ɓaŋ kpãh tǝ yaŋ Jerusalem pǝ'man ka me ɓeɓ ne jol Sisak yao. 8 Amma a ga ɗaŋ ra, a ga feera fan kǝsyil joŋ mor ɓe ne joŋ mor za goŋ sǝrri.

9 Goŋ Sisak ge yaŋ Jerusalem, ge woo fan mai mo ɓǝr yaŋ Masǝŋ ne ma ɓǝr yaŋ goŋ daŋ, woo fan daŋ belbelle, tǝkine bal ma vãm kaŋnyeeri mai goŋ Salomo mo zyeɓ daŋ kal ne ko. 10 So goŋ Rehoboam zyeɓ bal ma ne vãm syẽ rǝk ge pǝ cok ahe, so soɓ ge jol zaluu sooje ma byakra yaŋ goŋe. 11 Koo ne cok fẽene daŋ goŋ mo tǝ ga yaŋ Masǝŋ ɓe, za ma byak cok a woora bal uu ne ko, so a jinra ga rǝk yaŋ za ma byak cokki. 12 Rehoboam soɓ suu ah wo Dǝɓlii, mor ah kpãh mai Dǝɓlii mo ɓaŋ kǝnah ɓo so muŋ ko ne yao. So sǝr Yuda kaa jam.

Ɓoo fal ɓǝ kaa goŋ Rehoboam

13 Rehoboam kaa goŋ yaŋ Jerusalem, joŋ goŋ ah pǝswahe. Ne cok mo kaa goŋ, ka joŋ syii ɓo jemma nai tǝtǝl vaŋno, kaa goŋ yaŋ Jerusalem syii jemma tǝtǝl rǝŋ pǝ yaŋ mai Dǝɓlii mo nǝǝ ɓo pǝ sǝr Israel daŋ tǝgbana cok mai ka za mo juupel wol ah gŋ. A ɗii mah Rehoboam ne Naama, mǝlaŋ sǝr Ammon yo. 14 Joŋ fan maɓe' ahe, mor ka zyii kyeɓ fahlii ka joŋ 'yah Dǝɓlii ya.

15 Ɓǝ yeɓ mai Rehoboam mo joŋ daga tǝtǝŋ ah ŋhaa vǝr ahe, ne ɓǝ za yaŋ ah mo ŋwǝǝ ɓo, ɓǝ ah no pǝ ɗerewol ɓǝ profeto Semaja ne pǝ ɗerewol Iddo pa ẽe cokki. Rehoboam ne Jeroboam ruura sal kǝsyil ki pǝlli. 16 So Rehoboam wuu, ciira ko pǝ cok cii wul za goŋ pǝ yaŋ David. Wel ah Abiija kaa goŋ pǝ cok ahe.