Asa zyeɓ ɓǝ mafuu camcam
1 Tǝ'yak Masǝŋ ge tǝ Azaria we Oded. 2 Ur kal ge zyaŋ ne goŋ Asa, faa nyi ko: Goŋ Asa ne we za sǝr Yuda ne za Benyaamin daŋ, we laa ɓǝ faa ɓe. Ne cok we ne Dǝɓlii ɓe, Dǝɓlii ga yea ne we ta. We tǝ kyeɓ ko ɓe, a ga soɓ we lwaa ko. Amma we soɓ ko ɓe, a ga soɓ we ɓoo ta. 3 Nǝn pǝlli, za Israel ka ne Masǝŋ matǝ goŋga ya, ara ka ne za joŋzahsyiŋ ka cuu fan nyi ra ya, ara ka ne ɓǝ lai ya. 4 Amma ne cok gaɓ mo ge lwaa ra ɓe, a jinra gin wo Dǝɓlii Masǝŋ Israel, a kyeɓra ko, so a lwaara ko ta. 5 Pǝ zah'nan mooko, dǝɓ mai moo gak ga cok ki, moo so jin jam kǝka, mor gaɓ ne ɓǝ ma joŋ tǝ haihai a wo sǝr ne lii ah daŋ. 6 Za sǝr maki ah a kyeɓ ɓǝ ne za sǝr maki ahe, za yaŋ maki ah a kyeɓ ɓǝ ne za yaŋ maki ahe, mor Masǝŋ yee pee gaɓ tǝkine ɓeɓ gin tǝ ɓǝǝra. 7 Amma sai we yea pǝswahe, we soɓ zahzyil mo nǝǝ we ka, mor yeɓ mai we tǝ joŋ we ga lwaa soo ahe.
8 Ne cok Asa mo laa ɓǝ Masǝŋ mai Azaria we Oded mo faa, ɓǝ ah swaa zahzyil nyi ko, so dah masǝŋ ki cam ra pǝ sǝr Yuda ne sǝr Benyaamin tǝkine ma pǝ yaŋ maluu mai mo re ne sal tǝgǝǝ waa Efraim daŋ ge lal belbelle. So zyeɓ cok joŋ syiŋ Dǝɓlii mai mo zahfah yaŋ Masǝŋ.
9 Asa ɗii za daŋ ka mo taira: za Yuda ne za Benyaamin, tǝkine za mai mo gera gin pǝ sǝr Efraim, Manasse, ne Simon mo ge kaara ɓo wol ah pǝ sǝr goŋ ahe, mor kwora ɓe, Dǝɓlii Masǝŋ ah no ne ki. 10 Taira ge yaŋ Jerusalem pǝzyil fĩi sai, ne syii jemma tǝtǝl dappe ah Asa mo kaa goŋ ɓo. 11 Com ah joŋra syiŋ wo Dǝɓlii ne fan mai mo lwaara zah salle, ŋgomra ŋgǝǝri temere rǝŋ, pǝsǝ̃ǝ ujenere rǝŋ, joŋra syiŋ ne ko. 12 Gbǝra zah faa, rǝ ga juupel wo Dǝɓlii Masǝŋ pa ɓǝǝ lii ra ne zahzyil vaŋno, ne mazwãhsuu daŋ. 13 Koo zune daŋ, mo welaŋ yo, mo dǝɓlii yo, wala mo dǝwor o, koo mo madǝwin o, mo zyii ka juupel wol ah ya ɓe, a ga ira ko pǝ wulli. 14 Faara ɓǝ zahki ne lii ɓǝǝ daŋ, haara zah ne pǝ tǝɗii Dǝɓlii, faara: Ru ga syee mor ɓǝ gbanzah ahe. So ŋwaara ɓǝ, ulra kokõorĩi. 15 Za Yuda daŋ laara pǝ'nyah pǝlli, mor gbǝra zah ah ɓo ne zahzyil vaŋno. Ɓaŋra ɓǝ juupel wo Dǝɓlii ɓo ne 'yahe, so Dǝɓlii nyiŋ ɓǝ ɓǝǝra, so nyi jam nyi ra cok daŋ.
16 Goŋ Asa nǝǝ ɗii mah goŋ gin tǝtǝl mamlii Maaka ge lalle, mor Maaka zyeɓ masǝŋ ki cam ma ɗii ne Astarte. Asa cee masǝŋ ki cam ah ge sǝŋ, so ŋgom ɓǝri ɓǝri, woo ɓoo wii nyi pǝ cok tǝforoŋ Kedron. 17 Asa ɓeɓ cok juupel za gwǝǝ pǝ sǝr ah ge lal daŋ ya, amma ne daŋ laŋ, pǝ zah'nan cee ah daŋ joŋ fan ma 'nyah suu Dǝɓlii. 18 Woo fan mai pah ah mo nǝǝ ɓo mor Masǝŋ ge rǝk ɓǝr yaŋ Masǝŋ, tǝkine vãm kaŋnyeeri ne vãm solai mai ako ne suu ah mo nyi daŋ. 19 Ne cok ah sal kǝka, ŋhaa dai syii jemma sai tǝtǝl dappe ah Asa mo kaa goŋ ɓo.
© Bible Moundang © Alliance Biblique du Tchad, 1996.
