Akazia goŋ Yuda
(2 ZaG 8:24-292 9:21-28)1 Za Araɓ manyeeki ah urra ɓǝ, ikra wee goŋ Yuram daŋ ge lal pǝ wulli, sai coŋ wel ah malaŋ ma ɗii ne Akazia to . So za yaŋ Jerusalem ɓaŋ Akazia kan goŋ ne pǝ cok pah ahe. 2 Ne cok Akazia mo kaa goŋ, ka joŋ syii ɓo jemma gwa tǝtǝl gwa, kaa goŋ yaŋ Jerusalem syii vaŋno. A ɗii mah ah ne Atalia, mǝlaŋ Omri goŋ Israel yo. 3 Akazia ɓaŋ tǝɓal fan joŋ za yaŋ Akaɓ, mah ah cuu fahlii maɓea ah nyi ko, kǝǝ ko dan pǝ ɓǝɓe'. 4 Akazia joŋ faɓe' wo Dǝɓlii, mor fahfal wul pah ah za morsǝ̃ǝ goŋ Akaɓ ye gbahra jol ah ne ɓǝ, ŋhaa ɓǝ ah joŋ so ciŋ lee ahe. 5 Syee mor ɓǝ faa ɓǝǝra, mor ah tai ki ne Jehoram goŋ Israel, kalra ge ruu sal ne Hazayel goŋ sǝr Siria. Za sal ge ryaŋra Ramot ma Giliat, so Jehoram lwaa nwãh zah sal ahe. 6 Jehoram so pii soo ge yaŋ Jezereel mor ka kiŋ nwãh ahe, so Akazia kal ge gŋ mor ka ẽe ko ne syem ahe.
7 Masǝŋ fer ɓǝ ga ẽe Jehoram so ciŋ lee Akazia. Ne cok Akazia mo no gŋ, ako ne Jehoram gwa daŋ urra kal ka ga zyaŋ ne Jehu we Nimsi mai Masǝŋ mo nǝǝ ko ɓo ka vǝr za yaŋ Akaɓ. 8 So ne cok Jehu mo tǝ faŋ val ɓǝ mai Masǝŋ mo faa ɓǝ ah ɓo tǝ za yaŋ Akaɓ, comki zyaŋ ne zaluu sǝr Yuda, ne we naa mah Akazia mai mo swǝra fahlii ah ge ɓo, ik ra ge lal pǝ wul tǝɗe'. 9 So kyeɓra Akazia, lwaara ko muŋ ɓo yaŋ Samaria, so gbǝra ko ge nyi Jehu ne i ge lalle. Amma ciira wul ah pǝyǝkki, mor faara, we Yusafat mai mo syee mor Dǝɓlii ne zahzyil vaŋno yo.
Koo morsǝ̃ǝ Akazia vaŋno laŋ, coŋ ka mo so kaa goŋ ya.
Ma goŋ Atalia kaa goŋe
(2 ZaG 11:1-3)10 Ne cok Atalia mah goŋ Akazia mo kwo ira wel ah pǝ wul ɓe, ur tǝŋ ne ik wee goŋ sǝr Yuda daŋ ga lalle. 11 Amma naa mah Akazia mawin no a ɗii ne Josabet, kan pa joŋzahsyiŋ Jehojada ɓo, lal ɓaŋ we Akazia ma ɗii ne Joas muŋ, wol ko ɓǝr yaŋ Masǝŋ, Josabet muŋ ko gŋ ŋhaako, Atalia lwaa i ko pǝ wul a. 12 Muŋ gŋ ŋhaa joŋ syii yea, ka Atalia kaa goŋ ɓo.
© Bible Moundang © Alliance Biblique du Tchad, 1996.
