2 KEE ƁƏ 23 - Bible Moundang (MUA)

Urra ɓǝ ne Atalia

1 Amma ne syii rǝŋ ahe, Jehojada faa zah'nan ah ge ɓe. So gbǝ zah ne zaluu sooje dappe: Azaria we Jeroham, Ismael we Jokanan, Azaria we Obed, Maaseja we Adaija, ne Elisafat we Zikri. 2 Urra kal ge kyãh yaŋ maluu pǝ sǝr Yuda, taira za joŋzahsyiŋrĩ, ne za maluu ah mo pel za zahzum ɓǝǝ camcam daŋ, ge yaŋ Jerusalem ne ko.

3 Ara daŋ kalra ge ɓǝr yaŋ Masǝŋ, ge gbǝra zah gŋ ne Joas we goŋ Akazia. Jehojada faa nyi ra: We goŋ malaŋ nyẽeno! Zǝzǝ̃ǝ mai tǝ ga kaa goŋ tǝgbana mai Dǝɓlii mo faa ɓǝ ah ɓo morsǝ̃ǝ goŋ David yee ga kaa goŋe. 4 Fan mai na ga joŋ a naiko: ne cok za joŋzahsyiŋ ne Lewitien mo ge tǝ joŋra yeɓ ne com 'yak ɓe, 5 vaŋno daga sai ɓǝǝ maki ah laŋ mo byak yaŋ goŋe, ka tǝcoŋ za ki mo uura cok ma ɗii ne Zahfah Kpii Yaŋ, ka za pãa daŋ mo taira zah yaŋ Masǝŋ lalle. 6 Ka we soɓ koo dǝɓ vaŋno dan ɓǝr yaŋ Masǝŋ ka, sai za joŋzahsyiŋ ne Lewitien mai moo joŋra yeɓ to, we nyi fahlii ga gŋ nyi ra, mor nǝǝra ra rǝk ɓo mor ahe, amma tǝcoŋ za pãa daŋ, sai mo laara ɓǝ faa Dǝɓlii, mo uura lalle. 7 Lewitien mo uura ryaŋ goŋ ɓoo kǝsyilli, zune kǝsyil ɓǝǝ daŋ mo nǝǝko kafahe mor jolle, ka goŋ mo tǝ ga kẽne daŋ mo ɗǝǝra tǝtǝl ne ki ka. Koo zune mo kyeɓ fahlii ka dan ga yaŋ Masǝŋ ɓe, mo ira ko pǝ wulli.

8 Lewitien ne za sǝr Yuda daŋ joŋra na ɓǝ mai Jehojada mo faa ɓo. Zaluu sooje, zune daŋ a tai za mǝ ah mai mo tǝ gara tǝ yeɓ ne com 'yakke, tǝkine za mai mo joŋra yeɓ ɓǝǝ vǝr mo tǝ gara yaŋ o daŋ, mor pa joŋzahsyiŋ Jehojada faa ɓǝ woŋ tǝgǝǝ za nyi ra ne ɓǝ faa ah ya. 9 Jehojada wom zǝǝ ne bal sal mǝ goŋ David mo yea rǝk ɓo ɓǝr yaŋ Masǝŋ nyi zaluu sooje. 10 So rǝk za mai mo nǝǝra kafahe ɓo jolle, ryaŋra yaŋ Masǝŋ ka ga nǝfah kǝmorcomzah'nan mor ka byak goŋe. 11 So Jehojada zaŋ Joas pǝ̃ǝ ge lal ne ko, maa njok goŋ ɓo nyi tǝtǝlli, nyi ɗerewol ɓǝ lai ma kaa goŋ nyi. So pa joŋzahsyiŋ Jehojada ne wee ah syeera nǝm ge nyi tǝtǝl kan goŋ ne ko. So za daŋ ŋwaara ɓǝ faa: Masǝŋ mo soɓ tǝ goŋe!

12 Ne cok Atalia mo laa za ŋwaara gor ɓo tǝ goŋe, hǝǝ kal ge yaŋ Masǝŋ pǝ cok mai za mo taira ɓo gŋ. 13 So mo ge kwo goŋ fuu uu ɓo zahfah yaŋ Masǝŋ kah waddǝǝ mai moo zaŋra za goŋ ga uu gŋ na zahsyiŋ ah moo joŋra, zaluu sooje ryaŋra ko ɓoo ɓo kǝsyilli, so za ma ne kokõorĩi mo uura ɓo kah ahe, za pãa daŋ mo tǝ laara pǝ'nyah moo ulra kokõorĩi, so za ma ɗǝǝ lǝŋ ɓǝr yaŋ Masǝŋ mo tǝ woŋra fakyẽm ɓǝǝ mo tǝ yiira goŋ ne ko, Atalia ŋgǝ̃ǝ mbǝro wo suu ah ɓyaŋ ɓǝ faa: Tǝkor o, tǝkor o!

14 Pa joŋzahsyiŋ Jehojada 'yah ka mo ira ko pǝ wul zah yaŋ Masǝŋ ya, faa nyi zaluu sooje: We gbǝ ko kǝsyil ɓii pǝ̃ǝ ge lal ne ko, dǝɓ mai mo tǝ kyeɓ ka nyiŋ ko jol ɓii ɓe daŋ, ka we i ko pǝ wulli.

15 So gbǝra ko pǝ̃ǝ zahfah Pǝr ma ga yaŋ goŋ ne ko, ge ira ko gŋ ŋhaa pǝ wulli.

Jehojada zyeɓ fahlii mafuu ahe

(2 ZaG 11:17-20)

16 Jehojada ne goŋ tǝkine za pãa daŋ gbǝra zah ka mo yeara za mǝ Dǝɓlii. 17 So ara daŋ kalra ge ɓǝr yaŋ Ba'al, ge dahra ge sǝŋ, so dahra cok joŋ syiŋ ne masǝŋ ki cam manyeeki ah mo gŋ ge lalle, so ira Mattan pa joŋzahsyiŋ Ba'al ge lal pǝ wul pel cok joŋ syiŋrĩ. 18 So Jehojada rǝk za joŋzahsyiŋ ne Lewitien ka mo joŋra yeɓ yaŋ Masǝŋ. Ka mo joŋra zah yeɓ mai goŋ David mo nyi nyi ra, ka mo tǝǝra syiŋ suŋwii wo Dǝɓlii tǝgbana mai ɓǝ lai Mosus mo faa ɓo. So ka mo ɗǝǝra lǝŋ tǝkine yii Dǝɓlii. 19 Jehojada so rǝk za ma byak cok ka mo byakra zahfah yaŋ Masǝŋ, mor ka koo zune mo juu 'nahm ɓo ɓe, mo soɓra ko dan ge gŋ ka. 20 Zaluu sooje ne zaluu ma pel za pãare, ne zaluu ma tǝsal ɓǝ, ne za pãa tǝkine Jehojada daŋ gǝrra mor goŋ ɓaŋra ko gin yaŋ Masǝŋ kal ge yaŋ goŋ ne ko, syeera zahfah malii. So goŋ ge kaa tǝ fakal goŋe. 21 Za daŋ laara pǝ'nyah pǝlli. Ne cok ah ka ira Atalia ge lal ɓe ta. Za daŋ kaara jam.