Yutam goŋ sǝr Yuda
(2 ZaG 15:32-38)1 Ne cok Yutam mo kaa goŋ, ka joŋ syii ɓo jemma gwa tǝtǝl dappe, kaa goŋ yaŋ Jerusalem syii jemma tǝtǝl yea. A ɗii mah ah ne Jerusa, mǝlaŋ Sadok yo. 2 Yutam joŋ fan ma 'nyah suu Dǝɓlii tǝgbana pah ah Osias mo joŋni, amma sai fan vaŋno, joŋ faɓe' ne dan ga ɓǝr yaŋ Masǝŋ na pah ah mo joŋ ya. Amma za gara pel ne joŋ faɓe' kpǝ.
3 Yutam ye vuu zahfah yaŋ Masǝŋ ma nefah kǝsǝŋ, joŋ yeɓ pǝlli ne zyeɓ ɓaale yaŋ Jerusalem pǝ cok ma ɗii ne Ofel. 4 Vuu yaŋ maluu camcam mo tǝgǝǝ waa pǝ sǝr Yuda, so vuu yaŋ maswah ah ra ne yaŋ mawah ah ra pǝzyil gǝ̃ǝre. 5 Ruu sal ne goŋ Ammon ne zan ahe, nĩi ra daŋ, joŋ doole nyi Ammonien sǝǝra gǝraama nyi ko syii sai, fan ah daŋ joŋ naiko: vãm solai nǝn ton nai, alkamaari col ujenere jemma dappe, zyemĩi col ujenere jemma dappe ta. 6 Yutam ge pel pǝswahe, mor a syee mor Dǝɓlii Masǝŋ ah pǝsãhe. 7 Tǝcoŋ ɓǝ yeɓ Yutam ne kaa goŋ ah mo kaani, ruu sal ah mo ruu tǝkine fan mai mo joŋko daŋ, ɓǝ ah ŋwǝǝ ɓo pǝ ɗerewol Ɓǝ Za Goŋ Israel ne Yuda. 8 Ne cok Yutam mo kaa goŋ, ka joŋ syii ɓo jemma gwa tǝtǝl dappe, kaa goŋ yaŋ Jerusalem syii jemma tǝtǝl yea. 9 Wuu, so ciira ko pǝ yaŋ David. Wel ah Akas kaa goŋ pǝ cok ahe.
© Bible Moundang © Alliance Biblique du Tchad, 1996.
