Manasse goŋ Yuda
(2 ZaG 21:1-10)1 Ne cok Manasse mo kaa goŋ sǝr Yuda, ka joŋ syii ɓo jemma tǝtǝl gwa, kaa goŋ yaŋ Jerusalem syii jemma dappe tǝtǝl dappe. 2 Joŋ fan maɓe' ah wo Dǝɓlii tǝgbana yeɓ ma ren swãa ah mai za mai Dǝɓlii mo nĩi ra pel za Israel myah moo joŋra. 3 Manasse so jin vuu cok joŋ syiŋ za gwǝǝ mai pah ah Ezekias mo dah ge lalle, vuu cok joŋ syiŋ wo Ba'al, zyeɓ foto Astarte, so a juupel wo ŋwǝǝmǝŋgai ta. 4 Vuu cok joŋ syiŋ za gwǝǝ ɓǝr yaŋ Masǝŋ pǝ cok mai Dǝɓlii mo faa ka za mo juura pel wo 'min gŋ ga lii. 5 Vuu cok joŋ syiŋ wo ŋwǝǝmǝŋgai ɓǝr pedǝǝ matǝ gwa mo ɓǝr yaŋ Masǝŋ. 6 Woo wee ah mawǝǝ joŋ syiŋ suŋwii ne pǝ el Hinnom, a ẽe ciŋ tǝkine joŋ fasaa, woo za ma faa ɓǝ ne mǝǝzuwuŋ wul rǝkki, tǝkine za kǝndaŋ daŋ, joŋ faɓe' malii ah wo Dǝɓlii, kǝǝ ko ka ɓaŋ kpãhe. 7 Ɓaŋ foto masǝŋ ki ge syii ɓǝr yaŋ Masǝŋ, cok mai Dǝɓlii mo faa nyi David ne wel ah Salomo: Yaŋ ɓe ne yaŋ Jerusalem mai me nǝǝ ɓo kǝsyil sǝr ban Israel matǝ jemma tǝtǝl gwa, cok mai ka za mo ge juura pel wo ɓe gŋ yo. 8 Za Israel daŋ mo syeera mor ɓǝ cuu ɓe, mo gbǝra ɓǝ lai ɓe mai Mosus dǝɓ yeɓ ɓe mo nyi nyi ra daŋ ɓe, me ka nĩi ra gin pǝ sǝr mai me nyi nyi pa ɓǝǝ lii ra ga lal a. 9 Manasse kǝǝ za sǝr Yuda joŋra faɓe' pǝ'man kal mǝ za mai Dǝɓlii mo nĩi ra pel zan ah pǝ sǝr mai ge lalle.
Manasse toobii
10 Dǝɓlii so lai Manasse ne zan ahe, amma zyii laara ya. 11 So Dǝɓlii pee zaluu sooje sǝr Asiria ge ruura sal ne sǝr Yuda, gbǝra Manasse, maara kǝṽǝl ge nyi zahe, ɓaara celeelu ge nyi jolle, so kalra ge sǝr Babilon ne ki. 12 Manasse wonsuu ah pǝ bone ahe, pii soo ge wo Dǝɓlii Masǝŋ ah pǝǝ ko ka mo gbahko jol ahe. 13 Masǝŋ laa juupel Manasse, so soɓ ko pii soo ge yaŋ Jerusalem, ge kaa goŋ faɗa. So Manasse tǝ, Dǝɓlii ako ye Masǝŋ to.
14 Fahfal ah Manasse vuu ɓaale nǝfah kǝmorcomzah'nan yaŋ Jerusalem nǝfah kǝlal ahe, tǝŋ daga nǝfah kǝmorcomlil el Gihon ŋhaa ge dai zahfah Syiŋ tǝkine cok yaŋ Jerusalem mai moo ɗii ne Ofel, so rǝk zaluu sooje ne za sal ɓǝǝ pǝ yaŋ maluu maswah ah pǝ sǝr Yuda daŋ. 15 So woo masǝŋ za gwǝǝ gin ɓǝr yaŋ Masǝŋ ne foto masǝŋ ki mai mo ge syiiko ɓo gŋ daŋ ge lalle, dah cok joŋ syiŋ za gwǝǝ mai mo ge vuu ɓo tǝgee pǝ cok mai yaŋ Masǝŋ mo gŋ ne ma pǝ cok manyeeki ah ra mo tǝgǝǝ yaŋ Jerusalem daŋ, woo fan ah ra daŋ ge myah fahceekor lalle. 16 Zyeɓ cok joŋ syiŋ mai moo joŋra syiŋ wo Dǝɓlii gŋ, so joŋ syiŋ ma nyi jam ne syiŋ osoko wo Dǝɓlii tǝl ahe. Faa nyi za Yuda daŋ ka mo juura pel wo Dǝɓlii Masǝŋ Israel. 17 Za a joŋra syiŋ pǝ cok manyeeki ah ra ta, amma a joŋra wo Dǝɓlii to.
In zah kaa goŋ Manasse
18 Fan mai daŋ Manasse mo joŋni, ɓǝ juupel ah mo juu wo Masǝŋ ahe, ne ɓǝ mai profetoen mo faara nyi ko pǝ tǝɗii Dǝɓlii Masǝŋ Israel, ɓǝ ah daŋ ŋwǝǝ ɓo pǝ ɗerewol Ɓǝ Za Goŋ Israel. 19 Juupel goŋ mo juu so Masǝŋ mo laa juupel ahe, faɓe' ne ɓǝɓe' mai mo joŋko, tǝkine cok juupel za gwǝǝ mai mo vuuko, ne foto Astarte mai mo zyeɓko, ne masǝŋ ki cam mai mo juupel wol ah daŋ, ɓǝ ah ŋwǝǝ ɓo pǝ ɗerewol Ɓǝ profetoen. 20 Manasse wuu, ciira ko yaŋ goŋe. Wel ah Amon kaa goŋ pǝ cok ahe.
Amon kaa goŋ Yuda
(2 ZaG 21:19-26)21 Ne cok Amon mo kaa goŋ sǝr Yuda, ka joŋ syii ɓo jemma gwa tǝtǝl gwa, kaa goŋ yaŋ Jerusalem syii gwa. 22 Joŋ faɓe' wo Dǝɓlii tǝgbana pah ah Manasse mo joŋni, syee mor masǝŋ ki ra mai pah ah Manasse mo syee mor ah ta. 23 Amma zyii ka wonsuu ah ka pii soo gin wo Dǝɓlii tǝgbana pah ah mo joŋ ya.
24 Comki zaluu pel Amon urra ɓǝ ne ki, ira ko pǝ wul ɓǝr yaŋ goŋ ahe. 25 Amma za sǝr Yuda ikra za ma in ko pǝ wul ge lalle. Ɓaŋra wel ah Josias kan goŋ ne pǝ cok ahe.
© Bible Moundang © Alliance Biblique du Tchad, 1996.
